ଇଂଲଣ୍ଡଠୁ ହାରିଲା ପାକିସ୍ତାନ, ଟିଭି ଶୋ'ରେ ମୁହାଁମୁହିଁ ହେଲେ ଦୁଇ ପାକ୍ ଭେଟେରାନ୍, ପରସ୍ପରକୁ ଦେଲେ ଗାଳି

ଲାହୋର, ୨୫/୦୨: ଟି୨୦ ବିଶ୍ୱକପର ସୁପର ୮ରେ ମାଟି କାମୁଡିଛି ପାକିସ୍ତାନ । ଦଳ ପ୍ରଥମେ ନ୍ୟୁଜିଲାଣ୍ଡ ସହ ଖେଳିଥିଲା । ତେବେ ଏହା ବର୍ଷା ଯୋଗୁଁ ବାତିଲ ହୋଇଥିଲା । ଦ୍ୱିତୀୟ ମୁକାବିଲାରେ ଟିମ୍ ଇଂଲଣ୍ଡଠୁ ପରାସ୍ତ ହୋଇଛି । ଫଳରେ ଦଳର ସେମି ଖେଳିବା ରାସ୍ତା ଏକପ୍ରକାର ବନ୍ଦ ହୋଇଯାଇଛି । ଯାହାକୁ ନେଇ ଦୁଃଖରେ ଭାଙ୍ଗି ପଡିଛନ୍ତି ଫ୍ୟାନ୍ସ । କେବଳ ଫ୍ୟାନ୍ସ ନୁହେଁ ଟିମ୍ ର କିଛି ପୂର୍ବତନ ଖେଳାଳି ସଲମାନ୍ ଆଗାଙ୍କ ଟିମ୍ ର ଅବସ୍ଥାକୁ ସମାଲୋଚନା କରୁଛନ୍ତି । ଏହାରି ଭିତରେ ଦଳର ଦୁଇ ଭେଟେରାନ ମୁହାଁମୁହିଁ ହୋଇଛନ୍ତି । ଏକ ଟେଲିଭିଜନ କାର୍ଯ୍ୟକ୍ରମରେ ପୂର୍ବତନ ପ୍ଲେୟାର ସକଲେନ୍ ମୁସ୍ତାକ୍ ଏବଂ ମହମ୍ମଦ ହାଫିଜ ମୁହାଁମୁହିଁ ହୋଇଥିବା ଦେଖିବାକୁ ମିଳିଛି ।

ମଙ୍ଗଳବାର ଶ୍ରୀଲଙ୍କାରେ ମୁହାଁମୁହିଁ ହୋଇଥିଲେ ପାକିସ୍ତାନ ଏବଂ ଇଂଲଣ୍ଡ । ପ୍ରଥମେ ବ୍ୟାଟିଂ କରିଥିଲା ପାକ୍ । ଦଳ ୨୦ ଓଭରରେ ୧୬୪ ରନ୍ କରିପାରିଥିଲା । ସାହିଦଜାଦା ଫରହାନଙ୍କ ସମେତ ଆଉ କାହାରି ବ୍ୟାଟ୍ ଚାଲିନଥିଲା । ୧୬୫ ରନ୍ ର ବିଜୟ ଲକ୍ଷ୍ୟକୁ ପିଛା କରୁଥିବା ଇଂଲଣ୍ଡ ୮ ଓ୍ୱିକେଟ୍ ହରାଇ ମ୍ୟାଚ୍ ଜିତି ନେଇଥିଲା । ଇଂଲଣ୍ଡ ପକ୍ଷରୁ ହ୍ୟାରି ବ୍ରୁକ୍ ଶତକ ଲଗାଇ ପାକ୍ ହାତରୁ ବିଜୟ ଛଡାଇ ନେଇଥିଲେ ।

ମ୍ୟାଚରେ ମହମ୍ମଦ ନଓ୍ୱାଜଙ୍କ ପ୍ରଦର୍ଶନକୁ ନେଇ ପାକ୍ ଟିଭିରେ ଆଲୋଚନା ହେଉଥିଲା । ମୁସ୍ତାକ ନଓ୍ୱାଜ ଉଭୟ ବ୍ୟାଟିଂ ଏବଂ ବୋଲିଂରେ ଭଲ ପ୍ରଦର୍ଶନ କରିପାରିବେ ବୋଲି କହିଥିଲେ । ଅନ୍ୟ ଦିଗରେ ଏହାକୁ ଖଣ୍ଡନ କରିଥିଲେ ହାଫିଜ୍ । ଓ୍ୱିକେଟ୍ ନେବା ନଓ୍ୱାଜଙ୍କ ପ୍ରାଥମିକତା ହେବା ଦରକାର ବୋଲି ହାଫିଜ୍ ଯୁକ୍ତି କରିଥିଲେ । ଏହା କହିବା ସମୟରେ ଉଭୟ ଜୋରରେ ପାଟି କରିଥିଲେ ।

ଏହି ଖବରଟି ପଢନ୍ତୁ...  ବଦନାମ କରିବାକୁ ଅନୁମତି ଦେବୁ ନାହିଁ...NCERT ବହିରେ ନ୍ୟାୟପାଳିକାରେ ଦୁର୍ନୀତି ବିଷୟବସ୍ତୁ ଉପରେ ସିଜେଆଇ କ୍ଷୁବ୍ଧ

ପ୍ରଥମେ ମୁସ୍ତାକ ନଓ୍ୱାଜ ଉଭୟ ବ୍ୟାଟ୍ ଏବଂ ବଲ ପାଇଁ ପରଫେକ୍ଟ ବୋଲି କହିଥିଲେ । ଏହାପରେ ହାଫିଜ୍ ନଓ୍ୱାଜଙ୍କ ବ୍ୟାଟିଂ କିମ୍ବା ବୋଲିଂ କାହାକୁ ଅଧିକ ଫୋକସ କରାଯିବା ଦରକାର ବୋଲି ପଚାରିଥିଲେ । ଯାହାର ଉତ୍ତରରେ ମୁସ୍ତାକ ପାଟି କରି ସେ ଉଭୟରେ ଫିଟ୍ ବୋଲି ପ୍ରକାଶ କରିଥିଲେ । ଯାହାପରେ ହାଫିଜ୍ ନଓ୍ୱାଜଙ୍କୁ କାହିଁକି ୫ ନମ୍ବରରେ ବ୍ୟାଟିଂ କରିବାକୁ ଦିଆଯାଉନି ବୋଲି କହିଥିଲେ । ଏହା କହୁଥିବା ସମୟରେ ଦୁଇ ପୂର୍ବତନ ଖେଳାଳି ପରସ୍ପର ପ୍ରତି ଉତ୍ତେଜିତ ଆଭିମୁଖ୍ୟ ଦେଖାଉଥିଲେ ।

ସୂଚନାଯୋଗ୍ୟ, ପ୍ରଥମ ମ୍ୟାଚ୍ ବାତିଲ ଏବଂ ଦ୍ୱିତୀୟ ମ୍ୟାଚ୍ ପରାଜୟ ପରେ ତୃତୀୟ ମୁକାବିଲାରେ ଦଳ ଶ୍ରୀଲଙ୍କାକୁ ଭେଟିବ । ତେବେ ସେମିକୁ ଯିବା ଏବେ ଦଳ ପାଇଁ କଷ୍ଟକର । ଯଦି ପାକ୍ ଶ୍ରୀଲଙ୍କାକୁ ପରାସ୍ତ କରେ ଏବଂ ଅନ୍ୟ ତିନି ଦଳ କମ୍ ରନ୍ ରେଟରେ ଗୋଟିଏ ହିଁ ମ୍ୟାଚ୍ ଜିତନ୍ତି ତେବେ ଯାଇ ପାକ୍ ସେମିକୁ ଯାଇପାରେ ।