ନୂଆଦିଲ୍ଲୀ: ହରିୟାଣା, ମହାରାଷ୍ଟ୍ର ଓ ଦିଲ୍ଲୀ ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ  କଂଗ୍ରେସ ନିଜର ସଂଗଠନସ୍ତରରେ ପରିବର୍ତ୍ତନ ଆରମ୍ଭ କରି ଦେଇଛି। କଂଗ୍ରେସ ଗତ ୩ ଦିନ ଭିତରେ ୧୩ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ପ୍ରଭାରୀ ବଦଳାଇବା ସହ ଅନେକ ରାଜ୍ୟରେ ନୂଆ ସଭାପତି ନିଯୁକ୍ତ କରିଛି। ଏଥିରେ ପାର୍ଟି ଅନୁଭବୀ ଓ ଅଭିଜ୍ଞ ନେତାଙ୍କୁ ଦାୟିତ୍ଵ ଦେବା ସହିତ ଯୁବ ଚେହେରାଙ୍କୁ ମଧ୍ୟ ବିଶେଷ ଗୁରୁତ୍ଵ ଦିଆଯାଇଛି। ଏହିପରି କଂଗ୍ରେସ ସଂଗଠନରେ ହେଉଥିବା ପରିବର୍ତ୍ତନରେ ରାହୁଲ ଗାନ୍ଧୀଙ୍କ ଛାପ ଦେଖିବାକୁ ମିଳିଛି। କାରଣ ଯୁବ ବର୍ଗଙ୍କୁ ସୁଯୋଗ ଦିଆଯିବା ସହ ଦଳିତ, ଓବିସି ଓ ସଂଖ୍ୟାଲଘୁ ସମାଜର ନେତାଙ୍କୁ ପ୍ରାଧ୍ୟାନ୍ୟ ଦିଆଯାଇଛି। ଏହି ପରି ରାହୁଲ ଗାନ୍ଧୀ ସାମାଜିକ ନ୍ୟାୟ ଏଜେଣ୍ଡାକୁ ଧାର ଦେବା ପାଇଁ କଂଗ୍ରେସ ସଂଗଠନରେ ସାମାଜିକ ନ୍ୟାୟର ଅଭିଯାନ ଆରମ୍ଭ କରିଛି।

Also read: ମୋଦିଙ୍କୁ ଥରୁରଙ୍କ ତାରିଫ ହଜମ କରିପାରିଲାନି କଂଗ୍ରେସ୍ , ଜାଣନ୍ତୁ କ’ଣ କହିଲେ ଜୟରାମ ରମେଶ?

କଂଗ୍ରେସ ୨ ରାଜ୍ୟର ସାଧାରଣ ସଂପାଦକ ଓ ୯ ରାଜ୍ୟର ପ୍ରଭାରୀ ନିଯୁକ୍ତ କରିଛି। ୯ଟିରୁ ୬ ରାଜ୍ୟର ପ୍ରଭାରୀ ବଦଳା ଯାଇଛି। ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କୁ କଂଗ୍ରେସର ସାଧାରଣ ସଂପାଦକ ପଦରେ ନିଯୁକ୍ତ କରାଯିବା ସହ ପଞ୍ଜାବର ପ୍ରଭାରୀ ଦାୟିତ୍ଵ ଦିଆଯାଇଛି। କଂଗ୍ରେସର ସଙ୍ଗଠନାତ୍ମକ ପରିବର୍ତ୍ତନରେ ରାହୁଲ ଗାନ୍ଧୀଙ୍କ ରାଜନୈତିକ ଛାପ ଦେଖିବାକୁ ମିଳିଛି। ବିଶେଷ କରି ତାଙ୍କର ତିନି ଘନିଷ୍ଠ  ସହଯୋଗୀଙ୍କୁ ପ୍ରମୁଖ ଦାୟିତ୍ଵ ଦିଆଯାଇଛି। ଏହିପରି ପ୍ରିୟଙ୍କା ଗାନ୍ଧୀଙ୍କ ଘନିଷ୍ଠ ନେତାଙ୍କୁ ମଧ୍ୟ ସଂଗଠନରେ ସ୍ଥାନ ମିଳିଛି।

କଂଗ୍ରେସ ସଂଗଠନରେ ବଡ଼ ପରିବର୍ତ୍ତନ

କଂଗ୍ରେସ ସଂଗଠନରେ ପରିବର୍ତ୍ତନ କରି ରଜନୀ ପାଟିଲଙ୍କୁ ହିମାଚଳ ପ୍ରଦେଶ   ଓ ଚଣ୍ଡିଗଡ଼ର ପ୍ରଭାରୀ ଭାବେ ନିଯୁକ୍ତ କରିଛି। ବିକେ ହରିପ୍ରସାଦଙ୍କୁ ହରିୟାଣା, ହରିଶ ଚୌଧୁରୀଙ୍କୁ ମଧ୍ୟ ପ୍ରଦେଶ, ଗିରିଶ ଚୋଡ଼ନକରଙ୍କୁ ତାମିଲନାଡୁ ଓ ପୁଡୁଚେରୀର ପ୍ରଭାରୀ ଦାୟିତ୍ଵ ଦିଆଯାଇଛି। ଏହିପରି ଅଜୟ କୁମାର ଅଲ୍ଲୁଙ୍କୁ ଓଡ଼ିଶା, କେ ରାଜୁଙ୍କୁ ଝାଡ଼ଖଣ୍ଡ, ମୀନାକ୍ଷୀ ନଟରାଜନଙ୍କୁ ତେଲେଙ୍ଗାନା, ସପ୍ତଗିରି ଉଲାକାଙ୍କୁ ମଣିପୁର, ତ୍ରିପୁରା, ସିକ୍କିମ ଓ ନାଗାଲାଣ୍ଡ, କୃଷ୍ଣ ଅଲ୍ଲାବରୁଙ୍କୁ ବିହାରର ପ୍ରଭାରୀ ଭାବେ ନିଯୁକ୍ତ କରାଯାଇଛି। ଭୂପେଶ ବଘେଲଙ୍କୁ ଜମ୍ମୁ-କାଶ୍ମୀର ଓ ସୈୟଦ ନସୀର ହୁସେନଙ୍କୁ ଲଦାଖର ପ୍ରଭାରୀ କରିଛି।

କଂଗ୍ରେସ ନିଜର କିଛି ପ୍ରଭାରୀଙ୍କ କାମ ସମୀକ୍ଷା କରିବା ପରେ ହଟାଇ ଦେଇଛି। ଏହି ଅଦଳବଦଳରେ ଦୀପକ ବାବରିଆ, ମୋହନ ପ୍ରକାଶ, ଭରତ ସିଂ ସୋଲାଙ୍କି, ରାଜୀବ ଶୁକ୍ଳା, ଅଜୟ କୁମାର ଓ ଦେବେନ୍ଦ୍ର ଯାଦବଙ୍କ ସହିତ ଅନେକ ବରିଷ୍ଠ ନେତାଙ୍କୁ ସଂଗଠନରୁ ଛୁଟି ଦିଆଯାଇଛି। ଦୀପକ ବାବରିଆ ଯାହାଙ୍କୁ ହରିୟାଣାର ପ୍ରଭାରୀ ଦାୟିତ୍ଵ ଦିଆଯାଇଥିଲା, ତାଙ୍କୁ ନିର୍ବାଚନ ଫଳାଫଳ ପରେ ହଟାଇ ଦିଆଯାଇଛି।

Also read: କେରଳ କ୍ୟାଡର IAS, ରାମ ମନ୍ଦିର ଟ୍ରଷ୍ଟରେ କେନ୍ଦ୍ରର ପ୍ରତିନିଧୀ ରହିସାରିଛନ୍ତି ନୂଆ ସିଇସି

ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଭୂପେଶ ବଘେଲ ଓ କର୍ଣ୍ଣାଟକର ବରିଷ୍ଠ ନେତା ବିକେ ହରିପ୍ରସାଦଙ୍କୁ ସଂଗଠନକୁ ପୁଣି ଥରେ ଫେରାଇ ନିଆଯାଇଛି। ବଘେଲଙ୍କୁ ପଞ୍ଜାବର ପ୍ରଭାରୀ ଓ ହରିପ୍ରସାଦଙ୍କୁ ହରିୟାଣାର ପ୍ରଭାରୀ ଦାୟିତ୍ଵ ଦିଆଯାଇଛି। ବଘେଲ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ଘନିଷ୍ଠ ଭାବେ ପରିଚିତ। ନିର୍ବାଚନ ପରିଚାଳନାରେ ବଘେଲଙ୍କ ବିଶେଷ ଅଭିଜ୍ଞତା ରହିଛି। ହରିପ୍ରସାଦ ପାର୍ଟିର ପୁରୁଣା ବିଶ୍ଵସ୍ତ ବ୍ୟକ୍ତି। ଏହା ବ୍ୟତୀତ କଂଗ୍ରେସର ଭବିଷ୍ୟତରେ ନେତୃତ୍ଵ ନେବାକୁ ଥିବା ନେତାଙ୍କୁ ପ୍ରସ୍ତୁତ କରୁଥିବା ଏହି ପରିବର୍ତ୍ତନରୁ ଆଭାସ ମିଳିଛି। ସୈୟଦ ନସୀର ହୁସେନ, ଅଲ୍ଲାବରୁ ଓ ସପ୍ତଗିରି ପରି ଯୁବ ନେତା ହରିଶ ଚୌଧୁରୀ, ଅଜୟ କୁମାର ଲଲ୍ଲୁ, ଗିରିଶ ଚୋଣ୍ଡକର ଓ ରଜନୀ ପାଟିଲଙ୍କ ପରି ବରିଷ୍ଠ ନେତା ଏହି ତାଲିକାରେ ସାମିଲ।