ଭାରତର ସବୁଠୁ ଦାମୀ କାର୍ ନମ୍ବର, କୋଟିଏରୁ ଅଧିକ ଟଙ୍କାରେ ହେଲା ନିଲାମ

ନୂଆଦିଲ୍ଲୀ, ୨୮/୧୧: ସବୁଠାରୁ ଦାମୀ ଗାଡି ନମ୍ବର । ହଜାରେ କି ଲକ୍ଷେ ନୁହେଁ ବରଂ କୋଟି କୋଟି ଟଙ୍କା । ହରିୟାଣାର ଏକ କାର୍ ରେଜିଷ୍ଟ୍ରେସନ ନମ୍ବର ବିକ୍ରିକୁ ନେଇ ସାରା ଦେଶରେ ଚର୍ଚ୍ଚା ଜୋର ଧରିଛି । କାରଣ ହରିୟାଣାରେ ଏକ କାରର ରେଜିଷ୍ଟ୍ରେସନ ନମ୍ବର ଏକ କୋଟି ୧୭ ଲକ୍ଷ ଟଙ୍କାରେ ବିକ୍ରି ହୋଇଛି ।

ଗତ ନଭେମ୍ବର ୨୬ ତାରିଖରେ ହରିୟାଣାରେ ଭିଆଇପି ଫ୍ୟାନ୍ସି ନମ୍ବର ପ୍ଲେଟର ଅନଲାଇନ୍ ବିକ୍ରି ହେଉଥିଲା । ହଜାର ହଜାର ଗ୍ରାହକ ନମ୍ବର ପ୍ଟେଟ୍ ପାଇଁ ଆପ୍ଲାଏ କରିଥିଲେ । ଯାହା ପରେ ନିଲାମି ପ୍ରକ୍ରିୟା ଆରମ୍ଭ ହୋଇଥିଲା । ସମ୍ପୂର୍ଣ୍ଣ ଭାବେ ଅନଲାଇନରେ ନିଲାମୀ ପ୍ରକ୍ରିୟାର ସମ୍ପାଦନ ହୋଇଥିଲା ।

ନିଲାମିରେ ସାମିଲ ଥିବା ନମ୍ବର ମଧ୍ୟରୁ ଅଧିକ ଚର୍ଚ୍ଚାରେ ରହିଥିଲା ଏଚଆର୮୮ବି ୮୮୮୮ ନମ୍ବର । ଏହାକୁ ହାସଲ କରିବା ପାଇଁ ୪୫ ଜଣ ଆବେଦନ କରିଥିଲେ । ନମ୍ବରର ପ୍ରାରମ୍ଭିକ ମୂଲ୍ୟକୁ ୫୦ ହଜାର ଟଙ୍କା ରଖାଯାଇଥିଲା । ଦିନ ୧୨ଟା ସୁଦ୍ଧା ନିଲାମି ଦର ୮୮ ଲକ୍ଷ ଟଙ୍କା ଛୁଇଁଥିଲା । କିନ୍ତୁ ଶେଷରେ କୋଟିଏ ୧୭ ଲକ୍ଷ ଟଙ୍କାରେ ଏହାକୁ ଜଣେ ବ୍ୟକ୍ତି କ୍ରୟ କରିଥିଲେ । ନିଲାମି ଦିନର ପୂର୍ବ ସପ୍ତାହରେ ଏଚଆର ୨୨ ଡବଲୁ ୨୨୨୨ ନମ୍ବର ୩୭ ଲକ୍ଷ ୯୧ ହଜାର ଟଙ୍କାରେ ବିକ୍ରି ହୋଇଥିଲା ।

ଏଚଆର୮୮ବି୮୮୮୮ ନମ୍ବରର ଅର୍ଥ କ'ଣ ?

ଏଚଆର ହେଇଛି ରାଜ୍ୟର କୋଡ୍ । ଏହା ହରିୟାଣାକୁ ସୂଚାଇଥାଏ । ୮୮ ସ୍ଥାନୀୟ ଆରଟିଓ କିମ୍ବା ଜିଲ୍ଲା ବାବଦରେ ତଥ୍ୟ ପ୍ରଦାନ କରିଥାଏ । ଇଂରାଜୀ ଅକ୍ଷର ବି କୁ ଗାଡିର ସିରିଜ୍ କୋଡ୍ କୁହାଯାଏ । ସେହିପରି ୮୮୮୮ ଏକ ବିରଳ ସମାନ ଅଙ୍କ ଥିବା ନମ୍ବର । ସବୁଠାରୁ ବଡ କଥା ହେଲା ଯେ ନମ୍ବରେ ରହିଥିବା ଇଂରାଜୀ ଅକ୍ଷର ବି ୮ ଭଳି ଦେଖାଯାଏ ।