ନୂଆଦିଲ୍ଲୀ ୩୧/୧୨:  ଫ୍ଲପ୍, ଫ୍ଲପ, ଫ୍ଲପ୍ । ବାରମ୍ୱାର ଫେଲ୍ । ଲଗାତାର ଫ୍ଲପ୍ ଶୋ । ଗର୍ଜୁନି ବ୍ୟାଟ୍, ହେଉନି ରନ୍ । ନିରାଶ ହେଉଛନ୍ତି ଫ୍ୟାନ୍ । ଦିନେ ଛକା, ଚଉକାରେ କମ୍ପୁଥିବା ମୈଦାନ ଏବେ ଖାଲି । ଆଜ୍ଞା ହଁ ଆମେ କହୁଛୁ ସେହି କ୍ରିକେଟରଙ୍କ କଥା । ପିଚ୍ରେ ଛିଡାହେଲେ ହେଉଥିଲା ରନ୍ର ବର୍ଷା । ହେଲେ ଏବେ ଯେମିତି ନୀରବି ଯାଇଛି ତାଙ୍କ ବ୍ୟାଟ୍ । 

ଟିମ ଇଣ୍ଡିଆର କ୍ୟାପଟେନ ରୋହିତ ଶର୍ମା ଏବେ ଖରାପ ଫର୍ମ ଦେଇ ଗତି କରୁଛନ୍ତି। କ୍ୟାପ୍ଟେନ୍ସିରେ ତାଙ୍କର ଆଉ ସେହି ପୁରୁଣା ଚମକ ନାହିଁ। ନ୍ୟୁଜିଲ୍ୟାଣ୍ଡ ବିପକ୍ଷ ଘରୋଇ ସିରିଜରେ ଫ୍ଲପ୍ ହେବା ପରେ ରୋହିତ ଶର୍ମା ବର୍ଡର-ଗାଭାସ୍କର ଟ୍ରଫିରେ ବି ଫେଲ୍ । ଫଳରେ ତାଙ୍କର ଅବସର ନେଇ ସବୁଠି ଚର୍ଚ୍ଚା । ଏମିତିକି ପୂର୍ବତନ କ୍ରିକେଟର ବି ରିଟାୟରମେଣ୍ଟ ସପକ୍ଷରେ । ଏବେ ଅପେକ୍ଷା କେବଳ ଘୋଷଣାକୁ ।

କଣ ୧୦ ବର୍ଷ ତଳ କ୍ରିକେଟ ଇତିହାସର ହେବ ପୁନରାବୃତ୍ତି? ଧୋନୀଙ୍କ ପରେ କ୍ରିକେଟକୁ ଅଲବିଦା କହିବେ କି ରୋହିତ୍? କାରଣ ମେଲବୋର୍ଣ୍ଣ ଟେଷ୍ଟ ପରେ ଅବସର ନେଇଥିଲେ ଏମ୍‌.ଏସ୍ । ଏବେ ରୋହିତ ବି ସେଇ ବାଟରେ । ଚର୍ଚ୍ଚା ହେଉଛି କି, BGT ପରେ ଅବସର ନେବେ ରୋହିତ ଶର୍ମା । ଟି-୨୦ ବିଶ୍ୱକପ ବିଜୟ ପରେ ଏହି ଫର୍ମାଟକୁ ଅଲବିଦା କହିଥିଲେ ରୋହିତ । ଏବେ କେବଳ ଦିନିକିଆ ଓ ଟେଷ୍ଟ ଖେଳୁଛନ୍ତି । 

କିନ୍ତୁ ଟେଷ୍ଟରେ ରୋହିତଙ୍କ ସେହି ଜଲୱା ନାହିଁ। ପିଙ୍କ ବଲ ଟେଷ୍ଟରେ ଭାରତ ହାରିଥିବା ବେଳେ ଗାବାରେ କଷ୍ଟମଷ୍ଟେ ମ୍ୟାଚ୍‌ ଡ୍ର ହୋଇଥିଲା। ମେଲବର୍ଣ୍ଣ ଟେଷ୍ଟରେ ଭାରତ ୧୮୪ ରନରେ ଅଷ୍ଟ୍ରେଲିଆ ଠାରୁ ହାରିଛି। ଏହି ପରାଜୟ ଭାରତୀୟଙ୍କୁ ବେଶ ବାଧିଛି। କାରଣ ଆଜିର ପରାଜୟ ପରେ ଭାରତର ବିଶ୍ୱ ଟେଷ୍ଟ ଚାମ୍ପିୟନଶିପ ଫାଇନାଲ ଖେଳିବାର ସ୍ୱପ୍ନ ମଧ୍ୟ ଏକପ୍ରକାରର ଧୂଳିସାତ ହୋଇଯାଇଛି।

ଅଷ୍ଟ୍ରେଲିଆ ବିପକ୍ଷରେ ରୋହିତ ଏଯାଏଁ ଖେଳିଥିବା ୬ ଇନିଂସରେ ମାତ୍ର ୩୧ ରନ । ଅଷ୍ଟ୍ରେଲିଆ ଟୁରରେ ତାଙ୍କ ବ୍ୟାଟିଂ ହାର ରହିଛି ମାତ୍ର ୬ । କୌଣସି ଭ୍ରମଣକାରୀ ଅଧନାୟକଙ୍କ କ୍ଷେତ୍ରରେ ଏହା ସବୁଠୁ କମ୍ । 

 ରୋହିତ ଦଳର ଜଣେ ପ୍ରମୁଖ ସଦସ୍ୟ ଓ ଅଧିନାୟକ। ତାଙ୍କର ଏପରି ପ୍ରଦର୍ଶନ କେବଳ ଦଳ ପାଇଁ କ୍ଷତିକାରକ । ଖାଲି କ୍ଷତିକାରକ ନୁହେଁ ବରଂ ଚୂଡ଼ାନ୍ତ ଏକାଦଶରେ ରହୁଥିବାରୁ ଅନେକ ଉଦୀୟମାନ ତାରକା ବି ପାଉନାହାଁନ୍ତି ଚାନ୍ସ । ଏମିତି କିଛି ମତ ରଖିଛନ୍ତି କ୍ରିକେଟ ବିଷାରଦ । ଯୁକ୍ତି ବାଢୁଛନ୍ତି ରୋହିତ ଶର୍ମା ଟେଷ୍ଟରୁ ନେବାର ଆସିଗଲାଣି ସମୟ । କେବଳ ରୋହିତ ନୁହେଁ ବିରାଟଙ୍କ ଫର୍ମ ବି ଖରାପ୍ । 

ଚର୍ଚ୍ଚା, ଆଲୋଚନା ଅନେକ । ହେଲେ ରୋହିତଙ୍କ ମତ କିନ୍ତୁ ଏ ସପକ୍ଷରେ ଥିଲା ଅଲଗା । ନିଜ ଅବସର ସମ୍ପର୍କରେ ଓଲଟା ଉତ୍ତର ରଖିଥିଲେ ହିଟ୍ ମ୍ୟାନ୍ । ସେ ସିଡ୍‌ନୀରେ ଖେଳାଯିବାକୁ ଥିବା ଶେଷ ଟେଷ୍ଟରେ ଭାରତର କମାଣ୍ଡ ସମ୍ଭାଳିବେ ବୋଲି କରିଛନ୍ତି ସ୍ପଷ୍ଟ । ମ୍ୟାଚ ପରେ ରୋହିତ କହିଥିଲେ କି, “ମୁଁ ସେହି ଠାରେ ରହିଛି, ଯେଉଁଠାରେ ମୁଁ ଆଜି ରହିଛି। ଅତୀତରେ କ’ଣ ସବୁ ହୋଇଛି, ସେସବୁ ଭାବିବାର କିଛି କାରଣ ନାହିଁ। ନିଶ୍ଚିତ ଭାବେ କିଛି ମ୍ୟାଚ୍‌ର ରେଜଲ୍ଟ ଆମ ସପକ୍ଷରେ ଯାଇନାହିଁ। ଅଧିନାୟକ ହିସାବରେ ଏହା ନିରାଶଜନକ। ବ୍ୟାଟର ଭାବେ ବି କରିଛି ନିରାଶ । ମୁଁ ଅନେକ ଜିନିଷ ଚେଷ୍ଟା କରିଥିଲେ ହେଁ ଏହାର ରେଜଲ୍ଟ ମିଳିନାହିଁ। ଏସବୁ ବାଦ୍ ବି କଣ ହେବ ପ୍ରକୃତ ନିଷ୍ପତ୍ତି ତାକୁ ହିଁ ଅପେକ୍ଷା ।