ନୂଆଦିଲ୍ଲୀ ୯।୨: ଦିଲ୍ଲୀ ବିଧାନସଭା ନିର୍ବାଚନରେ ବିଜେପିର ବିଜୟ ପଛରେ ରାଷ୍ଟ୍ରୀୟ ସ୍ୱୟଂ ସେବକ ସଂଘ (ଆରଏସଏସ)ର ବଡ଼ ହାତ ରହିଛି। କୁହାଯାଉଛି ସଂଘ ଜାତୀୟ ରାଜଧାନୀର ପ୍ରଗତି ନିମନ୍ତେ ପ୍ରଭାବୀ ଓ ଉତ୍ତରଦାୟୀ ସରକାର ବାଛିବା ନିମନ୍ତେ ଭୋଟରଙ୍କୁ ପ୍ରଭାବିତ କରିଛି। ନିର୍ବାଚନ ନିମନ୍ତେ ସଂଘ ମୌନ ରୂପେ ଭୋଟର ସଚେତନତା ଅଭିଯାନ ଚଳାଇବା ସହ ଏଥି ପାଇଁ ଶହଶହ ବୈଠକ କରିଛି। ନିର୍ବାଚନରେ ବିଜେପିର ବିଜୟରୁ ଏ କଥା ସ୍ପଷ୍ଟ ହୋଇଛି ଯେ ସଂଘର ଅଭିଯାନ ସଫଳ ହୋଇଛି।
କୁହାଯାଉଛି ଆରଏସଏ ବୈଠକମାନଙ୍କରେ ଭୋଟରଙ୍କ ସମ୍ମୁଖରେ ଆବର୍ଜନାରୁ ମୁକ୍ତି, ଉତ୍ତମ ପାନୀୟ ଜଳ ଯୋଗାଣ, ସ୍ୱାସ୍ଥ୍ୟ ସେବା ଉପଲବ୍ଧତା, ବାୟୁ ପ୍ରଦୂଷଣରୁ ମୁକ୍ତି ଓ ଯମୁନା ନଦୀ ସଫେଇ ଭଳି ପ୍ରସଙ୍ଗ ସବୁ ରଖିଥିଲା। ଏହି ସବୁ ପ୍ରସଙ୍ଗ ମାଧ୍ୟମରେ ଜନତାଙ୍କୁ ବିଶ୍ୱାସ ଦିଆଯାଇଥିଲା ଯେ ବିଜେପି ଶାସନ ହିଁ ଦିଲ୍ଲୀରେ ବିକାଶ କରିପାରିବ। ସୂତ୍ର ଅନୁସାରେ ସଂଘର ସ୍ୱୟଂ ସେବକମାନେ ଆମ ଆଦମୀ ପାର୍ଟିର ଦିଲ୍ଲୀ ଶାସନ ମଡେଲକୁ ନେଇ କରାଯାଉଥିବା ଅପପ୍ରଚାରକୁ ସମାପ୍ତ କରିଥିଲେ।
ଭ୍ରଷ୍ଟାଚାର ଓ ଆପର ୧୦ ବର୍ଷର ଶାସନ କାଳରେ ଦିଆ ଯାଇଥିବା ପ୍ରତିଶ୍ରୁତି ପୁରଣ ହୋଇ ନଥିବାର ପ୍ରସଙ୍ଗ ମଧ୍ୟ ସାଧାରଣ ଜନତାଙ୍କ ଆଗରେ ରଖା ଯାଇଥିଲା। ଦିଲ୍ଲୀରେ ଅବୈଧ ଅପ୍ରବାସୀଙ୍କ ପ୍ରସଙ୍ଗରେ ମଧ୍ୟ ଚର୍ଚ୍ଚା ହୋଇଥିଲା। ଆରଏସଏସର ଏକ ସୂତ୍ର ଅନୁସାରେ କେବଳ ଦିଲ୍ଲୀ ଦ୍ୱାରକାରେ ୫୦୦ଟି ବୈଠକ ହୋଇଥିଲା। ବୈଠକରେ ସ୍ୱୟଂସେବକମାନେ ଲୋକଙ୍କୁ ପ୍ରଭାବିତ କରିବା ପ୍ରସଙ୍ଗରେ ଚର୍ଚ୍ଚା କରିଥିଲେ। ସେମାନେ କୌଣସି ରାଜନୈତିକ ଦଳ ସମର୍ଥନରେ ଭୋଟ ଦେବା କଥା ନକହି ଭୋଟରଙ୍କୁ ସେଚେତନ କରିଥିଲେ।
ଆରଏସଏସ ନିର୍ବାଚନର ମାସକ ପୂର୍ବରୁ ଏହି ଅଭିଯାନ ଆରମ୍ଭ କରିଥିଲା। ଏଥିରେ ରାଜଧାନୀ ଦିଲ୍ଲୀର ବସ୍ତିରେ ଓ ଅନଧିକୃତ କଲୋନୀରେ ଛୋଟଛୋଟ ସମୂହର ବୈଠକ ସବୁ ହୋଇଥିଲା। ପୂର୍ବରୁ ଏହି ସବୁ ସ୍ଥାନରୁ ଆପ ପ୍ରତି ବେଶ୍ ଜନସମର୍ଥନ ଥିଲା। ଆରଏସଏସ ଏଠାରେ କାମ କରୁଥିବା ସଙ୍ଗଠନଙ୍କ ସହିତ ହାତ ମିଳାଇଥିଲା ଓ ଅଭିଯାନରେ ସେମାନଙ୍କ ସହଯୋଗ ନେଇଥିଲା। ସୂତ୍ର ଅନୁସାରେ ଆରଏସଏସ ଶ୍ରେୟ ନେବା ପାଇଁ କାମ କରେନି, ବରଂ ପରଦା ପଛରେ ରହି କାମ କରିବାରେ ବିଶ୍ୱାସ କରେ। ଦିଲ୍ଲୀ ବିଧାନସଭା ନିର୍ବାଚନରେ ମଧ୍ୟ ଆରଏସଏସ ପର୍ଦ୍ଦା ପଛରେ ରହି ବିଜୟର ପଟକଥା ଲେଖିଥିଲା। ଫଳରେ ୨୭ ବର୍ଷ ପରେ ଦିଲ୍ଲୀରେ ପୁଣି ବିଜେପିର ସରକାର ହୋଇ ପାରିଛି।
