ନୂଆଦିଲ୍ଲୀ: ୟୁକ୍ରେନ ରାଷ୍ଟ୍ରପତି ଭଲୋଡିମିର ଜେଲେନସ୍କି ଲଗାତାର ରୁଷ ତରଫରୁ ୟୁରୋପ ପାଇଁ ବଢୁଥିବା ବିପଦ କଥା ଉଠାଉଛନ୍ତି । ୟୁକ୍ରେନ ରାଷ୍ଟ୍ରପତି ଦାବି କରିଛନ୍ତି ଯେ ରୁଷର ନଜର କେବଳ ୟୁକ୍ରେନ ଉପରେ ନୁହେଁ ବରଂ ପୂରା ୟୁରୋପ ଉପରେ ଅଛି । ଯଦି ୟୁକ୍ରେନ ଶାନ୍ତି ବୁଝାମଣା ରୁଷ ସର୍ତ୍ତରେ କରାଯାଏ ତେବେ ରୁଷର ମନୋବଳ ଆହୁରି ଅଧିକ ହେବ । ଏହା ପୂର୍ବରୁ ଶାନ୍ତି ବୁଝାମଣାକୁ ନେଇ ଜେଲେନସ୍କି କହିଥିଲେ ଯେ ୟୁକ୍ରେନ ଏପରି କୌଣସି ବୁଝାମଣାରେ ରାଜି ହେବନି, ଯେଉଁଥିରେ ତାକୁ ସାମିଲ କରାଯାଇନଥିବ ।
ଏନବିସି ନ୍ୟୁଜକୁ ଦେଇଥିବା ସାକ୍ଷାତକାରରେ ଜେଲେନସ୍କି କହିଛନ୍ତି ଯେ ମୋ ମତରେ ୟୁରୋପକୁ ଆମେରିକାର ସୁରକ୍ଷା ଗ୍ୟାରେଣ୍ଟି ଦରକାର । ଯଦି ଏପରି ନହୁଏ ତେବେ ରୁଷଠାରୁ ବିପଦ ଜାରି ରହିବ । ପୁଟିନଙ୍କ ନଜର କେବଳ ୟୁକ୍ରେନ ଉପରେ ନୁହେଁ ବରଂ ୟୁରୋପକୁ ହତେଇବା ଉପରେ ବି ଅଛି । ଯଦି ୟୁରୋପ ବିରୋଧରେ ଯୁଦ୍ଧ ଅନୁମତି ଦିଆଯାଇ ତେବେ ସେ ଏଥିରେ ଆଦୌ ବିଳମ୍ୱ କରିବ ନାହିଁ ।
ୟୁକ୍ରେନ ରାଷ୍ଟ୍ରପତି କହିଛନ୍ତି ଯେ ଆମେରିକାକୁ ଛାଡ଼ିଲେ ନାଟୋର କୌଣସି ଅସ୍ତିତ୍ୱ ନାହିଁ । ଯଦି ଆମେରିକା ନାଟୋରୁ ବାହାରି ଯାଏ ତେବେ ଏହାର ଅର୍ଥ ନାଟୋ ଅନ୍ତିମ ନିଶ୍ୱାସ ନେଇସାରିଛି ଏବଂ ପୁଟିନ ସାରା ୟୁରୋପ ଉପରେ କବଜା କରିବା ନେଇ ନିଜର ଦୀର୍ଘ ବର୍ଷର ପୁରୁଣା ସ୍ୱପ୍ନକୁ ପୂରା କରିବା ପାଇଁ ପ୍ରସ୍ତୁତ ହୋଇଯିବ ।
ରାଷ୍ଟ୍ରପତି ଜେଲେନସ୍କିଙ୍କ ଏହି ଟିପ୍ପଣୀ ଏପରି ସମୟରେ ଆସିଛି, ଯେତେବେଳେ ଆମେରିକା ପ୍ରତିରକ୍ଷା ସଚିବ ପିଟ୍ ହେଗସେଥ ଆମେରିକାର ଭବିଷ୍ୟତ ଯୋଜନା ଉପରେ ଆଲୋକପାତ କରିଥିଲେ । ଏକ ସମ୍ମିଳନୀରେ ପିଟ୍ କହିଥିଲେ ଯେ ଯୁଦ୍ଧ ଶେଷ ହେବା ପରେ ଆମେରିକାର ସୁରକ୍ଷା ଗ୍ୟାରେଣ୍ଟି, ଶାନ୍ତି ସେନାରେ ଭାଗିଦାରୀ ଏବଂ ୟୁକ୍ରେନକୁ ନାଟୋରେ ସାମିଲ କରିବା ଉପରେ ବିଚାର କରାଯାଉ ନାହିଁ । ତେବେ ଆମେରିକୀୟ ଅଧିକାରୀ ନିଜର ଏହି ଟିପ୍ପଣୀ ୨୪ ଘଣ୍ଟା ଭିତରେ ହିଁ ଫେରାଇ ନେଇଥିଲେ । ଏଥିରୁ ଏହା ପ୍ରମାଣିତ ହୋଇଛି ଯେ ଆମେରିକାର ନିଜ କଥାରେ ହିଁ ସ୍ଥିରତା ନାହିଁ ।
