ନୂଆଦିଲ୍ଲୀ ୦୭/୦୧: ଚୀନରେ ଏଚଏମପିଭି ହାହାକାର । ୧୦ ଦିନରେ ୫ ଗୁଣା ବଢ଼ିଲାଣି ଆକ୍ରାନ୍ତଙ୍କ ସଂଖ୍ୟା । ଦିନକୁ ଦିନ ଖରାପ ହେଉଛି ସ୍ଥିତି । ଗତ ୧୦ ଦିନରେ ଏଚଏମପିଭି ମାମଲା ୫୨୯% ବୃଦ୍ଧି ପାଇଛି । ଭୂତାଣୁ ପାଇଁ ଚୀନରେ ଲୋକଙ୍କ ମଧ୍ୟରେ ଦେଖାଦେଇଛି ଆତଙ୍କ । ଆଣ୍ଟିଭାଇରାଲ୍ ଔଷଧର ଅଭାବ ସୃଷ୍ଟି । ବଜାରରେ ଔଷଧର କଳା ବଜାରୀ ଚାଲିଛି । ପରିସ୍ଥିତି ଏମିତି ହୋଇଛି, ୪୧ ଡଲାରରେ ବିକ୍ରି ହେଉଛି ମେଡିସିନ୍ । ଭୂତାଣୁ ସଂକ୍ରମଣ ବୃଦ୍ଧିକୁ ନେଇ ଚିନ୍ତାପ୍ରକଟ କରିଛି ବିଶ୍ବ ସ୍ବାସ୍ଥ୍ୟ ସଂଗଠନ । 

ଚୀନଠାରୁ ନୂଆ ଭୂତାଣୁ ନେଇ ତଥ୍ୟ ମାଗିଛି ବିଶ୍ବ ସ୍ବାସ୍ଥ୍ୟ ସଂଗଠନ । ଏପର୍ଯ୍ୟନ୍ତ ଏଚଏମପିଭି ମାମଲାର ତଥ୍ୟ ଲୁଚାଉଥିବା ଅଭିଯୋଗ ହୋଇଛି । ବଢ଼ୁଥିବା ସଂକ୍ରମଣକୁ ଦେଖି ଉହାନରେ ସ୍କୁଲ ବନ୍ଦ । ପିଲାମାନଙ୍କ ସଂକ୍ରମଣ ବଢୁଥିବାରୁ ଘରୁ ନବାହାରିବାକୁ ଜାରି ହୋଇଛି କଟକଣା । ଆଉ ଚୀନରେ ସୃଷ୍ଟି ଏହି ଭୂତାଣୁ ଏବେ ସମଗ୍ର ବିଶ୍ୱକୁ ବ୍ୟାପିଲାଣି । ଭାରତ, ମାଲେସିଆ, ଜାପାନ, କାଜାଖସ୍ତାନରେ ବି ବଢିଛି ମାମଲା । ସଂକ୍ରମଣ ଏବେ ବ୍ରିଟେନକୁ ଓ ସ୍ପେନକୁ ବ୍ୟାପିଛି । ସ୍ପେନ ଡାକ୍ତରଖାନା ବାହାରେ ରୋଗୀଙ୍କ ଲମ୍ବା ଧାଡି ଦେଖିବାକୁ ମିଳୁଛି । ସ୍ପେନର ଆଲିକାଣ୍ଟେରେ ୬୦୦ରୁ ଅଧିକ 'ଇନଫ୍ଲୁଏଞ୍ଜା ଏ'ର ମାମଲା ଚିହ୍ନଟ ହୋଇଛି । 

ଏପଟେ ଭାରତରେ ବି ସଂଗୀନ ହେଉଛି ସ୍ଥିତି । ୫ ଟି ରାଜ୍ୟରେ ୮ ଟି ମାମଲା ନଜର ଆସିଛି । ଚୀନର ସ୍ଥିତି ଉପରେ ତୀକ୍ଷଣ ନଜର ରଖାଯାଇଛି। ଶ୍ବାସ ଜନିତ ଯେକୌଣସି ରୋଗର ମୁକାବିଲା ପାଇଁ ଭାରତ ସରକାର ସମ୍ପୂର୍ଣ୍ଣ ପ୍ରସ୍ତୁତ ରହିଛନ୍ତି। ଭୂତାଣୁ ବାବଦରେ ଅପଡେଟ୍ ଦେବାକୁ ବିଶ୍ବ ସ୍ବାସ୍ଥ୍ୟ ସଂଗଠନ-WHOକୁ ଅନୁରୋଧ କରାଯାଇଥିବା ସୋସିଆଲ୍ ମିଡିଆ ଏକ୍ସରେ ସୂଚନା ଦେଇଛି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ। ଏଥିସହ ସ୍ପଷ୍ଟ କରାଯାଇଛି ଯେ, ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ଦେଶର ବିଭିନ୍ନ ସ୍ଥାନରେ ସର୍ଭେଲାନ୍ସ ଜାରି ରହିଛି। ଆଇସିଏମଆର ଓ ଆଇଡିଏସପିର ତଥ୍ୟ ମୁତାବକ ଦେଶରେ ଇନଫ୍ଲୁଏଞ୍ଜା ଏବଂ ଫୁସଫୁସ ସଂକ୍ରମଣ ରୋଗୀ ସଂଖ୍ୟାରେ ଅସ୍ବାଭାବିକ ବୃଦ୍ଧି ଘଟିନି । ତେଣୁ ନୂଆ ଭାଇରସ୍ ପାଇଁ ଭୟଭୀତ ନହୋଇ ସତର୍କ ରହିବାକୁ ପରାମର୍ଶ ଦିଆଯାଇଛି।

୫ ବର୍ଷ ପରେ ଚୀନରେ ଦେଖାଦେଇଥିବା ଏହି ଭାଇରସକୁ ନେଇ ସାରା ବିଶ୍ବରେ ଛନକା ପଶିଲାଣି। HMPV ସଂକ୍ରମିତ ଚୀନ ବ୍ୟତୀତ ବର୍ତ୍ତମାନ ସୁଦ୍ଧା ଆଉ କେଉଁଠି ଦେଖାଦେଇନି। ୨୦୨୪ ଡିସେମ୍ବର ୧୬ ପରଠୁ ଅଚାନକ ଏହି ସଂକ୍ରମଣ ଚୀନରେ କାୟା ମେଲାଇଛି। ଏହାର ଲକ୍ଷଣ ମଧ୍ୟ ଫ୍ଲୁ ଓ କୋଭିଡ୍ ଭଳି କୁହାଯାଉଛି। କୋଭିଡ ପରି ଏହି ରୋଗର ଲକ୍ଷଣ ରହିଥିବା ବେଳେ ଏହାକୁ ନେଇ କୌଣସି ଟ୍ରାଭେଲ ଗାଇଡ ଲାଇନ ଜାରି କରାଯାଇନାହିଁ।