ଚଢେଇ ଦେହରେ ଲାଗିଛି ଜିପିଏସ, ନୌସେନା ବେସ୍ ପାଖରୁ ଧରିଲା ପୋଲିସ

ନୂଆଦିଲ୍ଲୀ, ୧୮/୧୨: ଚଢେଇ ଦେହରେ ଲାଗିଛି ଜିପିଏସ । ତାହା ପୁଣି ଚାଇନାର । ଚାଇନାରୁ ଭାରତକୁ ଆସିଥିବା ଏକ ପକ୍ଷୀକୁ କର୍ଣ୍ଣାଟକ ଉପକୂଳରୁ ଧରାଯାଇଛି । ଉତ୍ତର କନ୍ନଡ ଜିଲ୍ଲାର କରଓ୍ୱାର ଉପକୂଳରେ ଏହା ଆହତ ଅବସ୍ଥାରେ ପଡିଥିଲା । ଯାହାକୁ ଉଦ୍ଧାର କରାଯାଇଛି । ତେବେ ଜିପିଏସ ଲାଗିଥିବାରୁ ସୁରକ୍ଷା ବ୍ୟବସ୍ଥାକୁ ନେଇ ଅନେକ ପ୍ରଶ୍ନ ଉଠୁଛି ।

ମିଡିଆ ରିପୋର୍ଟ ଅନୁସାରେ, ମଙ୍ଗଳବାର କର୍ଣ୍ଣାଟକ ମେରାଇନ୍ ପୋଲିସ ରବିନ୍ଦ୍ରନାଥ ଟାଗୋର ବିଚରେ ଏକ ସିଗଲ୍ ଚଢେଇକୁ ଉଦ୍ଧାର କରିଥିଲା । ଏହା ଏକ ବିଦେଶୀ ପକ୍ଷୀ । ଯାହା ଶରୀରରେ ଏକ ଜିପିଏସ ଲାଗିଥିଲା । ତେବେ ପକ୍ଷୀଟି ଆହତ ଅବସ୍ଥାରେ ଥିଲା । ତା ଶରୀରରେ ଏକ ଛୋଟ ସୋଲାର ପ୍ୟାନେଲ୍ ରହିଛି । ଏହାସହ ଇମେଲ୍ ଆଡ୍ରେସ୍ ମଧ୍ୟ ରହିଛି । ଯଦି କେହି ଚଢେଇକୁ ପାଉଛନ୍ତି ସେହି ଇମେଲରେ ଯୋଗାଯୋଗ କରିବା ପାଇଁ ମଧ୍ୟ ପକ୍ଷୀର ଶରୀରରେ ଉଲ୍ଲେଖ ଅଛି ।

ପୋଲିସ କହିଛି ଯେ, ଯେଉଁ ଇମେଲ୍ ଆଡ୍ରେସ ରହିଛି ତାହା ଚାଇନାର ଏକ ଅନୁଷ୍ଠାନର ଅଟେ । ଏଥିରେ ପରିବେଶ ଉପରେ ଗବେଷଣା କରାଯାଏ । ଅଧିକ ତଥ୍ୟ ପାଇଁ ସେମାନେ ଇମେଲରେ ଯୋଗାଯୋଗ କରିବାକୁ ପ୍ରୟାସ କରୁଛନ୍ତି । କିନ୍ତୁ ପକ୍ଷୀକୁ ତନ୍ନ ତନ୍ନ କରି ଯାଞ୍ଚ କରାଯାଉଛି । ଏହାକୁ କୌଣସି ପ୍ରକଳ୍ପରେ ବ୍ୟବହାର କରାଯାଉଥିଲା । ଏବେ ବନ ବିଭାଗକୁ ଏହାକୁ ହସ୍ତାନ୍ତର କରାଯାଇଛି ।

ତେବେ କର୍ଣ୍ଣାଟକ ଉପକୂଳରେ ନୌସେନାର ଏକ ବେସ୍ ରହିଛି । ତେଣୁ ଜିପିଏସ ଲାଗିଥିବା ଚଢେଇ ଠାବ ପରେ ସୁରକ୍ଷା ବ୍ୟବସ୍ଥାକୁ ଆହୁରି କଡାକଡି କରାଯାଇଛି ।