ଅନ୍ତରାଷ୍ଟ୍ରୀୟ କ୍ରିକେଟକୁ ଅଲବିଦା କଲେ ଉସମାନ ଖାଓ୍ୱାଜା, ସିଡନୀରେ ଖେଳିବେ ଶେଷ ଟେଷ୍ଟ୍

ସିଡନୀ, ୦୨/୦୧ : ଅଷ୍ଟ୍ରେଲିଆ ଦଳର ଷ୍ଟାର୍ ଓପନରଙ୍କ ସନ୍ନ୍ୟାସ । କ୍ରିକେଟକୁ ଅଲବିଦା କରିଛନ୍ତି ଓପନର ଉସମାନ ଖାଓ୍ୱାଜା । ସେ ଅନ୍ତରାଷ୍ଟ୍ରୀୟ କ୍ରିକେଟରୁ ଅବସର ନେବାକୁ ଘୋଷଣା କରିଛନ୍ତି । ୩୯ ବର୍ଷୀୟ ଉସମାନ ଇଂଲଣ୍ଡ ବିପକ୍ଷରେ ଶେଷ ଥର ପାଇଁ ସିଡନୀ ଟେଷ୍ଟ ଖେଳିବେ । ଏହାପରେ ତାଙ୍କୁ ଆଉ ମଇଦାନରେ ଦେଖିବାକୁ ମିଳିବ ନାହିଁ ।

ସେ ଏବେସୁଦ୍ଧା ୮୭ଟି ଟେଷ୍ଟରେ ଅଷ୍ଟ୍ରେଲିଆ ପାଇଁ ପ୍ରତିନିଧିତ୍ୱ କରିଛନ୍ତି । ସମସ୍ତ ମୁକାବିଲାରେ ତାଙ୍କ ବ୍ୟାଟରୁ ୬୨୦୬ ରନ୍ ବାହାରିଛି । ଏଥିରେ ୧୬ଟି ଶତକ ସାମିଲ ଅଛି । ଅବସର ନେଇ ସେ ଏକ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି । ଏଥିରେ ତାଙ୍କ ପତ୍ନୀ ଏବଂ ସନ୍ତାନ ଉପସ୍ଥିତ ରହିଥିଲେ । ଦୀର୍ଘଦିନ ଧରି ସେ ଅବସର ବାବଦରେ ଚିନ୍ତା କରୁଥିବା ଏଥିରେ ପ୍ରକାଶ କରିଛନ୍ତି ।

ସେ କହିଛନ୍ତି ଯେ, ଆସେସ ଖେଳିବା ସମୟରେ ତାଙ୍କ ମନକୁ ଏହା ଶେଷ ସିରିଜ୍ ବୋଲି ଆସିଥିଲା । ପତ୍ନୀଙ୍କ ସହ ଏନେଇ ସେ ଆଲୋଚନା କରିଥିଲେ । ସିଡନୀରେ ମୁକାବିଲା ଖେଳି ଅବସର ନେବା ବହୁତ ଖୁସିର କଥା । ଦଳର ମୁଖ୍ୟ କୋଚ୍ ଆଣ୍ଡ୍ର୍ୟୁ ମାକଡୋନାଲ୍ଡ ସେ ଆହୁରି ଆଗକୁ ଖେଳନ୍ତୁ ବୋଲି ଚାହୁଁଥିଲେ । କିନ୍ତୁ ସେ ନିଜ ଅବସର ନିଷ୍ପତ୍ତିରେ ଅଟଳ ରହିଛନ୍ତି ।

ସେ ସ୍ୱୀକାର କରିଛନ୍ତି ଯେ, ଆସେସ ଆରମ୍ଭ ତାଙ୍କ ପାଇଁ ସହଜ ନଥିଲା । ଆଡିଲେଡ ଟେଷ୍ଟରେ ତାଙ୍କୁ ସ୍ଥାନ ମିଳିନଥିଲା । ତେଣୁ ସେ ଅବସର ନେବା କଥା ଅଧିକ ଗଭୀର ଭାବେ ଚିନ୍ତା କରିଥିଲେ । ତେବେ ଷ୍ଟିବ୍ ସ୍ମିଥଙ୍କ ସ୍ୱାସ୍ଥ୍ୟ ଖରାପ ହେଲା ପରେ ତାଙ୍କୁ ସୁଯୋଗ ମିଳିଥିଲା । ସେ ୮୨ ଏବଂ ୪୦ ରନର ପାଳି ଖେଳିଥିଲେ ।

ଅନ୍ତରାଷ୍ଟ୍ରୀୟ କ୍ରିକେଟରୁ ସନ୍ନ୍ୟାସ ନେଲା ପରେ ବି ସେ ଘରୋଇ ମ୍ୟାଚ୍ ଖେଳିବେ । ବିବିଏଲରେ ବ୍ରିସବେନ୍ ହିଟ୍ ପାଇଁ ଖେଳିବା ଜାରି ରଖିବେ । କ୍ୱୁଇନ୍ସଲ୍ୟାଣ୍ଡ୍ ପାଇଁ ମଧ୍ୟ ସେ ଖେଲିବେ ବୋଲି ପ୍ରକାଶ କରିଛନ୍ତି ।