delhi missing people 2026: ଦିଲ୍ଲୀରେ ମହିଳାଙ୍କ ନିଖୋଜ ମାମଲା ବଢ଼ିବା ରିପୋର୍ଟକୁ ଖାରଜ କଲା ପୁଲିସ, କହିଲା ସମ୍ପୂର୍ଣ୍ଣ ଗୁଜବ

ନୂଆଦିଲ୍ଲୀ:ନିକଟରେ ରାଜଧାନୀ ଦିଲ୍ଲୀରେ ଝିଅମାନଙ୍କର ନିଖୋଜ ସଂଖ୍ୟା ବଢ଼ୁଥିବାର ରିପୋର୍ଟ ସାମ୍ନାକୁ ଆସିଥିଲା। ୨୦୨୬ର ପ୍ରଥମ ୧୫ ଦିନରେ ଦିଲ୍ଲୀରେ ୮୦୭ ଜଣ ଲୋକ ନିଖୋଜ ହୋଇଛନ୍ତି ବୋଲି ବିଭିନ୍ନ ମିଡିଆରେ ରିପୋର୍ଟ ପ୍ରକାଶ ପାଇଥିଲା।

ଏବେ ଏହି ରିପୋର୍ଟ ଉପରେ ଦିଲ୍ଲୀ ପୁଲିସ ପକ୍ଷରୁ ପ୍ରତିକ୍ରିୟା ସାମ୍ନାକୁ ଆସିଛି। ଗୁରୁବାର ଦିଲ୍ଲୀ ପୁଲିସ ଏହି ରିପୋର୍ଟକୁ ଖାରଜ କରିଛି। ଏହି ଦାବି ସମ୍ପୂର୍ଣ୍ଣ ଭ୍ରମାତ୍ମକ, ଲୋକଙ୍କ ମଧ୍ୟରେ ଭୟ ସୃଷ୍ଟି କରିବା ପାଇଁ ଏହା ଅନ୍ଲାଇନ ପେଡ୍ ପ୍ରମୋସନ ଥିଲା। ଏଭଳି ଭାଇରାଲ ଦାବି କେଉଁଠୁ ପ୍ରଥମେ ସୃଷ୍ଟି ହୋଇଥିଲା ତାକୁ ଟ୍ରାକ୍ କରାଯାଇଛି ବୋଲି ଦିଲ୍ଲୀ ପୁଲିସ କହିଛି।

ଏ ନେଇ ଏକ ବିବୃତ୍ତି ଜାରି କରି ଦିଲ୍ଲୀ ପୁଲିସ କହିଛି “କିଛି ସୂଚନା ଅନୁଧ୍ୟାନ କରିବା ପରେ, ଆମେ ଜାଣିବାକୁ ପାଇଲୁ ଯେ ଦିଲ୍ଲୀରେ ନିଖୋଜ ଝିଅମାନଙ୍କ ସଂଖ୍ୟା ବୃଦ୍ଧି ପାଇବାର ପ୍ରଚାର ପଇସା ଦେଇ ମିଛ ପ୍ରଚାର କରାଯାଉଛି। ଆର୍ଥିକ ଲାଭ ପାଇଁ ଆତଙ୍କ ସୃଷ୍ଟି କରିବା ବରଦାସ୍ତ କରାଯିବ ନାହିଁ। ଆମେ ଏପରି ବ୍ୟକ୍ତିଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବୁ।” ସୋସିଆଲ୍ ମିଡିଆ ଏକ୍ସରେ ପୋଷ୍ଟ କରି ଏପରି କହିଛି ଦିଲ୍ଲୀ ପୁଲିସ।

ମିଡିଆ ରିପୋର୍ଟକୁ ଭ୍ରମାତ୍ମକ ବୋଲି କହିବା ସହିତ ଗତ ବର୍ଷ ତୁଳନାରେ ଚଳିତ ବର୍ଷ ନିଖୋଜ ମାମଲାରେ କୌଣସି ବୃଦ୍ଧି ହୋଇ ନାହିଁ। ଦିଲ୍ଲୀ ପୁଲିସ କୌଣସି ଅପଡେଟ୍ ଡାଟା ଜାରି କରି ନାହିଁ ବୋଲି କହିଛି। ଜଏଣ୍ଟ ପୋଲିସ କମିଶନର (ଲୋକସମ୍ପର୍କ) ସଞ୍ଜୟ ତ୍ୟାଗୀ ଏହି ରିପୋର୍ଟକୁ "ଗୁଜବ" ବୋଲି କହି ଖାରଜ କରି କହିବା ସହ ଏହି ଧାରା ପୂର୍ବ ବର୍ଷଗୁଡ଼ିକ ସହିତ ସମାନ ରହିପାରେ ଏମିତିକ କମ୍ ବି ହୋଇପାରେ ବୋଲି ସେ କହିଛନ୍ତି।

ହିନ୍ଦୀ ସିନେମା ପ୍ରଚାର ଅଭିଯାନ ଚାଲିଛି: ବିଜେପି

ରିପୋର୍ଟକୁ ନେଇ ଦିଲ୍ଲୀ ପୁଲିସ ପକ୍ଷରୁ ସ୍ପଷ୍ଟୀକରଣ ଆସିବା ପରେ ବିଜେପି ଏନେଇ ପ୍ରତିକ୍ରିୟାଶୀଳ ହୋଇଛି। ହିନ୍ଦୀ ସିନେମାକୁ ପ୍ରୋତ୍ସାହିତ କରିବା ପାଇଁ ଟଙ୍କା ଦେଇ ପ୍ରଚାର କରାଯାଉଛି ବୋଲି ଦିଲ୍ଲୀ ପୁଲିସ କହିଛି। ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ କହିଛନ୍ତି “ ଏକ ହିନ୍ଦୀ ସିନେମାର ପ୍ରଚାର ପାଇଁ ଦିଲ୍ଲୀରେ ଏକାଧିକ ପିଲା ଗାଏବ ହୋଇଯାଉଥିବାର ଖବରକୁ ପେଡ୍ ପ୍ରମୋସନ ମାଧ୍ୟମରେ ପ୍ରଚାର କରାଯାଉଛି। ତେଣୁ ସ୍ୱାଭାବିକ ଭାବେ ଦିଲ୍ଲୀ ପୁଲିସ ଏହାର ଆଇନଗତ ସମାଧାନ ଦିଗରେ ନିଷ୍ପତ୍ତି ନେବ।”

ଅନ୍ୟପଟେ ସୋସିଆଲ୍ ମିଡିଆ ୟୁଜର ଅମିତଙ୍କ ପୋଷ୍ଟରେ ରାଣୀ ମୁଖାର୍ଜୀଙ୍କ ସିନେମା ମର୍ଦାନୀ-୩କୁ ରେଫରେନ୍ସ ଦେଇଛନ୍ତି। କାରଣ ଏହି ସିନେମାଟି ଦିଲ୍ଲୀର ନିଖୋଜ ଜିଅମାନଙ୍କ କାହାଣୀ ଉପରେ ଆଧାରିତ ହୋଇଛି। ସେପଟେ ଆମ ଆଦ୍ମୀ ପାର୍ଟି ରିପୋର୍ଟକୁ ନେଇ ଦିଲ୍ଲୀର ବିଜେପି ସରକାରଙ୍କୁ ସମାଲୋଚନା କରିଛନ୍ତି। ଦିଲ୍ଲୀକୁ ଲାପତାଗଞ୍ଜ କରିଦେଲେଣି ବୋଲି ଆପ୍ କହିଛି।

ରିପୋର୍ଟରେ କ’ଣ ଥିଲା?

ମିଡିଆ ରିପୋର୍ଟରେ କୁହାଯାଇଥିଲା ଯେ ୨୦୨୬ ର ପ୍ରଥମ ୧୫ ଦିନରେ ଦିଲ୍ଲୀରେ ୮୦୦ ରୁ ଅଧିକ ଲୋକ ନିଖୋଜ ହୋଇଥିବା ରିପୋର୍ଟ କରାଯାଇଛି। ଜାନୁଆରୀ ୧ ରୁ ୧୫ ମଧ୍ୟରେ, ମୋଟ ୮୦୭ ଜଣ ନିଖୋଜ ହୋଇଛନ୍ତି। ଦୈନିକ ହିସାବ ଦେଖିଲେ ୫୪ ଜଣ ନିଖୋଜ ହୋଇଛନ୍ତି ବୋଲି ରିପୋର୍ଟରେ କୁହାଯାଇଛି। ଏହି ନିଖୋଜମାନଙ୍କ ମଧ୍ୟରୁ ୫୦୯ ଜଣ ମହିଳା ଏବଂ ଝିଅ ଏବଂ ୨୯୮ ଜଣ ପୁରୁଷ ଅଛନ୍ତି। ଏହି ସମୟ ମଧ୍ୟରେ ପାଖାପାଖି ୧୩ ଜଣ ଶିଶୁ ମଧ୍ୟ ଦୈନିକ ନିଖୋଜ ହୋଇଛନ୍ତି।

ରିପୋର୍ଟରେ ଆହୁରି ଦାବି କରାଯାଇଥିଲା ଯେ ନିଖୋଜଙ୍କ ମଧ୍ୟରେ ୧୯୧ ଟି ନାବାଳକ, ୧୪୬ ଟି ଝିଅ ଏବଂ ୬୧୬ ଜଣ ପ୍ରାପ୍ତବୟସ୍କ ଅଛନ୍ତି। ତେବେ ନିଖୋଜ ମଧ୍ୟରୁ ମାତ୍ର ୨୩୫ ଜଣ ନିଖୋଜ ବ୍ୟକ୍ତିଙ୍କୁ ଉଦ୍ଧାର କରାଯାଇଥିବା ବେଳେ ୫୭୨ ଜଣଙ୍କ ପତ୍ତା ମିଳୁ ନାହିଁ।