ଭୁବନେଶ୍ୱର ୧୮।୦୮ : ସତ ହେଲା ଆକଳନ । ପଇତା ଲାଗି ନୀତିକୁ ନେଇ ପୂଜାପଣ୍ଡା ନିଯୋଗ ଏବଂ ବଡୁ ନିଯୋଗ ବିବାଦ ଯୋଗୁଁ ଶନିବାର ସନ୍ଧ୍ୟା ଧୂପ ପରଠୁ ବନ୍ଦ ହୋଇଗଲା ମହାପ୍ରଭୁ ଶ୍ରୀଲିଙ୍ଗରାଜଙ୍କ ନୀତିକାନ୍ତି । ଏହିପରି ସମାନ ଅଚଳାବସ୍ଥା ବିଗତ ୫ ବର୍ଷ ହେଲା ଲାଗି ରହିଛି। ପ୍ରତିବର୍ଷ ଶିବ ପବିତ୍ରାରୋପଣର ଦିନକ ପୂର୍ବରୁ ନୀତି ବନ୍ଦ ହୋଇଯାଉଛି ହେଲେ ଏଥର କିନ୍ତୁ ଏଥିରେ ରୋକ ଲଗାଇବାକୁ ମନ୍ଦିର ପ୍ରଶାସନ ତରଫରୁ ଚେଷ୍ଟା କରାଯାଇଥିଲା । ମନ୍ଦିର କାର୍ଯ୍ୟାଳୟ ପକ୍ଷରୁ ସହକାରୀ ଦେବୋତ୍ତର କମିସନରଙ୍କ ଠାରେ ପବିତ୍ରାରୋପଣ ପାଳନ କରିବା ନିମନ୍ତେ ଏକ ଅନ୍ତରୀଣ ଆଦେଶ ପାଇଁ ଆବେଦନ କରାଯାଇଥିଲା । ସେ ଅନୁମତି ଦେଇଥିଲେ ନୀତି ପାଳନ ହେବାର ଆଶା ଥିଲା ।
ହେଲେ ଶନିବାର ହଠାତ୍ ସହକାରୀ ଦେବୋତ୍ତର କମିସନର ଏକ ଚିଠି ଯୋଗେ ଅନ୍ତରୀଣ ଆଦେଶ ନ ଦେବା ଲାଗି ସ୍ପଷ୍ଟ କରିଛନ୍ତି । ସେ ଉକ୍ତ ଚିଠିକୁ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ତଥା ଅତିରିକ୍ତ ଜିଲ୍ଲାପାଳ ରୁଦ୍ର ନାରାୟଣ ମହାନ୍ତିଙ୍କୁ ଲେଖିଛନ୍ତି ଯେ, ପ୍ରସଙ୍ଗଟି ଅଦାଲତରେ ବିଚାରାଧୀନ ଥିବା ଅବସ୍ଥାରେ ଅନ୍ତରୀଣ ଆଦେଶ ଅପ୍ରାସଙ୍ଗିକ । ଅନ୍ୟପଟେ ଆଜି ଟ୍ରଷ୍ଟ ବୋର୍ଡ ବୈଠକରେ ମଧ୍ୟ ବିବାଦର ଦୁଇ ପକ୍ଷ ପୂଜାପଣ୍ଡା ଓ ବଡୁ ନିଯୋଗ ପ୍ରତିନିଧିଙ୍କୁ ଅତିରିକ୍ତ ଜିଲ୍ଲାପାଳ ମୌଖିକ ଭାବେ ନୀତି କରାଯିବ କି ନାହିଁ ବୋଲି ପଚାରିଥିଲେ । ଉଭୟ ପକ୍ଷ ମାମଲା ବିଚାରାଧୀନ ଥିବା କଥା କହି ଏଡାଇ ଯାଇଥିଲେ ।
ସୂଚନାଯୋଗ୍ୟଯେ, ୨୦୧୯ ମସିହା ଶିବ ପବିତ୍ରାରୋପଣ ପର୍ବରେ ଶ୍ରୀଜିଉଙ୍କ ଠାରେ କେଉଁ ନିଯୋଗ କେତୋଟି ପଇତା ଲାଗି କରିବ ତା’ର ହିସାବ ବଡୁ ଓ ପୂଜାପଣ୍ଡା ନିଯୋଗ ମଧ୍ୟରେ ତୁଟି ନଥିଲା । ଫଳରେ ସେବେ ଠାରୁ ଏହି ନୀତି ବନ୍ଦ ପଡିଛି । ତେଣୁ ଶନିବାର କିଛି ଘଣ୍ଟା ଏବଂ ରବିବାର ଦିନ ତମାମ ଠାକୁରଙ୍କ ନୀତି ବନ୍ଦ ରହିବ । ସୋମବାର ସକାଳେ ମହାସ୍ନାନ ପରେ ଶ୍ରୀଜିଉଙ୍କ ନୀତି ସ୍ୱାଭାବିକ ହେବ ବୋଲି ମୌସମ ବଡୁ କହିଛନ୍ତି ।
