କଂଗ୍ରେସରେ ହୋଇପାରେ ଆଉ ଏକ ବଡ଼ ବିଭାଜନ ! ପିଏମ୍ ମୋଦୀଙ୍କ ବଡ଼ ବୟାନ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିହାରରେ ବିଜୟ ଉପରେ ଭାଷଣ ଦେଇ କଂଗ୍ରେସ ଉପରେ ଜୋରଦାର ବର୍ଷିଛନ୍ତି । ପିଏମ୍ ମୋଦୀ କହିଛନ୍ତି ଯେ କଂଗ୍ରେସର ରାଜନୀତିର ଆଧାର ଏବେ କେବଳ ନକାରାତ୍ମକ ରାଜନୀତି ହୋଇଯାଇଛି । କେତେବେଳେ 'ଚୌକିଦାର ଚୋର' ନାରା, ସଂସଦର ସମୟ ବରବାଦ କରିବା, ଇଭିଏମକୁ ଟାର୍ଗେଟ୍, କେବେ ନିର୍ବାଚନ ଆୟୋଗଙ୍କୁ ଗାଳି ଦେବା, ଜାତି ଓ ଧର୍ମ ଆଧାରରେ ଲୋକଙ୍କୁ ବିଭାଜିତ କରିବା, ଏହା ହିଁ କଂଗ୍ରେସର କାମ । ସେ କହିଛନ୍ତି ଯେ କଂଗ୍ରେସ ପାଖରେ ଦେଶ ପାଇଁ କୌଣସି ସକାରାତ୍ମକ ଭିଜନ୍ ନାହିଁ । ନିଜ ଭାଷଣରେ ପ୍ରଧାନମନ୍ତ୍ରୀ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଜୋରଦାର ଟାର୍ଗେଟ୍ କରି କହିଛନ୍ତି ଯେ ମୋତେ ଲାଗୁଛି ଆଗକୁ କଂଗ୍ରେସର ଆଉ ଏକ ବଡ଼ ବିଭାଜନ ହୋଇପାରେ ।

ପ୍ରଧାନମନ୍ତ୍ରୀ ଆହୁରି କହିଛନ୍ତି, 'ଆଜି କଂଗ୍ରେସ ମୁସଲିମ୍ ଲିଗ୍ ମାଓବାଦୀ କଂଗ୍ରେସ ପାଲଟି ଯାଇଛି । କଂଗ୍ରେସର ପୂରା ଏଜେଣ୍ଡା ଏହାର ଚାରିପାଖରେ ଘୁରି ବୁଲୁଛି । ଏଥିପାଇଁ କଂଗ୍ରେସ ଭିତରେ ଆଉ ଏକ ଅଲଗା ଗୋଷ୍ଠୀ ହେବାରେ ଲାଗିଛି, ଯେଉଁମାନେ ନକାରାମତ୍କ ରାଜନୀତିରେ ସହମତ ନୁହନ୍ତି । କଂଗ୍ରେସକୁ ଯେଉଁ ରାସ୍ତାରେ ନେଇ ଯାଉଛନ୍ତି, ସେଥିରେ ଅନେକ ନିରାଶା ଓ ଅକ୍ରୋଶ ବଢୁଛି । ମୁଁ ଆଶଂକା କରୁଛି ଯେ ଆଗକୁ କଂଗ୍ରେସର ଆଉ ଏକ ବଡ଼ ବିଭାଜନ ହେବ ।' ସେ କହିଛନ୍ତି ଯେ କଂଗ୍ରେସର ସହଯୋଗୀ ବି ବୁଝି ସାରିଛନ୍ତି ଯେ କଂଗ୍ରେସ ସମସ୍ତଙ୍କୁ ନକାରାତ୍ମକ ଦିଗରେ ନେଇ ଯାଉଛି । ଏହି ପାର୍ଟି ସହଯୋଗୀଙ୍କ ଭୋଟ ବ୍ୟାଙ୍କ ଗିଳି ନିଜକୁ ଆଗକୁ ବଢାଉଛି ।

ପିଏମ୍ ମୋଦୀ କହିଛନ୍ତି, ଦଶନ୍ଧି ଯାଏ ଦେଶରେ ଶାସନ କରୁଥିବା ପାର୍ଟି ଉପରେ ଜନତାଙ୍କ ଭରସା ଲଗାତାର କମ ହେଉଛି । କଂଗ୍ରେସ ଦେଶର ଅନେକ ରାଜ୍ୟରେ ବର୍ଷ ବର୍ଷ ଧରି କ୍ଷମତାକୁ ବାହାରେ ରହିଛି । ଗତ ତିନି ଲୋକସଭା ନିର୍ବାଚନରେ କଂଗ୍ରେସ ତିନି ଅଙ୍କ ବି ଛୁଇଁପାରି ନାହିଁ । ୨୦୨୪ ଲୋକସଭା ନିର୍ବାଚନ ପରେ ଦେଶର ଛଅ ରାଜ୍ୟରେ ବିଧାନସଭା ନିର୍ବାଚନ ହୋଇଛି, ଏଥିରେ ବି କଂଗ୍ରେସ ୧୦୦ ଆସନ ସଂଖ୍ୟା ପାର୍ କରିପାରି ନାହିଁ । ଆଜି ବି ଆମର ନିର୍ବାଚିତ ବିଧାୟକଙ୍କ ସଂଖ୍ୟା କଂଗ୍ରେସ ଦ୍ୱାର ଗତ ଛଅ ନିର୍ବାଚନରେ ବିଜୟୀ ବିଧାୟକଙ୍କ ସଂଖ୍ୟାଠାରୁ ଅଧିକ ରହିଛି ।