ନିର୍ବାଚନ ଲଢିବା ରାସ୍ତାରେ କଣ୍ଟା ଥିଲେ ୩ ସନ୍ତାନ, ୬ ବର୍ଷର ଝିଅକୁ କେନାଲରୁ ଠେଲି ମାରିଦେଲା ବାପା

ମୁମ୍ବାଇ,୦୩|୦୨ : ନିର୍ବାଚନ ଲଡିବାକୁ ନିଶା ସଜେଇଦେଲା ଖୁନି । ପଞ୍ଚାୟତ ନିର୍ବାଚନ ଲଢିବା ପାଇଁ ନିଜ ସନ୍ତାନକୁ ହତ୍ୟା କରିଦେଲା ବାପା । ତିନୋଟି ସନ୍ତାନଙ୍କ ମଧ୍ୟରୁ ଜଣଙ୍କୁ ରାସ୍ତାରୁ ସବୁଦିନ ପାଇଁ ହଟେଇଦେଲା । ଏପରି କିଛି ଛାତିଥରା ଘଟଣା ଘଟିଛି ମହାରାଷ୍ଟ୍ରରେ । ଏଠାରେ ଆଗାମୀ ନିର୍ବାଚନରେ ପ୍ରାର୍ଥୀ ହେବା ପାଇଁ ଜଣେ ବ୍ୟକ୍ତି ନିଜର ତିନି ସନ୍ତାନଙ୍କ ମଧ୍ୟରୁ ଜଣଙ୍କୁ ହତ୍ୟା କରିଥିବା ଅଭିଯୋଗ ହୋଇଛି ।

ଅଭିଯୁକ୍ତ ଜଣଙ୍କ ହେଲେ ପାଣ୍ଡୁରାଙ୍ଗ୍ କୋନ୍ଦମାଙ୍ଗଲେ । ସେ ନାନ୍ଦେଦ ଜିଲ୍ଲାର କେରୁର ଗ୍ରାମରେ ରୁହନ୍ତି । ଆସନ୍ତା ନିର୍ବାଚନରେ ସେ ସରପଞ୍ଚ ଭାବେ ଲଢିଥାନ୍ତେ । କିନ୍ତୁ ଏହା ପୂର୍ବରୁ କୋନ୍ଦମାଙ୍ଗଲେ ନିଜର ୬ ବର୍ଷୀୟ ଝିଅକୁ ହତ୍ୟା କରିଦେଇଛନ୍ତି । ଝିଅଙ୍କୁ ସେ ତେଲେଙ୍ଗାନାର ନିଜାମାବାଦର ଏକ କେନାଲ ପାଖକୁ ନେଇଥିଲେ । ସେଠାରେ ଝିଅକୁ କେନାଲ ଉପରୁ ପାଣିକୁ ଠେଲି ଦେଇଥିଲେ । ହତ୍ୟାକୁ ସେ ଦୁର୍ଘଟଣାର ରୂପ ଦେବାକୁ ମଧ୍ୟ ପ୍ରୟାସ କରିଥିଲେ । ଘଟଣାରେ ତଦନ୍ତ କରି ନିଜାମାବାଦ ପୋଲିସ ପାଣ୍ଡୁରାଙ୍ଗଙ୍କ ସମେତ ଅନ୍ୟ ଜଣେ ବ୍ୟକ୍ତିଙ୍କୁ ଗିରଫ କରିଛି ।

ପୋଲିସ କମିଶନର ପି ସାଇ ଚୈତନ୍ୟ କହିଛନ୍ତି ଯେ, ନିଜାମନଗର କେନାଲରୁ ଜଣେ ଶିଶୁକନ୍ୟାର ମୃତଦେହ ଉଦ୍ଧାର କରାଯାଇଥିଲା । ତଦନ୍ତ ପରେ ଶିଶୁକନ୍ୟାର ପରିଚୟ ପ୍ରାଚୀ ବୋଲି ଜଣାପଡିଥିଲା । ଏହାପରେ ଶିଶୁର ବାପାକୁ ଜେରା କରାଯାଇଥିଲା । ତଦନ୍ତରେ ପାଣ୍ଡୁରାଙ୍ଗଙ୍କ ବୟାନ ବାରମ୍ବାର ବଦଳୁଥିବାରୁ ପୋଲିସର ସନ୍ଦେହ ବଢିଥିଲା । ଅଧିକ ପଚରାଉଚରା ପରେ ସେ ସତ ମାନି ଯାଇଥିଲେ ।

ପ୍ରଥମେ ପାଣ୍ଡୁରାଙ୍ଗ ପ୍ରାଚୀକୁ ଅନ୍ୟ କାହାକୁ ଦେଇଦେବ ବୋଲି ଭାବିଥିଲେ । କିନ୍ତୁ ଏହି ଯୋଜନା ସଫଳ ହୋଇନଥିଲା । ଶେଷରେ ହତ୍ୟା କରିବାକୁ ସେ ସୁଚିନ୍ତିତ ଯୋଜନା କରିଥିଲେ ।

ସୂଚନାଯୋଗ୍ୟ, ପାଣ୍ଡୁରାଙ୍ଗ୍ ଏକ ପାର୍ଲରରେ କାମ କରେ । ସେ ଆଗାମୀ ପଞ୍ଚାୟନତ ନିର୍ବାଚନ ଲଢିବା ପାଇଁ ଇଚ୍ଛା ପ୍ରକାଶ କରିଥିଲା । ନିୟମ ଅନୁସାରେ ଦୁଇରୁ ଅଧିକ ସନ୍ତାନ ଥିଲେ ପଞ୍ଚାୟତ ନିର୍ବାଚନ ଲଢିହେବ ନାହିଁ । ତେଣୁ ସେ ନିଜର ଦୁଇ ଝିଅଙ୍କ ମଧ୍ୟରୁ ଜଣଙ୍କୁ ହତ୍ୟା କରିବାକୁ ମନସ୍ଥ କରିଥିଲା ।