ବ୍ରହ୍ମପୁର ୨୫/୧୨: ସୁଶାସନ ଦିବସ ଅବସରରେ ବ୍ରହ୍ମପୁରରେ ଅଟଳ ବିହାରୀ ବାଜପେୟୀଙ୍କ ପ୍ରତିମୂର୍ତ୍ତିକୁ ଉନ୍ମୋଚନ କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନାଡ଼ୁଙ୍କ ନିର୍ଦ୍ଦେଶ ଅନୁଯାୟୀ ୨୫ ଡିସେମ୍ବରରେ ବିଭିନ୍ନ କାର୍ଯ୍ୟକ୍ରମ ମାନ ଆୟୋଜନ କରାଯାଉଛି। ଏହି ଅବସରରେ ସ୍ଥାନୀୟ ରାମଲିଙ୍ଗେଇଶ୍ଵରମ ପାର୍କରେ ଅଟଳ ବିହାରୀ ବାଜପେୟୀଙ୍କ ପ୍ରତିମୂର୍ତ୍ତିର ଉନ୍ମୋଚନ କରା ଯାଇଛି ।ଏଥିରେ ବିଜେପି ରାଜ୍ୟ ସଭାପତି ମନମୋହନ ସାମଲ ଯୋଗ ଦେଇ ପ୍ରତିମୂର୍ତ୍ତିକୁ ଉଦଘାଟନ କରିଥିଲେ । ଜିଲ୍ଲାର ବହୁ ବିଧାୟକ, ସାଂସଦ, ଦଳୀୟ କର୍ମକର୍ତ୍ତା ଉପସ୍ଥିତ ଥିଲେ ।
ବିଜେପିର ପ୍ରତିଷ୍ଠାତା ତଥା ଭାରତର ପ୍ରଧାନମନ୍ତ୍ରୀ ଭାବରେ ଅଟଳ ବିହାରୀ ବାଜପେୟୀଙ୍କ ପ୍ରମୁଖ ଅବଦାନ ଉପରେ ସ୍ମରଣ କରିଥିଲେ । ଅଟଳଜୀଙ୍କ ସୁଶାସନ ଓ ଜାତୀୟ ସ୍ବାର୍ଥରେ ତାଙ୍କ ଦ୍ଵାରା କରାଯାଇଥିବା ପୋଖରାନ୍ -୨ ପରୀକ୍ଷଣ, କାର୍ଗିଲ ବିଜୟ ଦିବସ, ଏନଡ଼ିଏ ପ୍ରତିଷ୍ଠା, କିସାନ କ୍ରେଡିଟ୍ କାର୍ଡର ଶୁଭାରମ୍ଭ, ସ୍ଵର୍ଣଚର୍ତୁଭୂଜ ଯୋଜନା, ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ଭଳି ଅନେକ ଜନକଲ୍ୟାଣକାରୀ ଯୋଜନାକୁ ସମସ୍ତେ ମନେ ପକାଇଥିଲେ । ସେପଟେ ଏହି ଅବସରରେ ମନୁ ସେନା ପକ୍ଷରୁ ରକ୍ତ ଦାନ ଶିବିର ଆୟୋଜନ କରାଯାଇଥିଲା । ଏଥିରେ ବହୁ ଡୋନର ଯୋଗ ଦେଇ ରକ୍ତ ଦାନ କରିଥିଲେ ।
