ଇରାନର ନୂଆ ସୁପ୍ରିମ ଲିଡର ମୋଜତାବା ଖାମନେଇ, ବାପାଙ୍କ ଉତ୍ତରାଧିକାରୀ ଭାବେ ଚୟନ କଲା ଆସେମ୍ଵଲି ଅଫ୍ ଏକ୍ସପର୍ଟ

ନୂଆଦିଲ୍ଲୀ ୦୪।୦୩; ଯୁଦ୍ଧ ମଧ୍ୟରେ ଇରାନର ଜଣେ ନୂତନ ସର୍ବୋଚ୍ଚ ନେତା ମିଳିଛି। ଇରାନର ଆସେମ୍ବଲି ଅଫ ଏକ୍ସପର୍ଟ ଆୟାତୋଲ୍ଲା ଅଲି ଖାମେନିଙ୍କ ପୁଅ ମୋଜତାବା ଖାମେନିଙ୍କୁ ଦେଶର ନୂଆ ସର୍ବୋଚ୍ଚ ନେତା ଭାବରେ ମନୋନୀତ କରିଛି। ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନି ଆମେରିକା-ଇସ୍ରାଏଲର ମିଳିତ ଆକ୍ରମଣରେ ପ୍ରାଣ ହରାଇଥିଲେ। ସେବେଠାରୁ ଏହି ପଦବୀ ପାଇଁ ପ୍ରୟାସ ଜାରି ରହିଛି। ହେଲେ ଏପରି ରିପୋର୍ଟ ଅଛି ଯେ ମୋଜତାବାଙ୍କୁ ନୂଆ ନେତା ଭାବରେ ମନୋନୀତ କରିବାର ନିଷ୍ପତ୍ତି ଇସଲାମିକ୍ ରିଭୋଲ୍ୟୁସନାରୀ ଗାର୍ଡସ୍ କର୍ପସ (IRGC)ଅର ଚାପରେ ନିଆଯାଇଥିଲା।

ଫେବୃଆରୀ ୨୮ ତାରିଖରେ, ଆମେରିକା ଏବଂ ଇସ୍ରାଏଲ ଏକକାଳୀନ ଇରାନ ଉପରେ ଆକ୍ରମଣ କରିଥିଲେ। ସେହି ରାତିରେ ଆକ୍ରମଣରେ ଇରାନର ସର୍ବୋଚ୍ଚ ନେତା ଖାମେନିଙ୍କ ମୃତ୍ୟୁ ହୋଇଥିଲା। ଇରାନ ଆକ୍ରମଣ କରି ପ୍ରତିଶୋଧ ନେଇ ସାତଟି ଉପସାଗରୀୟ ଦେଶରେ ଥିବା ଆମେରିକୀୟ ଘାଟିକୁ ଟାର୍ଗେଟ କରିଥିଲା। ଏହା ସମଗ୍ର ମଧ୍ୟପ୍ରାଚ୍ୟରେ ଅଶାନ୍ତିର ଲହରୀ ସୃଷ୍ଟି କରିଥିଲା।

ଇରାନ ଇଣ୍ଟରନ୍ୟାସନାଲ ଏବଂ ଅନ୍ୟାନ୍ୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ ଆସେମ୍ବଲି ଅଫ ଏକ୍ସପର୍ଟରେ ୮୮ ଜଣ ବରିଷ୍ଠ ଧର୍ମଗୁରୁ ସଦସ୍ୟ ସାମିଲ ଥିଲେ। ଏହି ବୈଠକରେ ୫୬ ବର୍ଷୀୟ ମୋଜତାବା ଖାମେନିଙ୍କୁ ଇରାନର ନୂଆ ସର୍ବୋଚ୍ଚ ନେତା ଭାବରେ ନିର୍ବାଚିତ କରାଯାଇଥିଲା।

ଅଧିକ ପଢନ୍ତୁ- ୬୦ ସେକେଣ୍ଡ, ୧୨ ବୋମା ନିମିଷକେ ନିଶ୍ଚିହ୍ନ...ଆୟାତୋଲ୍ଲା ଅଲି ଖାମେନିଙ୍କ ଉପରେ ଆକ୍ରମଣର କାହାଣୀ...

ମୋଜତାବା ଖାମେନି କିଏ?

୫୬ ବର୍ଷୀୟ ମୋଜତାବା ଖାମେନି ଜଣେ ମଧ୍ୟମ ସ୍ତରୀୟ ସିଆ ଧର୍ମଗୁରୁ। ଯିଏ ଦୀର୍ଘ ସମୟ ଧରି ପରଦା ପଛରେ ପ୍ରଭାବଶାଳୀ ଭୂମିକା ଗ୍ରହଣ କରିଆସିଛନ୍ତି। ତାଙ୍କୁ IRGC ଏବଂ ବସିଜ ମିଲିସିଆ ସହିତ ଘନିଷ୍ଠ ଭାବରେ ଜଡିତ ବୋଲି ବିଶ୍ୱାସ କରାଯାଏ। ଏହି ନିଯୁକ୍ତି ବିବାଦୀୟ କାରଣ ଇରାନର ଇସଲାମିକ କ୍ରାନ୍ତିର ମୁଳ ଭାବନା ବଂଶାନୁକ୍ରମିକ ଉତ୍ତରାଧିକାରକୁ ପ୍ରତ୍ୟାଖ୍ୟାନ କରେ। ଏହା ସହ ଅନେକ କଠୋର ପନ୍ଥୀ ଏହାକୁ "ରାଜତନ୍ତ୍ର" ବୋଲି କହି ଆପତ୍ତି କରିପାରନ୍ତି। ମୋଜତାବାଙ୍କ ଧାର୍ମିକ ଯୋଗ୍ୟତା (ହୁଜ୍ଜାତୁଲ ଇସଲାମ ପଦ) ମଧ୍ୟ ସର୍ବୋଚ୍ଚ ନେତା ପଦବୀ ପାଇଁ ଅପର୍ଯ୍ୟାପ୍ତ ବୋଲି ବିବେଚନା କରାଯାଏ, କିନ୍ତୁ IRGCର ସମର୍ଥନ ଏହାକୁ ସମ୍ଭବ କରିଥିଲା।

ଅଧିକ ପଢନ୍ତୁ- ଖାମେନିଙ୍କୁ ମାରିବାକୁ ପାଣି ଭଳି ଟଙ୍କା ଖର୍ଚ୍ଚ କରିଛି ଆମେରିକା, ଜାଣିଲେ ହୋଇଯିବେ ଆଶ୍ଚର୍ଯ୍ୟ