ନୂଆଦିଲ୍ଲୀ: ଦିଲ୍ଲୀର ପୁରୁଣା ରାଜେନ୍ଦ୍ର ନଗର କୋଚିଂ ସେଣ୍ଟର ଦୁର୍ଘଟଣାରେ ତିନି ୟୁପିଏସସି ଆଶାୟୀଙ୍କ ମୃତ୍ୟୁ ମାମଲା ଏବେବି ଶାନ୍ତ ପଡ଼ିନି । ଏହାରି ଭିତରେ ଅନ୍ୟ ଜଣେ ୟୁପିଏସସି ଛାତ୍ରୀଙ୍କ ଆତ୍ମହତ୍ୟା ମାମଲା ସାମନାକୁ ଆସିଛି । ଦିଲ୍ଲୀର ଓଲ୍ଡ ରାଜେନ୍ଦ୍ର ନଗରରେ ଭଡ଼ାରେ ରହି ୟୁପିଏସସି ପ୍ରସ୍ତୁତି କରୁଥିବା ମହାରାଷ୍ଟ୍ରର ଜଣେ ଛାତ୍ରୀ କିଛି ଦିନ ପୂର୍ବେ ଆତ୍ମହତ୍ୟା କରିଥିଲେ ଏବଂ ଏକ ସୁଇସାଇଡ୍ ନୋଟ୍ ଛାଡ଼ିଯାଇଛନ୍ତି, ଯାହା ହଇଚଇ ସୃଷ୍ଟି କରିଛି । ଛାତ୍ରୀ ଜଣକ ଡିପ୍ରେସନ୍ ଯୋଗୁଁ ଆତ୍ମହତ୍ୟା କରିଛନ୍ତି ଏବଂ ୟୁପିଏସସି ଆଶାୟୀ କେଉଁ ଚାପରେ ପରୀକ୍ଷା ପ୍ରସ୍ତୁତି କରିଛନ୍ତି ତାହା ସୁଇସାଇଡ୍ ନୋଟରେ ଲେଖିଛନ୍ତି । ଏବଂ ପ୍ରତିଦିନ ସାମନା କରୁଥିବା ସମସ୍ୟା ମଧ୍ୟ ଏଥିରେ ଉଲ୍ଲେଖ କରିଛନ୍ତି ।
ଖବର ଅନୁସାରେ ଗତ ଜୁଲାଇ ୨୧ରେ ଛାତ୍ରୀ ଜଣକ ଆତ୍ମହତ୍ୟା କରିଥିଲେ । ଏହାର ଠିକ୍ ୬ ଦିନ ପରେ ଓଲ୍ଡ ରାଜେନ୍ଦ୍ର ନଗର ଦୁର୍ଘଟଣାରେ ୩ ୟୁପିଏସସି ଛାତ୍ରଛାତ୍ରୀଙ୍କ ମୃତ୍ୟୁ ହୋଇଥିଲା । ଆତ୍ମହତ୍ୟା ନୋଟ୍ରେ ଛାତ୍ରୀ ନିଜ ବାପା-ମାଆଙ୍କୁ କ୍ଷମା ପ୍ରାର୍ଥନା କରି ଅନେକ କଥା ଉଲ୍ଲେଖ କରିଛନ୍ତି, ଯେଉଁଥି ପାଇଁ ଏହିପରି ବଡ଼ ପଦକ୍ଷେପ ନେଇଛନ୍ତି ।
ଛାତ୍ରୀ ଜଣକ ଲେଖିଛନ୍ତି, 'ମାଆ-ବାପା ମୋତେ କ୍ଷମା କରିଦେବେ । ମୁଁ ଏ ଜୀବନରେ ଖୁସି ନାହିଁ । ଜୀବନରେ କେବଳ ଚିନ୍ତା ହିଁ ରହିଛି ଏବଂ ଶାନ୍ତି ନାହିଁ । ମୋତେ ଏବେ ଶାନ୍ତି ଦରକାର । ମୁଁ ଏହି ଡିପ୍ରେସନରୁ ବାହାରିବା ପାଇଁ ଉଦ୍ୟମ କରିଥିଲି କିନ୍ତୁ କିଛି ହେଲା ନାହିଁ । ମୁଁ ଡାକ୍ତରଙ୍କ ପାଖକୁ ବି ଗଲି, କିନ୍ତୁ କିଛି ଲାଭ ମିଳିଲା ନାହିଁ ।' ଛାତ୍ରୀ ଲେଖିଛନ୍ତି, 'ମୋର ଗୋଟିଏ ସ୍ୱପ୍ନ ଥିଲା ଯେ ପ୍ରଥମ ପ୍ରୟାସରେ ହିଁ ୟୁପିଏସସି କ୍ଲିୟର କରିବି । କିନ୍ତୁ ଏପରି ହେଲା ନାହିଁ ଏବଂ ସେବେଠୁ ଚିନ୍ତାରେ ଥିଲି । ଏକଥା ସମସ୍ତେ ଜାଣିଛନ୍ତି ଏବଂ ସମସ୍ତେ ମୋତେ ସପୋର୍ଟ ମଧ୍ୟ କରିଥିଲେ । କିନ୍ତୁ ମୁଁ ଏବେ ନିଜକୁ ଅସହାୟ ମନେ କରୁଛି ଏବଂ ହସ ଖୁସିରେ ରହିବାକୁ ଚାହୁଁଛି ।'
ଛାତ୍ରୀ ଜଣକ ତିନି ପୃଷ୍ଠାର ଆତ୍ମହତ୍ୟା ନୋଟରେ ଲେଖିଛନ୍ତି, 'ମୁଁ କିରଣ ଆଣ୍ଟିଙ୍କ ଘରେ ବହୁତ ଏନଜୟ କଲି । ସବୁବେଳେ ମୋର ସାଥ୍ ଦେଇଥିବାରୁ ଆଣ୍ଟି ଏବଂ ଅଙ୍କଲଙ୍କୁ ଧନ୍ୟବାଦ । କିନ୍ତୁ ମୋ ପାଇଁ ଏସବୁ ଅସହ୍ୟ ହେବାରେ ଲାଗିଛି । ଏସବୁ ସହିବା ପାଇଁ ମୁଁ ଷ୍ଟ୍ରଙ୍ଗ୍ ନୁହେଁ । ମୁଁ ଜାଣିଛି ଏହା ବ୍ରେକିଂ ନ୍ୟୁଜ୍ ପାଲଟିବ । ମୁଁ ଜାଣିଛି ଆତ୍ମହତ୍ୟା କୌଣସି ସମସ୍ୟାର ସମାଧାନ ନୁହେଁ କିନ୍ତୁ ଏପରି ଲୋକ ଅଛନ୍ତି ଯେଉଁମାନେ ନିଜ ଜୀବନ ହାରିବାକୁ ଚାହୁଁଛନ୍ତି । ଛାତ୍ରୀ ଜଣକ ପରୀକ୍ଷାରେ ହେଉଥିବା ଅନିୟମିତାକୁ ରୋକିବା ଏବଂ ନିଯୁକ୍ତି ସୃଷ୍ଟି ପାଇଁ ଅପିଲ୍ କରିଛନ୍ତି ।
ଛାତ୍ରୀ ନିଜ ସୁଇସାଇଡ୍ ନୋଟ୍ରେ ପିଜି ଏବଂ ହଷ୍ଟେଲର ବଢୁଥିବା ଭଡ଼ା ପ୍ରସଙ୍ଗ ମଧ୍ୟ ଉଠାଇଛନ୍ତି । ସେ ଲେଖଇଛନ୍ତି, 'ପିଜି ଏବଂ ହଷ୍ଟେଲ୍ ଭଡ଼ାକୁ ମଧ୍ୟ କମ କରାଯିବା ଦରକାର । ୟୁପିଏସସି ପାଇଁ ପ୍ରସ୍ତୁତି କରୁଥିବା ସମସ୍ତ ଛାତ୍ରଛାତ୍ରୀ ଏତେ ଟଙ୍କା ଦେଇପାରୁ ନାହାନ୍ତି । ଛାତ୍ରୀ ଲେଖିଛନ୍ତି, କିଏ ବି ବେଶି କାନ୍ଦିବ ନାହିଁ, ସମସ୍ତଙ୍କୁ ଦିନେ ନା ଦିନେ ଯିବାକୁ ପଡ଼ିବ, କିଛି ବଡ଼ କଥା ନାହିଁ ।'
