ନୂଆଦିଲ୍ଲୀ: ଖୁବ୍ଶୀଘ୍ର ବନ୍ଦ ହେବାକୁ ଯାଉଛି ଋଷ ୟୁକ୍ରେନ୍ ଯୁଦ୍ଧ। ଏନେଇ ଖୋଦ୍ ଋଷ ଓ ଆମେରିକା ପ୍ରୟାସ ଆରମ୍ଭ କରିଛନ୍ତି। ଏଥିପାଇଁ ମଙ୍ଗଳବାର(୧୮ ଫେବ୍ରୁଆରୀ ୨୦୨୫) ଆମେରିକୀୟ ବୈଦେଶିକ ମନ୍ତ୍ରୀ ମାର୍କୋ ରୁବିଓ ଓ ଋଷ ପ୍ରତିପକ୍ଷ ସର୍ଗେ ଲାଭରୋଭଙ୍କ ମଧ୍ୟରେ ସାଉଦି ଆରବର ରିୟାଧ ସହରରେ ବୈଠକ ହୋଇଛି। ଏହି ବୈଠକରେ ଯୁଦ୍ଧ ବନ୍ଦ କରିବା ସହିତ ଆମେରିକା ଓ ଋଷ ମଧ୍ୟରେ ସମ୍ପର୍କ ସୁଧାରିବାକୁ ଆଲୋଚନା ହୋଇଥିବା ସୂଚନା ମିଳିଛି।
ଆମେରିକାର ଜାତୀୟ ସୁରକ୍ଷା ପରାମର୍ଶଦାତା ମାଇକ୍ ୱାଲ୍ଜ୍ ଏବଂ ଆମେରିକାର ରାଷ୍ଟ୍ରଦୂତ ଷ୍ଟିଭ୍ ୱିଟକଫ୍ ରୁଷର ବୈଦେଶିକ ମନ୍ତ୍ରୀ ଲାଭରୋଭଙ୍କ ସହିତ ମଙ୍ଗଳବାର ୪.୫ ଘଣ୍ଟା ଧରି ବୈଠକ ହୋଇଥିଲା। ହେଲେ ଏହି ଆଲୋଚନାରେ ୟୁକ୍ରେନ ସାମିଲ ନଥିଲା।
ଦ୍ୱିତୀୟ ବିଶ୍ୱ ଯୁଦ୍ଧ ପରେ ୟୁରୋପରେ ଦେଖା ଦେଇଥିବା ଏହି ଭୟଙ୍କର ଯୁଦ୍ଧକୁ ରୋକିବାକୁ ଦୁଇ ଦେଶ ପକ୍ଷରୁ ଉଚ୍ଚସ୍ତରୀୟ ପ୍ରତିନିଧି ଦଳ ନିଯୁକ୍ତି କରାଯାଇଛି। ଖୁବ୍ଶୀଘ୍ର ଦୁଇ ପକ୍ଷର ଗ୍ରହଣୀୟତାରେ ଏକ ସ୍ଥାୟୀ ମାର୍ଗ ବାହାରିବ ବୋଲି ଉଭୟ ଦେଶ ଆଶା ବ୍ୟକ୍ତ କରିଛନ୍ତି। ସେପଟେ ୟୁକ୍ରେନ କିନ୍ତୁ ସଫା ସଫା କହି ଦେଇଛି ଯେ ତା’ର ବିନା ଅନୁମତିରେ ସେ କୌଣସି ନିଷ୍ପତ୍ତି ଗ୍ରହଣ କରିବ ନାହିଁ।
ତେବେ ଏହି ବୈଠକର ଉଦ୍ଦେଶ୍ୟ କେବଳ ଋଷ ୟୁକ୍ରେନ ଯୁଦ୍ଧ ବନ୍ଦ କରିବା ନଥିଲା, ଦୀର୍ଘଦିନ ଧରି ତିକ୍ତ ଥିବା ଆମେରିକା ଓ ଋଷ ମଧ୍ୟରେ ପୁନଃ ସୁସମ୍ପର୍କ ସ୍ଥାପନ କରିବା ଦିଗରେ ମଧ୍ୟ ଆଲୋଚନା ହୋଇଥିଲା। ତେବେ ୟୁକ୍ରେନ୍ ଯୁଦ୍ଧ ସମାପ୍ତ ହେବା ସହିତ ଦୁଇ ଆମେରିକା ଓ ଋଷ ମଧ୍ୟରେ ସୁସମ୍ପର୍କ ସ୍ଥାପନ କାର୍ଯ୍ୟ ଆରମ୍ବ ହେବ। ତେବେ ଖୁବ୍ଶୀଘ୍ର ଏହି କାମ ଆରମ୍ଭ ହେବ ବୋଲି ଉଭୟ ଦେଶ ସୂଚନା ଦେଇଛନ୍ତି।
ଏନେଇ ରୁବିଓ କହିଛନ୍ତି ଯେ ଦୁଇ ଦେଶ ତିନୋଟି ପ୍ରମୁଖ ପ୍ରସଙ୍ଗ ନେଇ ଏକମତ ହୋଇଛନ୍ତି। ସେଗୁଡ଼ିଗକ ହେଲା ୱାଶିଂଟନ ଏବଂ ମସ୍କୋରେ ଥିବା ନିଜ ନିଜ ଦୂତାବାସରେ ପୁନଃ କର୍ମଚାରୀ ନିଯୁକ୍ତି ଦେବା, ୟୁକ୍ରେନ ଶାନ୍ତି ଆଲୋଚନାକୁ ସମର୍ଥନ କରିବା ପାଇଁ ଏକ ଉଚ୍ଚସ୍ତରୀୟ ଟିମ୍ ଗଠନ କରିବା ଓ ପରସ୍ପର ମଧ୍ୟରେ ଅର୍ଥନୈତିକ ସହଯୋଗ ପାଇଁ ବାଟ ଫିଟାଇବା। ଅନ୍ୟପଟେ ଲାଭରୋଭ ଏହି ଆଲୋଚନାକୁ ଗଠନମୂଳକ ବୋଲି କହିବା ସହିତ ଏ ଦିଗରେ କାମ ଆଗକୁ ବଢ଼ିବ ବୋଲି ଆଶା ବ୍ୟକ୍ତ କରିଛନ୍ତି।
ଏନେଇ ରୁବିଓ କହିଛନ୍ତି "ଯଦି ଏହି ବିବାଦର ଏକ ଗ୍ରହଣୀୟ ଅନ୍ତ ହୁଏ, ତେବେ ଋଷ ସହିତ ଭୂ-ରାଜନୈତିକ ସହଭାଗିତା ପାଇଁ ଅବିଶ୍ୱସନୀୟ ସୁଯୋଗ ଉପଲବ୍ଧ ହେବ, ଯାହା ବିଶ୍ୱ ପାଇଁ ଭଲ ହେବ ଏବଂ ଆମ ସମ୍ପର୍କରେ ସୁଧାର ଆସିବ। ସେପଟେ ଲାଭରୋଭ କହିଛନ୍ତି ଯେ ଆଲୋଚନା ବେଳେ ଆମେ ଯେଉଁ ତଥ୍ୟ ଦେବୁ ତାକୁ ଆମେରିକା ବୁଝି ପାରିବ ବୋଲି ଆମର ଆଶା।
ସୂଚନା ଥାଉକି ଋଷ-ୟୁକ୍ରେନ୍ ଯୁଦ୍ଧ ହେବା ପରେ ଆମେରିକା ଓ ଋଷ ମଧ୍ୟରେ ସମ୍ପର୍କ ତିକ୍ତ ହୋଇଯାଇଛି। ଦୁଇ ଦେଶର ବ୍ୟବସାୟ ମଧ୍ୟ ଏଥିରେ କ୍ଷତିଗ୍ରସ୍ତ ହୋଇଛି। ତେଣୁ ଟ୍ରମ୍ପ ପ୍ରଶାସନ ଋଷ ସହ ସମ୍ପର୍କ ସୁଧାରିବାକୁ ଚେଷ୍ଟା କରୁଛନ୍ତି।
ଗତ ସପ୍ତାହରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଫୋନ୍ କରି କଥା ହୋଇଥିଲେ। ଏହାପରେ ୟୁକ୍ରେନ୍ ସହ ଯୁଦ୍ଧ ରୋକିବାରୁ ସମ୍ଭାବନା ପ୍ରକାଶ ପାଇଥିଲା। ଏହାପରେ ଆଜିର ଏହି ବୈଠକ ଆୟୋଜନ କରାଯାଇଥିଲା। ତେବେ ଟ୍ରମ୍ପ ଓ ପୁଟିନ୍ଙ୍କ ସାକ୍ଷାତ୍କାର ନେଇ ଏଥିରେ କୌଣସି ତାରିଖ ସ୍ଥିର କରାଯ।ଇ ନାହିଁ।
ସେପଟେ ୟୁକ୍ରେନ ଏହି ବୈଠକକୁ ପ୍ରତ୍ୟାଖ୍ୟାନ କରିଛି। ରାଷ୍ଟ୍ରପତି ଭୋଲୋଡିମିର ଜେଲେନସ୍କି କହିଛନ୍ତି ଆମ ପଛ ପଟେ ହେଉଥିବା କୌଣସି ଆଲୋଚନାକୁ ଗ୍ରହଣ କରାଯିବ ନାହିଁ। ୟୁକ୍ରେନ୍କୁ ସାମିଲ ନ କରି ନିଷ୍ପତ୍ତି ନେବା ଆଦୌ ଗ୍ରହଣୀୟ ନୁହେଁ। ଏଥିପାଇଁ ଆମେରିକା ପ୍ରତିନିଧି ଆମ ଦେଶକୁ ଆସି ଆମ ସହ ଆଲୋଚନା କରନ୍ତୁ। ତେବେ ସାଉଦି ଆରବରେ ବୈଠକ ହେବା ପୂର୍ବରୁ ୟୁକ୍ରେନ୍କୁ ମଧ୍ୟ ନିମନ୍ତ୍ରଣ ଦିଆଯାଇଥିଲା। ହେଲେ ୟୁକ୍ରେନ୍ ଏହାକୁ ପ୍ରତ୍ୟାଖ୍ୟାନ କରିଦେଇଥିଲେ। ସେପଟେ ଋଷ କହିଛି ଆବଶ୍ୟକ ପଡ଼ିଲେ ପୁଟିନ ୟୁକ୍ରେନ୍ ରାଷ୍ଟ୍ରପତିଙ୍କ ସହିତ ଆଲୋଚନା କରିବାକୁ ରାଜି ଅଛନ୍ତି।
ସୂଚନା ଥାଉକି ୨୦୨୧ ଫେବ୍ରୁଆରୀରେ ଋଷ ଓ ୟୁକ୍ରେନ୍ ମଧ୍ୟରେ ଯୁଦ୍ଧ ଆରମ୍ଭ ହୋଇଥିଲା। ଋଷ ପକ୍ଷରୁ ୟୁକ୍ରେନ ଉପରେ ମିସାଇଲ ମାଡ଼ କରାଯାଇଥିଲା।
