ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜମ୍ମୁ-କାଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣର କଡ଼ା ନିନ୍ଦା  କରିଛନ୍ତି। ମଙ୍ଗଳବାର ସେ ଏକ୍ସରେ ଲେଖିଛନ୍ତି, ମୁଁ ପହଲଗାମରେ ହୋଇଥିବା ଆତଙ୍କୀ ଆକ୍ରମଣର କଡ଼ା ନିନ୍ଦା କରୁଛି। ଯେଉଁମାନେ ନିଜ ପ୍ରିୟଜନଙ୍କୁ ହରାଇଛନ୍ତି, ସେମାନଙ୍କ ପ୍ରତି ମୋର ସମବେଦନା। ଆହତଙ୍କ ଶୀଘ୍ର ସୁସ୍ଥ କାମନା କରୁଛି। ପ୍ରଭାବିତ ଲୋକଙ୍କୁ ଯଥା ସମ୍ଭବ ସହାୟତା ଦିଆଯାଉଛି। 

ମୋଦୀ କହିଛନ୍ତି, ଏହି ଜଘନ୍ୟ କୃତ୍ୟ ପଛରେ ଯେଉଁ ଲୋକେ ସାମିଲ, ସେମାନଙ୍କୁ ନ୍ୟାୟର କାଠଗଡ଼ାକୁ ଟଣାଯିବ। ସେମାନଙ୍କୁ କଦାପି ଛଡ଼ା ଯିବ ନାହିଁ। ସେମାନଙ୍କ ପାପ ଏଜେଣ୍ଡା କେବେ ସଫଳ ହେବ ନାହିଁ। ଆତଙ୍କବାଦ ସହ ଲଢିବା ଆମର ସଂକଳ୍ପ ଅଟଳ ଓ ଏହା ଆହୁରି ମଜବୁତ ହେବ। ପହଲଗାମ ଆତଙ୍କୀ ହମଲା ଘଟଣାକୁ ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଦୃଢ ନିନ୍ଦା କରିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଘଟଣାର ନିନ୍ଦା କରିବା ସହ ଆତଙ୍କୀ ଘଟଣାରେ ଭାରତ ସହ ଆମେ ଅଛୁ ବୋଲି କହିଛନ୍ତି। 

Also read: Pahalgam Terrorist Attack: ଜାଣନ୍ତୁ ଜାମ୍ମୁ କାଶ୍ମୀରରେ କେବେ କେବେ ପର୍ଯ୍ୟଟକଙ୍କ ଉପରେ ହୋଇଛି ଆତଙ୍କୀ ହମଲା

ଦକ୍ଷିଣ କାଶ୍ମୀରର ପ୍ରମୁଖ ପର୍ଯ୍ୟଟନ ସ୍ଥଳ ପହଲଗାମରେ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ଘଟଣାର ଅନେକ ଲୋମ ଟାଙ୍କୁରା ଭିଡ଼ିଓ ସାମ୍ନାକୁ ଅସିଛି। ଏଥିରେ ଅନେକ ଲୋକ ରକ୍ତ  ଜୁଡ଼ୁବୁଡ଼ୁ ଅବସ୍ଥାରେ ଅଚେତ ଅବସ୍ଥାରେ ପଡ଼ି ରହିଥିବା ଦେଖିବାକୁ ମିଳିଛି। ଏହି ଘଟଣା ଏମିତି ସମୟରେ ଘଟିଛି, ଯେତେବଳେ ବର୍ଷ ବର୍ଷ ଆତଙ୍କବାଦ ସହ ସଂଘର୍ଷ ପରେ କାଶ୍ମୀରରେ ପର୍ଯ୍ୟଟକଙ୍କ ସଂଖ୍ୟାରେ ବ୍ୟାପକ ବୃଦ୍ଧି ଦେଖିବାକୁ ମିଳିଥିଲା। ଅନ୍ୟପଟେ ଜୁଲାଇ ୩ରୁ ଅମରନାଥ ତୀର୍ଥ ଯାତ୍ରା ଆରମ୍ଭ ହେବାକୁ ଯାଉଛି। 

ରିପୋର୍ଟ ଅନୁଯାୟୀ, ଏହି ଆକ୍ରମଣ ମଙ୍ଗଳବାର ଅପରାହ୍ଣ ପ୍ରାୟ ୩ଟାରେ ଘଟିଛି। ଆତଙ୍କବାଦୀ ବେସରଣ ଘାଟିରେ ପାହାଡ଼ରୁ ତଳକୁ ଓହ୍ଲାଇ ସେଠାରେ ଥିବା ପର୍ଯ୍ୟଟକଙ୍କ ଉପରେ ଗୁଳିମାଡ଼ ଆରମ୍ଭ କରିଥିଲେ। ପହଲଗାମ ଏମିତି ଏକ ଅଞ୍ଚଳ, ଯେଉଁଠି ଆତଙ୍କବାଦୀ ଘଟଣା ଘଟିବା ନଜିର ନାହିଁ। ପର୍ଯ୍ୟଟକଙ୍କ ଦୃଷ୍ଟିରୁ ଏହି ଅଞ୍ଚଳକୁ ସୁରକ୍ଷିତ କୁହାଯାଏ। 

ମାତ୍ର ମଙ୍ଗଗଳବାର ଯେଉଁଭଳି ଆତଙ୍କବାଦୀ ପର୍ଯ୍ୟଟକଙ୍କୁ ଟାର୍ଗେଟ୍ କଲେ, ଏଥିରେ ପହଲଗାମରେ ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି। ପହଲଗାମ ନିଜର ଜଙ୍ଗଲ, ସ୍ଵଚ୍ଛ ପାଣିର ହ୍ରଦ ଓ ବିଶାଳ ଘାସ ପଡ଼ିଆ ପାଇଁ ବେଶ ପ୍ରସିଦ୍ଧ। ଏହା ପର୍ଯ୍ୟଟଙ୍କ ପାଇଁ ଏକ ଲୋକପ୍ରିୟ ପର୍ଯ୍ୟଟନ ସ୍ଥଳ। ଏହି ଅଞ୍ଚଳକୁ କେବଳ ଚାଲି ଚାଲି କିମ୍ବା  ଘୋଡ଼ାରେ ବସି ପହଞ୍ଚି ପାରିବେ।