ବିହାର ଶେଖପୁରାରେ ଅଟୋକୁ ପିଟିଲା ଟ୍ରକ୍, ମା-ପୁଅ ସମେତ ୫ ମୃତ

ପାଟନା: ବିହାରର ଶେଖପୁରାରେ ମଙ୍ଗଳବାର (୫ ନଭେମ୍ବର, ୨୦୨୫) ଅପରାହ୍ନରେ ଏକ ଭୟଙ୍କର ସଡ଼କ ଦୁର୍ଘଟଣାରେ ୫ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ମାଆ ଏବଂ ପୁଅ ମଧ୍ୟ ଅଛନ୍ତି। ଏକ ଟ୍ରକ୍ ଏକ ଅଟୋ ସହିତ ଧକ୍କା ହେବା ଫଳରେ ଏହି ଦୁର୍ଘଟଣା ଘଟିଛି। ଶେଖପୁରା ଥାନା ଅନ୍ତର୍ଗତ ଏକସାରି ବିଘା ନିକଟରେ ଘଟିଛି ଏହି ଦୁର୍ଘଟଣା ।

ଘଟଣା ସମ୍ପର୍କରେ ସୂଚନା ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚିଥିଲା। ୭ରୁ ୮ ଜଣ ଆହତଙ୍କୁ ଚିକିତ୍ସା ପାଇଁ ପାବାପୁରୀ ପଠାଯାଇଥିଲା। ଆହତଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ଥିବା ଜଣାପଡିଛି। ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି ଅନୁମାନ କରାଯାଉଛି। ସମସ୍ତ ଲୋକ ଏକ ଅଟୋରେ ଯାତ୍ରା କରୁଥିଲେ । ସାମ୍ନାରୁ ଆସୁଥିବା ଏକ ଟ୍ରକ୍ ସହିତ ଦୁର୍ଘଟଣା ହେବା ଫଳରେ ମା-ପୁଅ ସମେତ ୫ ଜଣଙ୍କ ମୃତ୍ୟୁ ହୋଇଛି ।

ମୃତକଙ୍କ ମଧ୍ୟରେ ଆଶା ଦେବୀ (ପ୍ରାୟ ୫୫ ବର୍ଷ) ଏବଂ ତାଙ୍କ ପୁଅ ରାହୁଲ ( ୨୨ ବର୍ଷ) ସାମିଲ । ସେମାନେ କାମ ପାଇଁ ପାଟନା ଯାଉଥିଲେ। ତୃତୀୟ ବ୍ୟକ୍ତିଙ୍କୁ ରାଜକୁମାର ସା ବୋଲି ଚିହ୍ନଟ କରାଯାଇଛି। ଏହି ତିନି ଜଣଙ୍କ ବ୍ୟତୀତ ମହେନ୍ଦ୍ର ମାଞ୍ଝିଙ୍କ ପତ୍ନୀ ଅହଲ୍ୟା ଦେବୀ ଏବଂ ୧୭ ବର୍ଷୀୟା ନିଶା କୁମାରୀ ମଧ୍ୟ ପ୍ରାଣ ହରାଇଛନ୍ତି। ନିଶାଙ୍କ ଭଉଣୀ ପ୍ରିୟା ଦୁର୍ଘଟଣାରେ ଆହତ ହୋଇଛନ୍ତି ଏବଂ ପାବାପୁରୀରେ ଚିକିତ୍ସାଧୀନ ଅଛନ୍ତି। ସ୍ଥାନୀୟ ଲୋକଙ୍କ ଅନୁସାରେ, ଅଟୋରେ ୧୨-୧୩ ଜଣ ଲୋକ ଥିଲେ। ଘଟଣା ପରେ ଟ୍ରକଟିକୁ ଜବତ କରାଯାଇଛି। ଡ୍ରାଇଭର ଘଟଣାସ୍ଥଳରୁ ଫେରାର ହୋଇ ଯାଇଛି।

ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଦୁର୍ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି। ସେ ଇନଷ୍ଟାଗ୍ରାମରେ ଏକ ପୋଷ୍ଟରେ ଲେଖିଛନ୍ତି, ‘ଶେଖୁପୁରାର ଚେୱାରା ଥାନା ଅଞ୍ଚଳରେ ଏକ ଟ୍ରକ୍ ଏବଂ ଅଟୋ ମଧ୍ୟରେ ଧକ୍କା ହେତୁ ଜୀବନହାନୀ ଖବର ଅତ୍ୟନ୍ତ ଦୁଃଖଦ ଏବଂ ହୃଦୟ ବିଦାରକ। ଈଶ୍ୱର ଦିବଙ୍ଗତ ଆତ୍ମାକୁ ତାଙ୍କ ଶରଣରେ ସ୍ଥାନ ଦିଅନ୍ତୁ। ପ୍ରଭାବିତ ପରିବାରକୁ ସମବେଦନା ଜଣାଉଛି । ମୁଁ ଆହତମାନଙ୍କ ଆଶୁ ଆରୋଗ୍ୟ କାମନା କରୁଛି ।’