ପାକିସ୍ତାନ ଆଣବିକ ଅସ୍ତ୍ର ପରୀକ୍ଷଣ କରୁଛି, ଆଗକୁ ଭୟଙ୍କର ଯୁଦ୍ଧ ହୋଇପାରେ- ଟ୍ରମ୍ପ୍

ନ୍ୟୁୟର୍କ,  ୦୩ |୧୧ :  ପାକିସ୍ତାନ ଲଗାତାର ଭାବେ ଆଣବିକ ଅସ୍ତ୍ରର ପରୀକ୍ଷଣ କରୁଛି । ଯାହା ଆଗକୁ ଭାରତ ପାଇଁ ବିପଦ ସୃଷ୍ଟି କରିପାରେ । ଏହାସହ ମେ ମାସରେ ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧ ଅଟକାଇଥିବା ନେଇ ଦାବି କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ । ଆହୁରି ମଧ୍ୟ ଭାରତ ପାକିସ୍ତାନ ଉପରେ ପରମାଣୁ ବୋମା ପକାଇଥାନ୍ତା ବୋଲି କହିଛନ୍ତି ୟୁଏସ ପ୍ରେସିଡେଣ୍ଟ୍ ।

ସିବିଏସ ନ୍ୟୁଜକୁ ଦେଇଥିବା ସାକ୍ଷାତକାରରେ ଅନେକ ଗୁରୁତ୍ୱପୂର୍ଣ୍ଣ କଥା କହିଛନ୍ତି ଟ୍ରମ୍ପ୍ । ସେ କହିଛନ୍ତି ଯେ, ଋଷିଆ ଏବଂ ଚାଇନା ପରମାଣୁ ଅସ୍ତ୍ର ପରୀକ୍ଷଣ କରୁଛନ୍ତି । କିନ୍ତୁ ସେମାନେ ଏବାବଦରେ ମୁହଁ ଖୋଲିବାକୁ ନାରାଜ । କିନ୍ତୁ ଆମେରିକା ଏମିତି ନୁହେଁ । ଆମେ ପରୀକ୍ଷଣ କରିବା ପରେ ସମସ୍ତଙ୍କ ଆଗରେ ଗର୍ବର ସହ ପ୍ରକାଶ କରୁ । ଏଠାରେ ଗଣମାଧ୍ୟମର ବଡ ଭୂମିକା ଅଛି । କିନ୍ତୁ ଚାଇନା ଏବଂ ଋଷିଆରେ ପରମାଣୁ ପରୀକ୍ଷଣ ହେଲେ ଗଣମାଧ୍ୟମରେ ଖବର ଆସୁନାହିଁ । ସେମାନେ ଆଣବିକ ଅସ୍ତ୍ରର ପରୀକ୍ଷଣ କରୁଥିବାରୁ ଆମେ ମଧ୍ୟ କରୁଛୁ ।

ଆହୁରି ମଧ୍ୟ ସେ କହିଛନ୍ତି ଯେ, ନିକଟରେ ଉତ୍ତର କୋରିଆ ଆଣବିକ ପରୀକ୍ଷଣ କରିଛି । ପାକିସ୍ତାନ ମଧ୍ୟ ପରୀକ୍ଷଣ କରିଥିବା କହିଛନ୍ତି ଟ୍ରମ୍ପ୍ । ତେବେ ଟ୍ରମ୍ପଙ୍କ ବୟାନ ସେହି ସମୟରେ ସାମ୍ନାକୁ ଆସିଛି ଯେତେବେଳେ ୟୁଏସ ଯୁଦ୍ଧ ମନ୍ତ୍ରାଳୟ ଆଣବିକ ଅସ୍ତ୍ରର ପରୀକ୍ଷା କରିବାକୁ ନିର୍ଦ୍ଦେଶ ଦେଇଥିଲା । ନିଜ ସୋସିଆଲ ସାଇଟରେ ଟ୍ରମ୍ପ୍ ଆମେରିକା ପାଖରେ ଅନ୍ୟ ଦେଶ ଅପେକ୍ଷା ଅଧିକ ଅସ୍ତ୍ର ଥିବା ଦାବି କରିଥିଲେ । ଆମେରିକା ପଛରେ ଋଷିଆ ଓ ଚୀନ ରହିଥିବା ପ୍ରକାଶ କରିଥିଲେ ଟ୍ରମ୍ପ୍ ।

ସୂଚନାଯୋଗ୍ୟ, କିଛି ଦିନ ତଳେ ପାକିସ୍ତାନର କ୍ୱେଟା ଅଞ୍ଚଳରେ  ଆକାଶରେ କିଛି ଅଜବ ଦୃଶ୍ୟ ଦେଖିବାକୁ ମିଳିଥିଲା । ହଠାତ ସୂର୍ଯ୍ୟୋଦୟ ପୂର୍ବରୁ ଆକାଶରେ ଭିନ୍ନ ବାଦଲ ଦେଖାଯାଇଥିଲା । ଯାହାର ଭିଡିଓ ଏବଂ ଫଟୋ ସୋସିଆଲ ମିଡିଆରେ ଘୁରି ବୁଲୁଥିଲା । ଏନେଇ ପାକ୍ ପ୍ରତିରକ୍ଷା ମନ୍ତ୍ରୀ ଖାଓ୍ୱାଜା ଆସିଫଙ୍କୁ କିଛି ଗଣମାଧ୍ୟମ ପ୍ରଶ୍ନ କରିଥିଲେ । ଯାହାର ଉତ୍ତରରେ ସେ ଏସବୁ କଥା ସମସ୍ତଙ୍କ ସାମ୍ନାରେ କହିହେବ ନାହିଁ ବୋଲି କହିବା ସହ ଘଟଣାର ସସପେନ୍ସକୁ ଆହୁରି ବୃଦ୍ଧି କରିଥିଲେ ।