ସୋର ୧୨/୨: ତମେ ମଦ ପିଅନି । ଏଇ ନିଶା ପିଇଲେ ଦେହ ଖରାପ ହେଉଛି । ତମେ ଭଲରେ ନରହିଲେ ଆମ ସଂସାର କେମିତି ଚାଲିବ। ଏମିତି କେତେ କଥା କହି ଅନାଦିଙ୍କୁ ବୁଝାଇଥିଲେ ସଂଜୁଲତା । ଭଲରେ ନଶୁଣିବାରୁ ତାଗିଦ କଲେ । ଝଗଡା କଲେ । ଜୀବନ ହାରିଦେବାର ଧମକ ବି ଦେଲେ ହେଲେ ଅନାଦିଙ୍କ ଉପରେ କୌଣସି ଫରକ ପଡିଲାନି । ସେ ସବୁଦିନ ମଦ ପିଇ ଘରକୁ ଫେରି ସଂଜୁଲତାଙ୍କୁ ବାଡିଆପିଟା କରୁଥିଲେ । ଶେଷରେ ଅନାଦିଙ୍କ ଉପରେ ଅଭିମାନ କରି ସବୁଦିନ ପାଇଁ ଆଖିବୁଜିଦେଇଛନ୍ତି ସଂଜୁଲତା । ସୋର ଉତ୍ତରେଶ୍ବରର ଘଟଣାକୁ ନେଇ ଏବେ ସବୁଠି ଆଲୋଡନ ।
ମଙ୍ଗଳବାର ରାତିରେ ମଦକୁ ନେଇ ଉଭୟ ସଂଜୁଲତା ଓ ଅନାଦିଙ୍କ ମଧ୍ୟରେ ଝଗଡା ହୋଇଥିଲା । ସକାଳୁ ଅନାଦି ପୁଣି ମଦ ପିଇବାକୁ ଚାଲିଯାଇଥିଲେ । ମଦ ନିଶାରେ ଫେରିଲା ବେଳକୁ ଆଉ କିଛି ନଥିଲା । ଘର ଭିତରେ ସଂଜୁଲତା ପ୍ରଥମେ ବିଷ ପିଇବା ସହ ବେକରେ ରଶି ଲଗାଇ ଝୁଲିପଡିଥିଲେ । ସଂଜୁଲତା କବାଟ ନଖୋଲିବାରୁ ଗାଁ ଲୋକଙ୍କୁ ଡାକିଥିଲେ ଅନାଦି । ଘରର କବାଟ ଭାଙ୍ଗିବା ପରେ ସମସ୍ତେ ଯାହା ଦେଖିଲେ ଆଶ୍ଚର୍ଯ୍ୟ ହୋଇଯାଇଥିଲେ । ସଂଯୁକ୍ତା ମୃତଦେହ ଝୁଲୁଥିଲା । ତାଙ୍କୁ ମେଡିକାଲ ଅଣାଯାଇଥିଲା । ସେଠାରେ ମୃତ ଘୋଷଣା କରିଥିଲେ ଡାକ୍ତର । ତେବେ ମୃତ୍ୟୁ ପୂର୍ବରୁ ସଂଜୁଲତା ଏକ ଚିଠି ଛାଡି ଯାଇଥିଲେ । ଯେଉଁଥିରେ ସେ ଅନାଦି ମଦ ପିଇବା ନଛାଡିବାରୁ ଆତ୍ମହତ୍ୟା କରିଥିବା ସ୍ପଷ୍ଟ ଉଲ୍ଲେଖ କରିଛନ୍ତି । ପୋଲିସ ମୃତଦେହ ଜବତ କରି ଛାନ୍ଭିନ୍ କରୁଛି । ଏହି ଘଟଣା ପ୍ରଥମ ନୁହେଁ ମଦ ନିଶା ଏମିତି କେତେ ଯେ ସଂସାର ଉଜାଡିଛି ତାର ହିସାବ ନାହିଁ ।
