Modi-Putin Joint Statement: ଆତଙ୍କବାଦ, ୟୁକ୍ରେନ, ବୈଶ୍ୱିକ ସହଯୋଗ, ଉର୍ଜା...ସରଳ ଭାଷାରେ ବୁଝନ୍ତୁ ପୁଟିନ ଓ ମୋଦୀଙ୍କ ଘୋଷଣାନାମା

ନୂଆଦିଲ୍ଲୀ: ଦୁଇ ଦିନିଆ ଭାରତ ଗସ୍ତରେ ଆସିଥିବା ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ବୈଠକ ଶେଷ ହୋଇଛି । ହାଇଦ୍ରାବାଦ ହାଉସରେ ହୋଇଥିବା ଏହି ବୈଠକ ପରେ ଦୁଇ ରାଷ୍ଟ୍ରାଧ୍ୟକ୍ଷ ମିଳିତ ଘୋଷଣାନାମା ଜାରି କରିଛନ୍ତି । ପ୍ରଧାନମନ୍ତ୍ରୀ ମୋଦୀ ଆତଙ୍କବାଦଠାରୁ ଆରମ୍ଭ କରି ୟୁକ୍ରେନରେ ଶାନ୍ତି ପରି ପ୍ରସଙ୍ଗ ଉପରେ ଆଲୋଚନା କରିଛନ୍ତି । ପିଏମ୍ ମୋଦୀ ରୁଷ ଲୋକଙ୍କ ପାଇଁ ୩୦ ଦିନର ଇ-ଟୁରିଷ୍ଟ ଭିସା ଓ ୩୦ ଦିନର ଗ୍ରୁପ୍ ଟୁରିଷ୍ଟ ଭିସା ନେଇ ଘୋଷଣା କରିଛନ୍ତି । ଅନ୍ୟପଟେ ରାଷ୍ଟ୍ରପତି ପୁଟିନ କହିଛନ୍ତି ଯେ ରୁଷ ଓ ଭାରତ ମଧ୍ୟରେ ପାରସ୍ପାରିକ ସମ୍ପର୍କ ମଜଭୁତ ରହିଛି । ସେ ସ୍ପଷ୍ଟ କରିଛନ୍ତି ଯେ ରୁଷ ସବୁଠୁ ବଡ଼ ଭାରତୀୟ ନ୍ୟୁକ୍ଲିୟର ପ୍ଲାଣ୍ଟର ନିର୍ମାଣ ପ୍ରୋଜେକ୍ଟ ଉପରେ ମଧ୍ୟ କରୁଛି ।

ପ୍ରଧାନମନ୍ତ୍ରୀ ମୋଦୀଙ୍କ ଭାଷଣର ୭ ବଡ଼ କଥା

ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ଠିକ୍ ୨୫ ବର୍ଷ ପୂର୍ବେ, ପୁଟିନ ରଣନୈତିକ ସହଭାଗୀର ମୂଳଦୁଆ ସ୍ଥାପନ କରିଥିଲେ । ଏହାକୁ ସ୍ପେଶାଲ ଓ ପ୍ରିଭିଲେଜ୍ ସମ୍ପର୍କର ମାନ୍ୟତା ଦିଆଯାଇଥିଲା । ସେ ଏହି ସମ୍ପର୍କକୁ ନିରନ୍ତର ବଢାଇଛନ୍ତି । ତାଙ୍କ ନେତୃତ୍ୱ ଆମର ସମ୍ପର୍କକୁ ନୂଆ ଉଚ୍ଚତାରେ ପହଞ୍ଚାଇଛି । ଭାରତ ପ୍ରତି ଏହି ଗଭୀର ବନ୍ଧୁତା ଏବଂ ଅଟଳ ପ୍ରତିବଦ୍ଧତା ପାଇଁ ମୁଁ ରାଷ୍ଟ୍ରପତି ପୁଟିନ ଏବଂ ମୋର ବନ୍ଧୁଙ୍କୁ ହୃଦୟରୁ କୃତଜ୍ଞତା ଜଣାଉଛି ।"

"ବିଶ୍ୱ ଅନେକ ଉତ୍ଥାନ-ପତନ ଦେଖିଛି ଏବଂ ମାନବଜାତିକୁ ସଙ୍କଟ ଦେଇ ଗତି କରିବାକୁ ପଡିଛି, ଏସବୁ ମଧ୍ୟରେ, ଭାରତ-ରୁଷ ବନ୍ଧୁତା ଏକ ଧ୍ରୁବତାରା ପରି ରହିଛି ।"

"ଆମେ ୨୦୩୦ ପର୍ଯ୍ୟନ୍ତ ଭାରତ-ରୁଷ ଆର୍ଥିକ ସହଯୋଗ କାର୍ଯ୍ୟକ୍ରମ ଜାରି ରଖିବାକୁ ସହମତ ହୋଇଛୁ ।"

"ପୁଟିନ ଏବଂ ମୁଁ ଭାରତ-ରୁଷ ବ୍ୟବସାୟ ଫୋରମରେ ଯୋଗଦେବାର ସୁଯୋଗ ପାଇବୁ ।"

"ସମ୍ପ୍ରତି ଦୁଇଟି ନୂତନ ରୁଷ-ଭାରତୀୟ କନସୁଲେଟ୍ ଖୋଲାଯାଇଛି, ଏହା ପାରସ୍ପାରିକ ସମ୍ପର୍କକୁ ବୃଦ୍ଧି କରିବ । ଚଳିତ ବର୍ଷ ଅକ୍ଟୋବରରେ ଲକ୍ଷ ଲକ୍ଷ ତୀର୍ଥଯାତ୍ରୀ କାଲମିକିଆରେ ଭଗବାନ ବୁଦ୍ଧଙ୍କ ପବିତ୍ର ସ୍ତମ୍ଭ ପରିଦର୍ଶନ କରିଥିଲେ । ଆମେ ରୁଷ ନାଗରିକଙ୍କ ପାଇଁ ୩୦-ଦିନିଆ ଇ-ଟୁରିଷ୍ଟ ଭିସା ଏବଂ ୩୦-ଦିନିଆ ଗ୍ରୁପ ଇ-ଭିସା ପ୍ରଚଳନ କରିବାକୁ ଯାଉଛୁ ।"

"ଭାରତ ଆରମ୍ଭରୁ ୟୁକ୍ରେନ ପ୍ରସଙ୍ଗରେ ଶାନ୍ତି ପାଇଁ ସମର୍ଥନ କରିଆସିଛି । ଏହି ମାମଲାର ଶାନ୍ତିପୂର୍ଣ୍ଣ ଏବଂ ସ୍ଥାୟୀ ସମାଧାନ ପାଇଁ କରାଯାଉଥିବା ସମସ୍ତ ପ୍ରୟାସକୁ ଆମେ ସ୍ୱାଗତ କରୁଛୁ । ଭାରତ ଯୋଗଦାନ ଦେବାକୁ ପ୍ରସ୍ତୁତ ଅଛି ଏବଂ ଭବିଷ୍ୟତରେ ମଧ୍ୟ ଏହା ଜାରି ରଖିବ ।"

"ଆତଙ୍କବାଦ ବିରୋଧରେ ଲଢ଼େଇରେ ରୁଷ ସହଯୋଗ କରିଛି । ପହଲଗାମ୍ ହେଉ କିମ୍ବା କ୍ରୋକସ୍ ସିଟି ହଲ୍ ଉପରେ ଆକ୍ରମଣ, ଏସବୁର ମୂଳ ସମାନ । ଆତଙ୍କବାଦ ମାନବତାର ମୂଲ୍ୟବୋଧ ଉପରେ ସିଧାସଳଖ ଆକ୍ରମଣ ଏବଂ ଏଥିରେ ବିଶ୍ୱ ଏକତା ଆମର ଶକ୍ତି ।"

ପୁଟିନଙ୍କ ବୟାନର ୭ଟି ଗୁରୁତ୍ୱପୂର୍ଣ୍ଣ କଥା

ପୁଟିନ କହିଛନ୍ତି, "ରୁଷ ଏବଂ ଭାରତ ମଧ୍ୟରେ ପାରସ୍ପରିକ ସମ୍ପର୍କ ବହୁତ ମଜଭୁତ । ଆମର ପାରସ୍ପରିକ ସମ୍ପର୍କ ଆର୍ଥିକ ସମେତ ସବୁଠି ମଜଭୁତ ହେଉଛି ।"

"ଆମେ ଟ୍ରେନ, ନିବେଶ ଏବଂ ପ୍ରଯୁକ୍ତିବିଦ୍ୟା ଉପରେ ଆଲୋଚନା ସହିତ ଆଗକୁ ବଢ଼ୁଛୁ । ରୁଷ ଏବଂ ଇଣ୍ଡିଆନ ଇକୋନୋମିକ ସହଯୋଗ ସଂଗଠନ ଏକାଠି କାମ କରୁଛନ୍ତି ।"

"ଆମେ ଭାରତର ବିକାଶ ପାଇଁ ଆବଶ୍ୟକ ତେଲ, ଗ୍ୟାସ୍ ସବୁକିଛି ଯୋଗାଇବାକୁ ପ୍ରସ୍ତୁତ । ଆମେ ଉର୍ଜା ପାଇଁ ସମସ୍ତ ପ୍ରକାରର ସହଯୋଗ ଯୋଗାଇବାକୁ ଚାହୁଁଛୁ ।"

"ରୁଷରେ ଭାରତୀୟ ସିନେମା ବହୁତ ଲୋକପ୍ରିୟ । ଟଙ୍କାର ବ୍ୟବହାର ପରିସର ମଧ୍ୟ ବୃଦ୍ଧି ପାଇଛି ।"

"ଭାରତ ମଧ୍ୟ ବ୍ରିକ୍ସ ପାଇଁ ଗୁରୁତ୍ୱପୂର୍ଣ୍ଣ ପ୍ରୟାସ କରିଛି । ବାଣିଜ୍ୟ ଏବଂ ପ୍ରଯୁକ୍ତିବିଦ୍ୟା ଆମର ପ୍ରମୁଖ ପ୍ରାଥମିକତା । ଆମେ ରୁଷ ଏବଂ ଭାରତର ଲୋକଙ୍କ ପାଇଁ ପାରସ୍ପରିକ ସମ୍ପର୍କକୁ ସୁଦୃଢ଼ କରିବା ଜାରି ରଖିବୁ ।"

"ଆମେ ସର୍ବବୃହତ ଭାରତୀୟ ପରମାଣୁ ପ୍ଲାଣ୍ଟ ନିର୍ମାଣ ଉପରେ ମଧ୍ୟ କାମ କରୁଛୁ । ଛଅଟି ରିଆକ୍ଟର ମଧ୍ୟରୁ ତିନୋଟି ଶକ୍ତି ନେଟୱାର୍କ ସହିତ ସଂଯୁକ୍ତ ହୋଇସାରିଛି । ଚାରିଟି ଏପର୍ଯ୍ୟନ୍ତ ନିର୍ମାଣାଧୀନ ଅଛି । ଏଗୁଡ଼ିକ ଭାରତର କାରଖାନା ଏବଂ ଘରକୁ ସ୍ୱଚ୍ଛ ଉର୍ଜା ଯୋଗାଇବାରେ ସାହାଯ୍ୟ କରିବ ।"

"ରୁଷ ଏବଂ ଭାରତ, BRICS, SCO ଏବଂ ବିଶ୍ୱର ବହୁସଂଖ୍ୟକ ଦେଶଗୁଡ଼ିକର ସମାନ ଚିନ୍ତାଧାରା ଥିବା ଦେଶମାନଙ୍କ ସହିତ ଏକ ସ୍ୱାଧୀନ ଏବଂ ଆତ୍ମନିର୍ଭରଶୀଳ ବୈଦେଶିକ ନୀତି ଅନୁସରଣ କରୁଛନ୍ତି... ଆମେ ଜାତିସଂଘରେ ନିହିତ ଆଇନର ଶାସନର ମୁଖ୍ୟ ନୀତିକୁ ରକ୍ଷା କରୁଛୁ ।"

ବୈଠକ କାହିଁକି ଗୁରୁତ୍ୱପୂର୍ଣ୍ଣ?

ଦୁଇ ଦେଶର ରଣନୀତିକ ସହଭାଗୀତାର ୨୫ତମ ବର୍ଷ ପୂର୍ତ୍ତି ଉପଲକ୍ଷେ ୨୩ତମ ଭାରତ-ରୁଷ ବାର୍ଷିକ ଶିଖର ସମ୍ମିଳନୀ ହୋଇଥିଲା । ଏହି ଶିଖର ସମ୍ମିଳନୀର ଆୟୋଜନ ସମୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆମେରିକା ୟୁକ୍ରେନ ଶାନ୍ତି ଚୁକ୍ତି ପାଇଁ ଜୋର ଦେଉଥିବାବେଳେ ଏବଂ ଭାରତ ଉପରେ ରୁଷୀୟ ତୈଳ କ୍ରୟ କରିବା ପାଇଁ ଶୁଳ୍କ ଚାପ ପକାଇଛି । ୟୁକ୍ରେନରେ ପ୍ରାୟ ଚାରି ବର୍ଷ ଧରି ଚାଲିଥିବା ଯୁଦ୍ଧ ମଧ୍ୟରେ ଭାରତ କିପରି ରୁଷ ଏବଂ ଆମେରିକା ମଧ୍ୟରେ ନିଜର ସ୍ଥିତିକୁ ସନ୍ତୁଳିତ କରୁଛି ତାହା ମଧ୍ୟ ପରୀକ୍ଷା କରିବ ।