ପାଟଣାଗଡ ୨୧/୩: ବନ୍ଧୁତାରେ ଲାଗିଲା ରକ୍ତର ଛିଟା । କେଇଟା ଟଙ୍କା ପାଇଁ ମର୍ଡର । ସାଙ୍ଗର କାଠ ଫାଳିଆରେ ଗଲା ସାଙ୍ଗର ଜୀବନ ।ହତ୍ୟା ପରେ ଫେରାର ହୋଇଯାଇଛି ଅଭିଯୁକ୍ତ । ବଲାଙ୍ଗୀର ଖପ୍ରାଖୋଲ ଥାନା ପୁତୁଲାମହୁଳ ଗାଁରୁ ଆସିଛି ବୀଭତ୍ସ ହତ୍ୟାକାଣ୍ଡର ଖବର । ସାମାନ୍ୟ ବଚସାରୁ ଜଣେ ସାଙ୍ଗ ନିଜ ସାଙ୍ଗର ଜୀବନ ନେଇଯାଇଛି ।
ମୃତକ ବନେଇପଦର ଗାଁର ସୁଶୀଲ ସାହୁ । ଗୁରୁବାର ସୁଶୀଲ ପୁତୁଲାମହୁଲ ଗାଁର ପିଣ୍ଟୁ ସାହୁଙ୍କ ପାଖକୁ ଯାଇଥିଲେ ।ସେଠାରେ ଉଭୟ ବସି ମଦ ପିଇଥିଲେ । ତେବେ ଟଙ୍କା ନେଣଦେଣକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଝଗଡା ଧିରେ ଧିରେ ଉଗ୍ରରୂପ ନେଇଥିଲା । ପିଣ୍ଟୁ ଏକ ଠେଙ୍ଗାରେ ସୁଶୀଲଙ୍କୁ ଆକ୍ରମଣ କରିଥିଲା । ଘଟଣାସ୍ଥଳରେ ସୁଶୀଲଙ୍କର ମୃତ୍ୟୁ ହୋଇଯାଇଥିଲା । ତେବେ ପିଣ୍ଟୁଙ୍କ ଆକ୍ରମଣରେ ସୁଶୀଲଙ୍କ ଭାଇ ବିକାଶ ସାହୁ ଗୁରୁତର ହୋଇଛନ୍ତି । ତାଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି ।
ସ୍ଥାନୀୟ ଲୋକଙ୍କ କହିବା କଥା ସୁଶୀଲ ଓ ପିଣ୍ଟୁ ଭଲ ସାଙ୍ଗ ଥିଲେ । କେଉଁ କାରଣ ପାଇଁ ଏପରି ଘଟଣା ଘଟିଲା ତାହା ସ୍ପଷ୍ଟ ହୋଇନି । ତେବେ ଟଙ୍କା ନେଣଦେଣକୁ ନେଇ ବଚସାରୁ ହତ୍ୟାକାଣ୍ଡ ଘଟିଥିବା ପ୍ରାଥମିକ ତଦନ୍ତରୁ ସୁରାକ ପାଇଛି ପୋଲିସ । ଏବେ ଅଭିଯୁକ୍ତ ପିଣ୍ଟୁ ଫେରାର ଥିବାବେଳେ ଛାନ୍ଭିନ୍ ଜାରି ରଖିଛି ପୋଲିସ । ତାକୁ ଧରିବାକୁ ବିଭିନ୍ନ ସ୍ଥାନରେ ଚଢାଉ କରୁଛି ପୋଲିସ । ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳାଇ ଦେଇଛି ।
