ଭଦ୍ରକ ୨୫/୦୮: ଭଦ୍ରକ ଜିଲ୍ଲାରେ ପୁଣି ବନ୍ୟା ସ୍ଥିତି ସୃଷ୍ଟି ହୋଇଛି । ବୈତରଣୀ ନଦୀରେ ବନ୍ୟା ଜଳ ରବିବାର କମିଥିବା ବେଳେ ପୁଣି ବିଳମ୍ବିତ ରାତିରେ ବଢିବାରେ ଲାଗିଛି । କେନ୍ଦୁଝର ଓ ଆନନ୍ଦପୁରରେ ଲଗାଣ ବର୍ଷା ଭଦ୍ରକରେ ବନ୍ୟା ସ୍ଥିତି ସୃଷ୍ଟି କରିଛି । ଭଦ୍ରକ ଜିଲ୍ଲାର ଆଖୁଆପଦା ଅନିକଟ ନିକଟରେ ବିପଦ ସଙ୍କେତ ୧୮.୩୩ ମିଟର ଥିବା ବେଳେ ସଖାଳ ସୁଦ୍ଧା ୧୮.୮୬ମିଟରରେ ବନ୍ୟା ଜଳ ପ୍ରବାହିତ ହେଉଛି ।
ଭଦ୍ରକ ଜିଲ୍ଲାର ଭଣ୍ଡାରିପୋଖରୀ ବ୍ଲକର କଣ୍ଟି ଘାଇ, ଧାମନଗର ବ୍ଲକର ମଲ୍ଲି ମହାରା ଓ ଗୌରାଙ୍ଗ ପୁର ଏସକେପ ଦେଇ ବନ୍ୟା ଜଳ ଚାଷ ଜମିକୁ ମାଡ଼ିଚି । କେତେକ ସ୍ଥାନରେ ନଦୀ ବନ୍ଧ ପ୍ରଭାବିତ ହୋଇଥିବା ସୁଚନା ମିଳିଛି । ବାଲିବସ୍ତା ଓ ବଲ୍ଲା ଦେଇ ବନ୍ଧ ସୁରକ୍ଷା କରାଯାଉଛି । ଏହି ବନ୍ୟାରେ ଭଣ୍ଡାରିପୋଖରୀ ବ୍ଲକର ଆଂଶିକ, ଧାମନଗର, ତିହିଡି ଓ ଚାନ୍ଦବାଲି ବ୍ଲକ ପ୍ରଭାବିତ ହେବା ଆଶଙ୍କା କରାଯାଉଛି । ସମ୍ଭାବ୍ୟ ବନ୍ୟା ସ୍ଥିତିକୁ ଦେଖି ଆଗୁଆ ପଦକ୍ଷେପ ନେଇଛି ଜିଲ୍ଲା ପ୍ରଶାସନ।
ଧାମନଗର ବ୍ଲକର ଦୁଇ ଦିନ ଅଙ୍ଗନବାଡ଼ି ବନ୍ଦ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ଧାମନଗର ବ୍ଲକ ହସନାବାଦ୍ ଓ ଅର୍ଜୁନପୁର ପଞ୍ଚାୟତର ସମସ୍ତ ଅଙ୍ଗନୱାଡ଼ି କେନ୍ଦ୍ରକୁ ସୋମବାର ଓ ମଙ୍ଗଳବାର ଦିନ ବନ୍ଦ୍ ରଖିବା ନେଇ ଜିଲ୍ଲାପାଳଙ୍କ ନିର୍ଦ୍ଦେଶ ଦିଆଯାଇଛି । ସମାନ ଭାବେ ଅର୍ଜୁନପୁର, ହସନାବାଦ୍ ଶୋହଡା ଓ ପଧାନି ପଞ୍ଚାୟତର ୨୫ ସ୍କୁଲ କୁ ଦୁଇ ଦିନ ପାଇଁ ଛୁଟି ଘୋଷଣା କରାଯାଇଛି । ଅନେକ ପଞ୍ଚାୟତ ଜଳ ଘେରରେ ରହିଛନ୍ତି ।
