ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ୍ ଟିମ୍ର କମାଲ। ତୃତୀୟ ଦିନିକିଆରେ ଆୟର୍ଲାଣ୍ଡକୁ ୩୦୪ ରନ୍ ବ୍ୟବଧାନରେ ପରାସ୍ତ କଲା ଭାରତ। ଏହିପରି ଭାବରେ ସ୍ମୃତି ମନ୍ଦାନାଙ୍କ ନେତୃତ୍ୱଧୀନ ଭାରତୀୟ ଦଳ ଦିନିକିଆ ସିରିଜକୁ ୩-୦ରେ ଜିତିନେଇଛି। ଆୟର୍ଲାଣ୍ଡ ବିପକ୍ଷ ସିରିଜ୍ ଜିତିବା ପରେ ଭାରତୀୟ ମହିଳା ଦଳର ଖେଳାଳିମାନେ ଜୋରଦାର ସେଲିବ୍ରେସନ କରିଥିଲେ। ବିସିସିଆଇ ସୋସିଆଲ ମିଡିଆରେ ଭାରତୀୟ ଖେଳାଳିଙ୍କ ଉତ୍ସବର ଭିଡିଓ ସେୟାର କରିଛି। ଏହି ଭିଡିଓରେ ଭାରତୀୟ ଖେଳାଳିମାନେ ଉତ୍ସବ ପାଳନ କରୁଥିବା ଦେଖିବାକୁ ମିଳିବ। ତେବେ ଏହି ଭିଡିଓ ସୋସିଆଲ ମିଡିଆରେ ଅନେକ ହେଡଲାଇନ ହାସଲ କରୁଛି।
ପ୍ରକାଶଥାଉକି ପ୍ରଥମେ ବ୍ୟାଟିଂ କରିବାକୁ ଆସିଥିବା ଭାରତୀୟ ଦଳ ୫୦ ଓଭରରେ ୫ ୱିକେଟ୍ ପାଇଁ ୪୩୫ ରନ୍ ସଂଗ୍ରହ କରିଥିଲେ। ଦିନିକିଆ ଫର୍ମାଟରେ ଭାରତୀୟ ମହିଳା ଦଳର ଏହା ସର୍ବାଧିକ ସ୍କୋର। ଏଥି ସହିତ ମହିଳା ଦିନିକିଆ ଇତିହାସରେ ଏହା ହେଉଛି ତୃତୀୟ ସର୍ବାଧିକ ସ୍କୋର।
ଜବାବରେ ଆୟର୍ଲାଣ୍ଡ ଦଳ ବ୍ୟାଟିଂ କରିବାକୁ ମୈଦାନକୁ ଓହ୍ଲାଇଥିଲା। ୩୧.୪ ଓଭରରେ ମାତ୍ର ୧୩୧ ରନରେ ସୀମିତ ରହିଥିଲା ଆୟର୍ଲାଣ୍ଡ। ଭାରତୀୟ ଦଳ ୩୦୪ ରନରେ ଏକ ବଡ଼ ବିଜୟ ହାସଲ କରିଥିଲା। ଦିନିକିଆ ଇତିହାସରେ ଏହା ଭାରତୀୟ ମହିଳା ଦଳର ସବୁଠାରୁ ବଡ ବିଜୟ। ପ୍ରଥମେ ବ୍ୟାଟିଂ କରିବାକୁ ଆସିଥିବା ଭାରତୀୟ ଓପନର୍ ପ୍ରତୀକ ରାୱଲ ଏବଂ ସ୍ମୃତି ମନ୍ଦାନା ଶତକ ହାସଲ କରିଥିଲେ।
ପ୍ରତିକା ରାୱଲ ୧୨୯ ବଲରେ ୧୫୪ ରନ୍ ସଂଗ୍ରହ କରିଥିଲେ। ସେ ତାଙ୍କ ଇନିଂସରେ ୨୦ ଚୌକା ଓ ଗୋଟିଏ ଛକା ମାରିଥିଲେ। ଏହା ବ୍ୟତୀତ ଭାରତୀୟ ଅଧିନାୟକ ସ୍ମୃତି ମନ୍ଦାନା ୮୦ ବଲରେ ୧୩୫ ରନର ଚମତ୍କାର ଇନିଂସ ଖେଳିଥିଲେ। ଭାରତୀୟ ଅଧିନାୟକ ତାଙ୍କ ଇନିଂସରେ ୧୨ ଚୌକା ଓ ୭ ଛକା ମାରିଥିଲେ। ଭାରତୀୟ ଦଳର ୱିକେଟ୍ କିପର ବ୍ୟାଟ୍ସମ୍ୟାନ୍ ରିଚା ଘୋଷ ୪୨ ବଲରେ ୫୯ ରନ୍ ସଂଗ୍ରହ କରିଥିଲେ। ଏହି ସିରିଜରେ ବ୍ୟାଟିଂ କରି ପ୍ରଭାବିତ ହୋଇଥିବା ପ୍ରତୀକ ରାଭାଲଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ଏବଂ ପ୍ଲେୟାର ଅଫ୍ ଦି ସିରିଜ ପ୍ରଦାନ କରାଯାଇଥିଲା।
