ମୁମ୍ଵାଇ ୦୯।୧୨; ଅଲ୍ଲୁ ଅର୍ଜୁନ ଏବଂ ରଶ୍ମିକା ମନ୍ଦନାଙ୍କ ଫିଲ୍ମ 'ପୁଷ୍ପା ଦ ରୁଲ' ବକ୍ସ ଅଫିସ୍ରେ ଧମାଲ କରୁଛି। ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ଏକ ଭିନ୍ନ କ୍ରେଜ୍ ଦେଖିବାକୁ ମିଳୁଛି । ରିଲିଜ୍ ହେବାର ଗୋଟିଏ ଦିନ ପୂର୍ବରୁ, ଡିସେମ୍ବର ୪ରେ, ହାଇଦ୍ରାବାଦର ସନ୍ଧ୍ୟା ଥିଏଟରରେ 'ପୁଷ୍ପା ୨'ର ସ୍ପେଶାଲ ସ୍କ୍ରିନିଂ ହୋଇଥିଲା । ଯେଉଁଥିରେ ବହୁ ସଂଖ୍ୟାରେ ଲୋକ ଏକତ୍ରିତ ହୋଇଥିଲେ। ଏହି ସମୟରେ ଜଣେ ମହିଳା ଦଳାଚକଟାରେ ଜୀବନ ହରାଇଥିଲେ। ବର୍ତ୍ତମାନ ପୋଲିସ ଏ ବାବଦରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ପୋଲିସ ୩ ଜଣଙ୍କୁ ଗିରଫ କରିଛି
ସୂଚନାନୁସାରେ, 'ପୁଷ୍ପା ୨'ର ସ୍କ୍ରିନିଂ ସମୟରେ ସନ୍ଧ୍ୟା ଥିଏଟରରେ ଘଟିଥିବା ଦୁର୍ଘଟଣା ସମ୍ପର୍କରେ ହାଇଦ୍ରାବାଦ ପୋଲିସ କାର୍ଯ୍ୟାନୁଷ୍ଠାନରେ ଅଛି। ଏହି ମାମଲାରେ ପୋଲିସ ତିନି ଜଣଙ୍କୁ ଗିରଫ କରିଛି। ଗିରଫ ହୋଇଥିବା ବ୍ୟକ୍ତିଙ୍କ ମଧ୍ୟରେ ସନ୍ଧ୍ୟା ଥିଏଟର ମାଲିକ ସନ୍ଦୀପ, ସିନିୟର ମ୍ୟାନେଜର ନାଗରାଜୁ ଏବଂ ମ୍ୟାନେଜର ବିଜୟ ଚନ୍ଦ୍ର ଅଛନ୍ତି। ତାଙ୍କୁ କୋର୍ଟରେ ହାଜର କରାଯାଇଥିଲା। ଏହି ତିନି ଜଣଙ୍କୁ ବର୍ତ୍ତମାନ ନ୍ୟାୟିକ ହେପାଜତକୁ ପଠାଯାଇଛି। ବିଏନ୍ଏସ୍ ଆକ୍ଟର ଧାରା ୧୦୫, ୧୧୮ (1) r / w ୩ (୫) ଅନୁଯାୟୀ ପୋଲିସ ଏକ ମାମଲା ରୁଜୁ କରିଛି।
ଥିଏଟର ପରିଚାଳନାରେ ଅବହେଳା ହେତୁ ସ୍କ୍ରିନିଂ ସମୟରେ ଏକ ଦଳାଚକଟା ହୋଇଥିଲା ବୋଲି ପୋଲିସ କହିଛି। ଚିକ୍କାଡପାଲି ଡିଭିଜନର ଏସିପି କହିଛନ୍ତି - ଦର୍ଶକଙ୍କୁ ସଠିକ୍ ସୂଚନା ଦେବାରେ ଥିଏଟର ପରିଚାଳନା ସମ୍ପୂର୍ଣ୍ଣ ବିଫଳ ହୋଇଥିଲା, ଯେଉଁ କାରଣରୁ ସେଠାରେ ଏହି ଦୁର୍ଘଟଣା ଘଟିଥିଲା ।
