ଭୂବନେଶ୍ୱର: ବାଲୁକା କଳାରେ ‘ଆର୍ଥ ଆଓ୍ଵାର’ ଓ ଜଳ ସଂରକ୍ଷଣର ବାର୍ତ୍ତା ଦେଲେ ପ୍ରଖ୍ୟାତ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ। ଦୁଇଟି ଅଭିଯାନ ମାଧ୍ୟମରେ ପ୍ରକୃତି ସଂରକ୍ଷଣର ବାର୍ତ୍ତା ଦିଆଯାଉଥିବାବେଳେ, ପୁରୀ ବେଳାଭୂମିରେ "ସ୍ୱିଚ୍ ଅଫ୍, ବି ଓ୍ଵାଟର ଓ୍ଵାଇଜ୍" ସନ୍ଦେଶ ସହିତ ଏକ ବାଲୁକା ଶିଳ୍ପ ନିର୍ମାଣ କରିଛନ୍ତି ପଦ୍ମଶ୍ରୀ ସୁଦର୍ଶନ ପଟ୍ଟନାୟକ। ଏହାକୁ ନେଇ ସୁଦର୍ଶନ କହିଛନ୍ତି, "ଆମର ସାମୂହିକ ପ୍ରୟାସ ଜଳ ସଂରକ୍ଷଣ ଏବଂ ପରିଚାଳନାରେ ଗୁରୁତ୍ୱପୂର୍ଣ୍ଣ ଭୂମିକା ନେଇପାରେ।"
ବାଲୁକା ଶିଳ୍ପଟି ୬ ଫୁଟ ଉଚ୍ଚ ହୋଇଥିବା ବେଳେ ଏଥିରେ ଦୁଇଟି ବିଷୟବସ୍ତୁ ପ୍ରଦର୍ଶିତ ହୋଇଛି। ପ୍ରଥମ ବିଷୟବସ୍ତୁ ମାର୍ଚ୍ଚ ୨୨ ସନ୍ଧ୍ୟା ୮:୩୦ ରୁ ୯:୩୦ ପର୍ଯ୍ୟନ୍ତ ଲାଇଟ୍ ବନ୍ଦ କରିବାକୁ ନେଇ ହୋଇଥିବାବେଳେ ଦ୍ୱିତୀୟ ବିଷୟ ଭାବେ ଜଳ ସଂରକ୍ଷଣ ପାଇଁ ସଚେତନ ରହିବାକୁ ସନ୍ଦେଶ ଦିଆଯାଇଛି। ଏହାକୁ ନିର୍ମାଣ ପାଇଁ ପ୍ରାୟ ୭ ଟନର ବାଲି ବ୍ୟବହାର କରାଯାଇଛି। ସୁଦର୍ଶନଙ୍କ ପ୍ରତିଷ୍ଠାନର ଛାତ୍ରମାନେ ମଧ୍ୟ ଏହି କାର୍ଯ୍ୟରେ ସହଯୋଗ କରିଛନ୍ତି।
ଚଳିତ ବର୍ଷର ଆର୍ଥ ଆଓ୍ଵାରର ଥିମ୍ ହେଉଛି "ପ୍ରକୃତିର ଶକ୍ତି"। ଯାହା ଜଳବାୟୁ ପରିବର୍ତ୍ତନ ବିରୋଧରେ ଲଢ଼ିବା ଏବଂ ପ୍ରାକୃତିକ ସମ୍ପଦର ସୁରକ୍ଷା ଉପରେ ଗୁରୁତ୍ୱ ଦେଇଛି। WWFର ଆର୍ଥ ଆଓ୍ଵାର ହେଉଛି ପୃଥିବୀ ପାଇଁ ସବୁଠାରୁ ବଡ଼ ଜନ ଆନ୍ଦୋଳନ। ୧୯୦ରୁ ଅଧିକ ଦେଶର ଲୋକମାନେ ଏକ ଘଣ୍ଟା ପାଇଁ ଅଣଜରୁରୀ ଆଲୋକ ବନ୍ଦ କରି ସାମୂହିକ ପ୍ରୟାସରେ ଶକ୍ତି ସଞ୍ଚୟ କରିଥାନ୍ତି।
ସୂଚନାଥାଉକି, ସୁଦର୍ଶନ ପଟ୍ଟନାୟକଙ୍କୁ WWF ଇଣ୍ଡିଆ ଦ୍ୱାରା ‘ଆର୍ଥ ଆଓ୍ଵାର’ ଏବଂ ବିଶ୍ୱ ଜଳ ଦିବସ ୨୦୨୫ ପାଇଁ ବ୍ରାଣ୍ଡ ଆମ୍ବାସାଡର ଭାବେ ଘୋଷଣା କରାଯାଇଛି। ତାଙ୍କ ସହିତ ଦିୟା ମିର୍ଜା ଏବଂ ରବିର ବ୍ରାର ପରି ଅନ୍ୟ ବିଶିଷ୍ଟ ବ୍ୟକ୍ତିଙ୍କ ମଧ୍ୟ ଆମ୍ବାସଡର ଅଛନ୍ତି।
ପଦ୍ମ ପୁରସ୍କାର ପ୍ରାପ୍ତ ଶିଳ୍ପୀ ସୁଦର୍ଶନ ଏ ପର୍ଯ୍ୟନ୍ତ ବିଶ୍ୱର ୬୫ରୁ ଅଧିକ ଆନ୍ତର୍ଜାତୀୟ ବାଲୁକା ଶିଳ୍ପ ଚାମ୍ପିଅନସିପ୍ ଓ ଉତ୍ସବରେ ଭାଗ ନେଇ ଦେଶ ପାଇଁ ଅନେକ ପୁରସ୍କାର ଜିତିଛନ୍ତି। ସେ ସର୍ବଦା ନିଜ ବାଲୁକା ଶିଳ୍ପ ମାଧ୍ୟମରେ HIV/AIDS, କୋଭିଡ୍-୧୯, ଗ୍ଲୋବାଲ ଓ୍ଵାର୍ମିଂ, ଆତଙ୍କବାଦ ନିରୋଧ, ପ୍ଲାଷ୍ଟିକ ପ୍ରଦୂଷଣ ରୋକିବା ଏବଂ ପରିବେଶ ସୁରକ୍ଷା ଭଳି ସଚେତନତା ପୂର୍ଣ୍ଣ ସନ୍ଦେଶ ପ୍ରଚାର କରି ଆସୁଛନ୍ତି।
