ଚମ୍ପୁଆ ୧୨/୦୪: କୁନି କୁନି ପିଲାମାନେ ଅଟୋରେ ଯାଉଥିଲେ ସ୍କୁଲ । ହଠାତ ଗାଁ ମୁଣ୍ଡରେ କୁଆଡୁ ମାଡି ଆସିଲେ ଶହ ଶହ ମହୁମାଛି । ପିଲାଙ୍କୁ ଗୋଡାଇ ଗୋଡାଇ ବିନ୍ଧିଲେ । କେନ୍ଦୁଝର ଜିଲ୍ଲା ଚମ୍ପୁଆ ହୁଞ୍ଜପଶି ଗାଁରେ ଆତଙ୍କ ଖେଳାଇଛନ୍ତି ମହୁମାଛି । ମହୁମାଛି ଆକ୍ରମଣରେ ୮ଜଣ ଛାତ୍ରଛାତ୍ରୀ ଆହତ ହୋଇଛନ୍ତି । ସମସ୍ତ ଛାତ୍ରଛାତ୍ରୀ କାଳିକାପ୍ରସାଦ ସରସ୍ବତୀ ଶିଶୁ ବିଦ୍ୟା ମନ୍ଦିରର ।
ପିଲାମାନେ ହୁଞ୍ଜପଶି ଗାଁରୁ ଏକ ଅଟୋରେ ସ୍କୁଲକୁ ଯିବାବେଳେ ଘଟିଛି ଅଘଟଣ । ହଠାତ ଆକ୍ରମଣ କରିଥିଲେ ମହୁମାଛି । ପ୍ରାଣ ବିକଳରେ ଯିଏ ଯୁଆଡେ ପାରିଲେ ଧାଇଁଲେ । ହେଲେ ମହୁମାଛି କଣ ଛାଡନ୍ତି । ଗୋଡାଇ ଗୋଡାଇ ପିଲାଙ୍କୁ ବିନ୍ଧିଲେ । ଏଥିରେ ପିଲାଙ୍କ କାନ,ବେକ ଓ ହାତ ଫୁଲିଯାଇଛି । ଅଟୋ ଡ୍ରାଇଭର ମଧ୍ୟ ସାମାନ୍ୟ ଆହତ ହୋଇଛନ୍ତି । ସମସ୍ତଙ୍କୁ ଚିକିତ୍ସା ପାଇଁ ଚମ୍ପୁଆ ଉପଖଣ୍ଡ ମେଡିକାଲରେ ଭର୍ତ୍ତି କରାଯାଇଛି ।
