ନୂଆଦିଲ୍ଲୀ: ଆକାଶ ଏୟାରରେ ପାଇଲଟଙ୍କ ପଳାୟନ ଯୋଗୁ ବିମାନ କମ୍ପାନୀରେ ଏବେ ଦୁରାବସ୍ଥା ଦେଖା ଦେଇଛି। ଜୁଲାଇ ମାସ ଠାରୁ ପାଇଲଟମାନେ ଚାକିରି ଛାଡ଼ୁଥିବାରୁ କମ୍ପାନୀ ୧୦ଟି ରୁଟ୍ରେ ବିମାନ ସେବା କମ୍ କରିଛି। ଏଥିସହିତ ୮ଟି ରୁଟ୍ରେ ବିମାନ ସେବାକୁ ସମ୍ପୂର୍ଣ୍ଣ ବନ୍ଦ କରିଦେଇଛି କମ୍ପାନୀ।
ବେସାମରିକ ବିମାନ ଚଳାଚଳ ବିଶ୍ଳେଷକ ସଂସ୍ଥା ସିରିୟମର ତଥ୍ୟ ଅନୁଯାୟୀ ବିମାନ ଜୁନ୍ର ୯୪୫ରୁ ଅକ୍ଟୋବରରେ ୭୫୪ କୁ ହ୍ରାସ ପାଇଛି।
ବର୍ତ୍ତମାନ ଆକାଶ ଏୟାର ଲାଇନ୍ ୩୪ଟି ରୁଟ୍ରେ ନିଜର ସେବା ଜାରି ରଖିଛି। ତେବେ ଜୁନ୍ରୁ ଅକ୍ଟୋବର ଭିତରେ କମ୍ପାନୀ ଅହମଦାବାଦ-କୋଚୀ, ଅହମଦାବାଦ-ହାଇଦ୍ରାବାଦ, ଅହମଦାବାଦ-ପୁଣେ, ବେଙ୍ଗାଲୁରୁ-ହାଇଦ୍ରାବାଦ, ବେଙ୍ଗାଲୁରୁ-ଚେନ୍ନାଇ, କୋଚି-ହାଇଦ୍ରାବାଦ, ଗୋଆ-ଲକ୍ଷ୍ନୌ ଏବଂ ଗୋଆ-ହାଇଦ୍ରାବାଦ ରୁଟ୍ରେ ସେବା ବନ୍ଦ କରିସାରିଛି।
ଜୁଲାଇ ଓ ସେପ୍ଟେମ୍ବର ମଧ୍ୟରେ କମ୍ପାନୀର ୪୩ ପାଇଲଟ ଚାକିରି ଛାଡ଼ି ଅନ୍ୟ ବିମାନ କମ୍ପାନୀରେ ଯୋଗ ଦେଇଛନ୍ତି। ଏମିତି ଚାକିରି ଛାଡ଼ିବା ପୂର୍ବରୁ ଥିବା ନିୟମ ୬- ବର୍ଷ ପାଇଁ ନୋଟିସ୍ ପିରିୟଡ୍ରେ ବି ସେମାନେ ରହି ନାହାନ୍ତି। ପାଇଲଟଙ୍କର ଏଭଳି ଚାକିରି ଛାଡ଼ିବାକୁ ନେଇ କମ୍ପାନୀ ଖପ୍ପା ହୋଇଛି। ଚାକିରି ଛାଡ଼ିଥିବା ୪୩ ଜଣଙ୍କ ମଧ୍ୟରୁ ୫ ଜଣଙ୍କ ବିରୁଦ୍ଧରେ କ୍ଷିତପୂରଣ ଦାବି କରି କମ୍ପାନୀ ବମ୍ବେ ହାଇକୋର୍ଟର ଦ୍ୱାରସ୍ଥ ହୋଇଛି। କମ୍ପାନୀ ବର୍ତ୍ତମାନ ୩୦ଟି ବି୭୩୭ ମାକ୍ସ ବିମାନ ଉଡ଼ାଉଛି।
