ନୂଆଦିଲ୍ଲୀ: ବଙ୍ଗୋପସାଗରରେ ଅବପାତ ପ୍ରଭାବରେ ଦକ୍ଷିଣ ଭାରତରେ ବର୍ଷା ବିତ୍ପାତ । ପ୍ରବଳ ବର୍ଷାରେ ବେହାଲ ହୋଇଛି ଆନ୍ଧ୍ର ପ୍ରଦେଶ ଓ ତେଲଙ୍ଗାନା । ଦୁଇ ଦିନ ଲଗାଣ ବର୍ଷା ଯୋଗୁ ବନ୍ୟା ସ୍ଥିତି ସୃଷ୍ଟି ହୋଇଛି । କେତେକ ସ୍ଥାନରେ ଭୂସ୍ଖଳନ ହୋଇଥିବା ଚିତ୍ର ସାମ୍ନାକୁ ଆସିଛି । ଫଳରେ ଯାତାୟାତର ସମସ୍ୟା ଭୋଗୁଛନ୍ତି ଲୋକେ । ବନ୍ୟାଜଳର ପ୍ରଖର ସ୍ରୋତରେ ରାସ୍ତାଘାଟ, ରେଳ ଧାରଣା ଧୋଇ ହୋଇଯାଇଛି । କିଛି ସ୍ଥାନରେ ଟ୍ରେନ୍ ଲାଇନ୍ ପାଣିରେ ବୁଡ଼ି ରହିଛି । ଯାହାଫଳରେ ଟ୍ରେନ୍ ଚଳାଚଳ ପ୍ରଭାବିତ ହୋଇଛି । ଦୁଇ ରାଜ୍ୟରେ ପ୍ରାୟ ୧୪୦ଟି ଟ୍ରେନକୁ ବାତିଲ୍ କରାଯାଇଛି । ବିମାନ ସେବା ମଧ୍ୟ ବନ୍ଦ ରହିଛି । ବନ୍ୟା ପରିସ୍ଥିତିକୁ ଦୃଷ୍ଟିରେ ରଖି ସ୍କୁଲ, କଲେଜ ଛୁଟି ଘୋଷଣା କରାଯାଇଛି ।
ଦୁଇଟି ରାଜ୍ୟରେ ପ୍ରାକୃତିକ ବିପର୍ଯ୍ୟୟ ଜନିତ ଦୁର୍ଘଟଣାରେ ମୃତ୍ୟୁ ସଂଖ୍ୟା ୧୯ରେ ପହଞ୍ଚିଛି । ଲଗାଣ ବର୍ଷା ଯୋଗୁ ଆନ୍ଧ୍ର ପ୍ରଦେଶ ଓ ତେଲଙ୍ଗାନାର ୧୧୦ଟି ଗାଁ ପାଣି ଘେରରେ ରହିଛି । ଆନ୍ଧ୍ର ପ୍ରଦେଶର ବିଜୟଓ୍ବାଡ଼ା, ମଛଲିପଟନମ୍, ଗୁଡ଼ିବଡ଼ା, କାଇକାଲୁରୁ, ନାରସପୁରମ, ଆମରାବତୀ, ମଙ୍ଗଳଗିରି, ନନ୍ଦିଗାମ ଓ ଭୀମାଭରମରେ ବିଶେଷ ଭାବେ ପ୍ରଭାବିତ ହୋଇଛି । ସେହିପରି ପ୍ରବଳ ବର୍ଷା ଯୋଗୁ ତେଲଙ୍ଗାନାର ହାଇଦ୍ରାବାଦ ସମେତ ମେହବୁବାବାଦସ ନାରାୟଣପେଟ୍, ଖମାମ, ଅଦିଲବାଦ, ନିଜାମାବାଦ, କମାରେଡ୍ଡୀ ଜିଲ୍ଲା ବେହାଲ ହୋଇଛି । ପ୍ରଶାସନ ପକ୍ଷରୁ ପ୍ରାୟ ୧୭ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ଉଦ୍ଧାର କରାଯାଇଛି । ବନ୍ୟା ବିତ୍ପାତ ପାଇଁ ପ୍ରାୟ ୨.୭୬ ଲକ୍ଷ ଲୋକ ପ୍ରଭାବିତ ହୋଇଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆନ୍ଧ୍ର ପ୍ରଦେଶ ଓ ତେଲଙ୍ଗାନା ମୁଖ୍ୟମନ୍ତ୍ରୀଙ୍କ ସହିତ ଆଲୋଚନା କରି ବନ୍ୟା ସ୍ଥିତି ସମୀକ୍ଷା କରିଛନ୍ତି । ଖୁବ୍ ଶୀଘ୍ର ଦୁଇ ରାଜ୍ୟକୁ ଜରୁରୀକାଳୀନ ରିଲିଫ୍ ସାମଗ୍ରୀ ପଠାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ଅନ୍ୟପଟେ ଉଦ୍ଧାର କାର୍ଯ୍ୟରେ ଏନଡିଆରଏଫ, ଏସଡିଆରଏଫ, ଅଗ୍ନିଶମ ବାହିନୀ, ପୋଲିସ ପ୍ରଶାସନ ଲାଗିପଡ଼ିଛନ୍ତି । ପଡୋଶୀ ରାଜ୍ୟରୁ ମଧ୍ୟ ରେସକ୍ୟୁ ଟିମ୍ ଦୁଇ ରାଜ୍ୟରେ ପହଞ୍ଚିଛନ୍ତି ।
