ବଣାଇ ୩୧/୦୧: ଗିରଫ ହୋଇପାରନ୍ତି ବଣେଇ ଆଇଟିଡିଏ ପ୍ରକଳ୍ପ ପ୍ରଶାସକ ବିଶ୍ଵଦର୍ଶୀ ସାହୁ। ଆୟ ବହିର୍ଭୁତ ସଂପତ୍ତି ଠୁଳ ମାମଲାରେ ତାଙ୍କ ଅଫିସ ସମେତ ୭ଟି ସ୍ଥାନରେ ଭିଜିଲାନ୍ସ ଚଢ଼ାଉ ପରେ ଆଖି ଖୋସିଲା ଭଳି ସଂପତ୍ତି ଠାବ କରିଛି ।
ଭିଜିଲାନ୍ସ ଟିମ ଯାଞ୍ଚ ସମୟରେ ଭୁବନେଶ୍ୱରରେ ଗୋଟିଏ ଦୁଇ ମହଲା କୋଠା ସହ ଗୋଟିଏ ଫ୍ଲାଟ, ଅର୍ଦ୍ଧ ନିର୍ମିତ ଦୁଇଟି ଫ୍ଲାଟ, ଭୁବନେଶ୍ୱର ଓ ପୁରୀରେ ୯ଟି ଦାମୀକିଆ ପ୍ଲଟ,୧୫୯ ଗ୍ରାମ ସୁନା ଗହଣା,ବିଭିନ୍ନ ବ୍ୟାଙ୍କରେ ୬୧ ଲକ୍ଷ ଟଙ୍କାର ଜମା,ନଗଦ ୪ ଲକ୍ଷ ୫୧ ହଜାର ଟଙ୍କା, ଗୋଟିଏ ଦାମୀ କାର ସହ ଆହୁରି ଅନେକ ସଂପତ୍ତି ଠାବ କରିବା ପରେ ସଂପୂର୍ଣ୍ଣ ଯାଞ୍ଚ ପ୍ରକ୍ରିୟା ଜାରି ରହିଛି।
ସୂଚନା ଥାଉକି, ଆଇ.ଟି.ଡି.ଏର ପ୍ରକଳ୍ପ ପ୍ରଶାସକ ବିଶ୍ୱଦର୍ଶୀ ସାହୁ । ବାବୁଙ୍କ ଆଖି ତରଟା ସମ୍ପତି ଦେଖି ଭିଜିଲାନ୍ସ ବି ତାଜୁବ । ବାବୁଙ୍କର ଉଭା ଯେତିକି ପୋତା ସେତିକି । ଖାଲି ଆଖିକୁ ସାଦା ସିଧା ଦେଖାଯାଉଥିବା ଏହି ସରକାରୀ ବାବୁ ଜଣେ କୋଟିପତି । ନୀରିହ ଆଦିବାସୀଙ୍କ ବିକାଶ ବା ଉନ୍ନୟନ ମୁଳକ କାମ ପାଇଁ ଆସିଥିବା ଟଙ୍କା ବାଟମାରଣା ଅଭିଯୋଗ ଆସିଥିଲା ।
ବିନା ଟଙ୍କାରେ ଫାଇଲ ଘୁଞ୍ଚାଉ ନଥିବା ଏହି କୋଟିପତି ଅଫିସରଙ୍କ ବିରୋଧରେ ମାଳ ମାଳ ପିଟିସନ୍ ଭିଜିଲାନ୍ସରେ ପଡି ଆସୁଥିଲା । ଲାଞ୍ଚ ନେଲା ବେଳେ, ଭିଜିଲାନ୍ସକୁ ଚକମା ଦେଇ ଛୁ ମାରୁଥିଲେ । ଆଉ ଆୟ ବହିର୍ଭୁତ ସମ୍ପତି ଠୁଳ ଅଭିଯୋଗରେ ଛାପା ମାରିବା ପରେ, ସାମନାକୁ ଆସିଛି ଏହି ଅମାପ ସମ୍ପତିର ଲମ୍ୱା ତାଲିକା । ଏମିତିକି ସମ୍ପର୍କୀୟଙ୍କ ନାମରେ କିଛି କାରବାର କରିଥିବାର ଗନ୍ଧ ଭିଜିଲାନ୍ସ ପାଇଛି। ସେମାନଙ୍କୁ ଖୁବଶୀଘ୍ର ସମ୍ପର୍କୀୟଙ୍କୁ ଭିଜିଲାନ୍ସ ଅଫିସକୁ ଘୋଷାଡିବ ବୋଲି ଚର୍ଚା ଜୋର ଧରିଛି।
