ଭୁବନେଶ୍ଵର: ବିଧାନସଭାରେ ଉପସ୍ଥାପିତ ହୋଇଛି  CAG ରିପୋର୍ଟ  । ପରିବେଶ ମଞ୍ଜୁରୀ ବିନା ଲୁହା ଓ ମାଙ୍ଗାନିଜ ଖନନ କରିବା ଅପରାଧରେ ଦଣ୍ଡ ସ୍ଵରୂପ  ଖଣି ଲିଜଧାରୀଙ୍କ ଠାରୁ ଆଦାୟ ହୋଇ ପାରିନି ୩ ହଜାର ୯ଶହ ୬୬କୋଟି ୩୪ଲକ୍ଷ ଟଙ୍କା । ଉଲଂଘନକାରୀ ଖଣି ଲିଜଧାରୀଙ୍କ  ଠାରୁ ସରକାର କ୍ଷତିପୂରଣ  ଆଦାୟ କରି ନଥିବା  CAG ରିପୋର୍ଟରେ ଉଲ୍ଲେଖ ରହିଛି । ସବୁଠୁ ବଡ଼ କଥା ସାତ ବର୍ଷର ସମୟ ସୀମା ଅତିକ୍ରାନ୍ତ ହେବା ପରେ ବି ଖଣି କମ୍ପାନି ଜରିମାନା ବାବଦ ରାଶି ଓଡ଼ିଶା ସରକାରଙ୍କୁ ପୈଠ କରି ନାହାନ୍ତି। 

ସିଏଜି ନିଜ ରିପୋର୍ଟରେ କହିଛି ଯେ, ସୁପ୍ରିମକୋର୍ଟ ୨୦୧୭ ଡିସେମ୍ବର ୩୧ ତାରିଖ ସୁଦ୍ଧା ଜରିମାନା ରାଶି ପୈଠ କରିବାକୁ ନିର୍ଦ୍ଦେଶ ଦେଇଥିଲେ। ସୁପ୍ରିମକୋର୍ଟ ଏହା ମଧ୍ୟ କହିଥିଲେ ଯେ, ମୋଟ୍ ଆଦାୟ ଜରିମାନା ରାଶିରୁ ୫୦ ପ୍ରତିଶତ ଅର୍ଥ ରାଜ୍ୟ ସରକାରଙ୍କ ଦ୍ଵାରା ଆଦିବାସୀ କଲ୍ୟାଣ ଓ ପାରିପାର୍ଶ୍ଵିକ ଅଞ୍ଚଳର ବିକାଶ କାର୍ଯ୍ୟରେ ବିନିଯୋଗ କରାଯାଉ। ଯଦ୍ଵାରା ଖଣି ଅଞ୍ଚଳର ବିକାଶ ହୋଇ ପାରିବ। ଓଡ଼ିଶା ସରକାର ସୁପ୍ରିମକୋର୍ଟଙ୍କ ଏକ କମିଟିର ପରାମର୍ଶକ୍ରମେ ୨୦୧୪ ଡିସେମ୍ବରରେ ଆଦିବାସୀ କଲ୍ୟାଣ ବିକାଶ ପାଇଁ ଏକ ଏସପିଭି ଗଠନ କରିଥିଲେ। ଏହାର ନାଁ ଓଡ଼ିଶା ମିନେରାଲ ବିୟରିଂ ଡେଭଲପମେଣ୍ଟ କର୍ପୋରେସନ ରଖାଯାଇଥିଲା। କିନ୍ତୁ ଏହାର ଆଶାନୁରୂପ କ୍ରିୟାନ୍ଵୟନ ହୋଇ ପାରିଲା ନାହିଁ। 

Also read: ଶାନ୍ତି ପ୍ରସ୍ତାବ ଦେଲେ ଲାଲବାହିନୀ, କହିଲେ- ସରକାର ମାନିଲେ ଯୁଦ୍ଧବିରତି ଘୋଷଣା କରିବୁ

ସେହିପରି ସିଏଜି ରିପୋର୍ଟ ଅନୁଯାୟୀ, ଲଘୁ ଖଣିଜ ପଦାର୍ଥ ଖନନରୁ ପ୍ରାପ୍ତ ରାଜସ୍ବ,ରାଜ୍ୟର ଅଣ-ଟିକସ ରାଜସ୍ବ ଏକ ମୁଖ୍ୟ ଉତ୍ସ । ଆର୍ଥିକ ବର୍ଷ ୨୦୧୫ରୁ ୨୦୨୨ ମଧ୍ୟରେ, ଲଘୁ ଖଣିଜରୁ ମୋଟ ରାଜସ୍ବ ୨ହଜାର ୯ଶହ ୬୮କୋଟି ୭୫ଲକ୍ଷ ଟଙ୍କା ଥିଲା । ୨୦୨୨ ମାର୍ଚ୍ଚ ୩୧ ସୁଦ୍ଧା  ୫୨୦ ଲଘୁ ଖଣିଜ ପଦାର୍ଥ ଉତ୍ସ ମଧ୍ୟରୁ ୧୪୭ ଉତ୍ସ କାର୍ଯ୍ୟକ୍ଷମ ଥିବାବେଳେ, ୩୭୩ ଉତ୍ସ କାର୍ଯ୍ୟକ୍ଷମ ହୋଇନଥିଲା ।

ଲଘୁ ଖଣିଜ କ୍ରୟ ଟ୍ରାନ୍ଜିଟ୍ ପାସ୍ ନଦେବା ପରିପ୍ରେକ୍ଷୀରେ ୮ଶହ ୬୪ କୋଟି ୪୫ଲକ୍ଷ ଟଙ୍କା ଖଣିଜ ରାଜସ୍ବର ବାଟମାରଣା ହୋଇଥିଲା ବୋଲି CAG  ରିପୋର୍ଟରେ ଉଲ୍ଲେଖ ରହିଛି । ଏଥି ସହ “ଲଘୁ ଖଣିଜ ଚୋରି ରୋକିବା ଏବଂ ଉଚ୍ଛେଦ କାର୍ଯ୍ୟକଳାପ”  ପ୍ରଭାବହୀନ ଥିଲା ବୋଲି ରିପୋର୍ଟରେ କୁହାଯାଇଛି ।