ନୂଆଦିଲ୍ଲୀ ୨୯।୪: ଭାରତୀୟ ବାୟୁସେନା (ଆଇଏଏଫ) ଗ୍ରୁପ କ୍ୟାପ୍ଟେନ ଶୁଭାଂଶୁ ଶୁକ୍ଳା ମେ ୨୯ ତାରିଖ ଦିନ ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସଏସ୍) ନିମନ୍ତେ ଉଡାଣ କରିବେ। ଶୁଭାଂଶୁ ଶୁକ୍ଳା ଏକ୍ସିଓମ-୪ର ମିସନ ପାଇଲଟ ହେବେ। ଏକ୍ସିଓମ ସ୍ପେସ୍ ଇଂକ ମଙ୍ଗଳବାର ଏହି ସୂଚନା ଦେଇଛି। ଏହା ପୂର୍ବରୁ ୧୯୮୪ ମସିହାରେ ୱିଂଗ କମାଣ୍ଡର ରାକେଶ ଶର୍ମା ସୋଭିଏତ ମିସନର ଅଂଶ ରୂପେ ମହାକାଶ ଯାତ୍ରା କରିଥିଲେ।
ତେବେ ଏଥର ଆମେରିକୀୟ ମହାକାଶ ଏଜେନ୍ସୀ ନାସା ଓ ଭାରତୀୟ ମହାକାଶ ଗବେଷଣା ସଙ୍ଗଠନ (ଇସ୍ରୋ)ଙ୍କ ମିଳିତ ମିସନ ଫ୍ଲୋରିଡାର କେନେଡି ସ୍ପେସ୍ ସେଣ୍ଟରରୁ ଲଞ୍ଚ କରାଯିବ। ଗ୍ରୁପ କ୍ୟାପ୍ଟେନ ଶୁଭାଂଶୁ ଶୁକ୍ଲା ଏହି ମିସନରେ ମହାକାଶ ଯାତ୍ରୀ ଓ ମିସନ ପାଇଲଟ ଭାବେ କାର୍ଯ୍ୟ କରିବେ। ଶୁଭାଂଶ ଶୁକ୍ଳା ଇସ୍ରୋ ଦ୍ୱାରା ମନୋନୀତ ସବୁଠୁ କମ୍ ବୟଷ୍କ ମହାକାଶଚାରୀ ହେବେ। ତାଙ୍କ ବୟସ ମାତ୍ର ୪୦ ବର୍ଷ। ଏହି ମିସନରେ ଶୁଭାଂଶୁ ଶୁକ୍ଳାଙ୍କ ସହିତ ନାସାର ପୂର୍ବତନ ମହାକାଶଯାତ୍ରୀ ତଥା ମିସନ କମାଣ୍ଡର ପେଗୀ ହ୍ୱିଟସନ୍, ପୋଲାଣ୍ଡର ସ୍ଲାଭୋଜ ଉଜନାନସ୍କି-ଭିସ୍ତ୍ରିଭସ୍କି ଓ ହଙ୍ଗେରୀର ଟିବୋର କାପୁ ମଧ୍ୟ ମହାକାଶ ଯାତ୍ରା କରିବେ।
ଏହି ମହାକାଶ ଯାତ୍ରା ପାଇଁ ଶୁଭାଂଶୁ ଗତ ୮ ମାସ ହେଲା ନାସା ଓ ଘରୋଇ ମହାକାଶ କମ୍ପାନୀ ଏକ୍ସିଓମ ସ୍ପେସ୍ ସହିତ ପ୍ରଶିକ୍ଷଣ ନେଉଛନ୍ତି। ଯେଉଁ ମିସନ ନିମମନ୍ତେ ଶୁଭାଂଶୁଙ୍କୁ ଆଇଏସଏସ ପଠାଯାଉଛି ଏହା ଏକ ଘରୋଇ ବାଣିଜ୍ୟିକ ମିସନ ଓ ଏଥି ପାଇଁ ଭାରତ ପାଖାପାଖି ୬୦ ନିୟୁତ ଡଲାର ପୈଠ କରିଛି।
