ନୂଆଦିଲ୍ଲୀ: ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିବାଦରେ ଦିଲ୍ଲୀର ବ୍ୟବସାୟୀମାନେ ଶୁକ୍ରବାର ବନ୍ଦ ପାଳନ କରିଛନ୍ତି। ଏହି ବନ୍ଦରେ ଦିଲ୍ଲୀର ପ୍ରମୁଖ ସଦର ବଜାର, ଭାଗୀରଥ ବଜାର, ଗାନ୍ଧିନଗର, ନୟା ବଜାର, ଖରି ବାଓଲି, ଚାୱରୀ ବଜାର, ଚାନ୍ଦିନୀଚୌକ୍, ଜାମା ମସଜିଦ୍ ଏବଂ ହାଉଜ୍ କାଜୀ ସମେତ ୧୦୦ରୁ ଅଧିକ ବଜାର ସଙ୍ଗଠନ ଅଂଶଗ୍ରହଣ କରୁଛନ୍ତି। ବ୍ୟବସାୟୀଙ୍କ ଏହି ଧର୍ମଘଟ ଯୋଗୁଁ ଆଜି ଦିଲ୍ଲୀର ୯୦୦ରୁ ଅଧିକ ବଜାରରେ ୮ ଲକ୍ଷରୁ ଅଧିକ ଦୋକାନରେ କୌଣସି ବ୍ୟବସାୟ ହେବ ନାହିଁ ଏବଂ ପ୍ରାୟ ୧୫୦୦ କୋଟି ଟଙ୍କାର ବ୍ୟବସାୟ ଠପ୍ ରହିବ। ବୟନ, ମସଲା, ବାସନକୁସନ ଏବଂ ସୁନା ସାମଗ୍ରୀ ଭଳି କ୍ଷେତ୍ରର ବିଭିନ୍ନ ବ୍ୟବସାୟୀ ସଂଘ ମଧ୍ୟ ବନ୍ଦରେ ସାମିଲ ହୋଇଛନ୍ତି।

ବ୍ୟବସାୟୀ ସଂଘର ଜଣେ ସଦସ୍ୟ କହିଛନ୍ତି ଯେ, ଦିଲ୍ଲୀର ପ୍ରମୁଖ ବଜାର ମଧ୍ୟରୁ ଗୋଟିଏ, ଯାହା ସାଧାରଣତଃ ଗହଳିପୂର୍ଣ୍ଣ ଥାଏ, ସଦର ବଜାର ଶୁକ୍ରବାର ଜନଶୂନ୍ୟ ହୋଇପଡ଼ିଥିଲା। ବନ୍ଦ ଯୋଗୁଁ ପନିପରିବା ବିକ୍ରେତାମାନେ ମଧ୍ୟ ବଜାରକୁ ଆସି ନଥିଲେ। ବଜାର ସଂଘ ପକ୍ଷରୁ ଜାରି ଏକ ବିବୃତ୍ତିରେ କୁହାଯାଇଛି ଯେ ଗାନ୍ଧୀନଗରରେ ଅବସ୍ଥିତ ଏସିଆର ସର୍ବବୃହତ ପାଇକାରୀ ପ୍ରସ୍ତୁତ ପୋଷାକ ବଜାର ସମ୍ପୂର୍ଣ୍ଣ ବନ୍ଦ ରହିଛି। "ଏହି ବନ୍ଦର ଲକ୍ଷ୍ୟ ହେଉଛି ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ପର୍ଯ୍ୟଟକଙ୍କ ପାଇଁ ନ୍ୟାୟ ଦାବି କରିବା ଏବଂ ଆତଙ୍କବାଦ ବିରୁଦ୍ଧରେ ଏକତା ପ୍ରଦର୍ଶନ କରିବା," ବିବୃତ୍ତିରେ କୁହାଯାଇଛି। ଗୁରୁବାର ଚାମ୍ବର ଅଫ୍ ଟ୍ରେଡ୍ ଆଣ୍ଡ୍ ଇଣ୍ଡଷ୍ଟ୍ରି (ସିଟିଆଇ) ପକ୍ଷରୁ ଏହି ବନ୍ଦ ଡାକରା ଦିଆଯାଇଥିଲା। ଆକ୍ରମଣର ପୀଡିତଙ୍କ ପ୍ରତି ଏକତା ପ୍ରକାଶ କରିବା ପାଇଁ CTI କନଟ୍ ପ୍ଲେସରେ ଏକ ମହମବତୀ ମାର୍ଚ୍ଚ ମଧ୍ୟ ବାହାର କରିଥିଲା।

ମଙ୍ଗଳବାର ପହଲଗାମରେ ହୋଇଥିବା ଏହି ଆତଙ୍କବାଦୀ ଆକ୍ରମଣରେ ୨୬ ଜଣ ପ୍ରାଣ ହରାଇଥିଲେ, ସେମାନଙ୍କ ମଧ୍ୟରୁ ଅଧିକାଂଶ ପର୍ଯ୍ୟଟକ ଥିଲେ ଏବଂ ପର୍ଯ୍ୟଟନ ପାଇଁ କାଶ୍ମୀର ଆସିଥିଲେ। "ଏହା କେବଳ ଏକ ପ୍ରତିବାଦ ନୁହେଁ, ଏହା ଆତଙ୍କବାଦ ବିରୁଦ୍ଧରେ ଏକ ଗଣ ପ୍ରତିବାଦ। ଶୁକ୍ରବାର CTI ସଭାପତି ବ୍ରିଜେଶ ଗୋୟଲ ଏହା କହିଛନ୍ତି। ଆମେ ସମସ୍ତେ ଏହି ଲଢ଼େଇରେ ଏକଜୁଟ ଏବଂ ପହଲଗାମରେ ପ୍ରାଣ ହରାଇଥିବା ଲୋକଙ୍କ ସ୍ମୃତିରେ ବନ୍ଦ ପାଳନ କରୁଛୁ।" ଗୋୟଲ ସରକାରଙ୍କୁ ପାକିସ୍ତାନ ସହିତ ସମସ୍ତ ବ୍ୟବସାୟିକ ସମ୍ପର୍କ ସମାପ୍ତ କରିବାକୁ ଏବଂ ଭାରତରେ ପାକିସ୍ତାନୀ ଉତ୍ପାଦ ବର୍ଜନ କରିବାକୁ ନିବେଦନ କରିଛନ୍ତି। ମଙ୍ଗଳବାର ପହଲଗାମରେ ହୋଇଥିବା ଆକ୍ରମଣ ୨୦୧୯ ପୁଲୱାମା ଆକ୍ରମଣ ପରେ ଉପତ୍ୟକାର ସବୁଠାରୁ ଭୟଙ୍କର ଆକ୍ରମଣ।