ଭଦ୍ରକ ୦୪।୦୮ : ଜିଲ୍ଲା ମୁଖ୍ୟ ଡାକ୍ତରଖାନା ସମ୍ମୁଖରେ ଉତ୍ତେଜନା । ମେଡିକାଲ ସ୍ଥାନାନ୍ତରକୁ ବିରୋଧ କରି ଉତ୍ତେଜନା ଲାଗି ରହିଛି । ଏହାସହ ମେଡିକାଲ ସାମଗ୍ରୀ ବୋଝେଇ କରି ସ୍ଥାନାନ୍ତର ଗାଡ଼ିକୁ ବି ଅଟକାଇଲେ ଲୋକେ । ଧାରଣାରେ ବସିବା ସହ ଜିଲ୍ଲାପାଳଙ୍କୁ ଦାବିପତ୍ର ଦେଲା ନାଗରିକ ମଞ୍ଚ ।
ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାକୁ ନୂଆ ବଜାରରୁ ଗେଲପୁର ସ୍ଥାନାନ୍ତର ହେଉଛି । ଏହି ଡାକ୍ତରଖାନାକୁ ସ୍ଥାନାନ୍ତରକୁ ବିରୋଧ କରିଛି ଭଦ୍ରକ ନାଗରିକ ମଞ୍ଚ । ନୂଆ ବଜାର ସ୍ଥିତି ପୁରୁଣା ମେଡିକାଲ ସମ୍ମୁଖରେ ଦସ୍ତଖତ ଅଭିଯାନ କରିବା ସହ ଧାରଣା ଜାରି ରଖିଛି । ଏହି ମେଡିକାଲର ଆଉଟଡୋର ସେବା ଜାରି ରଖିବା ସହ ସିଟି ହସ୍ପିଟାଲ ପ୍ରତିଷ୍ଠା ପାଇଁ ଦାବି ହୋଇଛି । ନାଗରିକ ମଞ୍ଚ ସହ କଂଗ୍ରେସ, ବିଜେଡି ଏବଂ ଜନସାଧାରଣ ସମର୍ଥନ ଜଣାଇଛନ୍ତି । ବିଟ୍ରିଶ ଅମଳରୁ ତିଆରି ହୋଇ ସେବା ଯୋଗାଉଥିବା ହସ୍ପିଟାଲକୁ ସିଟି ହସ୍ପିଟାଲ ଭାବେ ଘୋଷଣା କରିବାକୁ ଦାବି ହୋଇଛି । ଯଦି ଆଗାମୀ ଦିନରେ ଦାବି ପୂରଣ ନହୁଏ, ତେବେ ଆନ୍ଦୋଳନକୁ ଜୋରଦାର କରାଯିବ।
