ମୁମ୍ଵାଇ ୦୪।୦୫; ବିବାଦରେ ପ୍ରସିଦ୍ଧ ବଲିଉଡ଼ ଗାୟକ ସୋନୁ ନିଗମ । ବେଙ୍ଗାଲୁରୁର ଇଷ୍ଟ ପଏଣ୍ଟ କଲେଜରେ ଏକ ଲାଇଭ୍ କନସର୍ଟ ସମୟରେ ତାଙ୍କର ଏକ ମନ୍ତବ୍ୟକୁ ନେଇ ବିବାଦ ଦେଖାଦେଇଛି। ଏନେଇ ତାଙ୍କ ବିରୋଧରେ ଅଭିଯୋଗ ମଧ୍ୟ ଦାଖଲ ହୋଇଛି। ଜଣେ ଦର୍ଶକଙ୍କ କନ୍ନଡ ଗୀତ ଗାଇବା ପାଇଁ ଅନୁରୋଧକୁ ନେଇ ଗାୟକଙ୍କ ପ୍ରତିକ୍ରିୟା ଏବେ ସୋସିଆଲ ମିଡିଆରେ ପ୍ରସଙ୍ଗ ପାଲଟିଛି।
ତେବେ କାର୍ଯ୍ୟକ୍ରମ ସମୟରେ ଜଣେ ପ୍ରଶଂସକ ତାଙ୍କୁ ଏକ କନ୍ନଡ ଗୀତ ଗାଇବାକୁ ଅନୁରୋଧ କରିଥିଲେ। ଯାହାକୁ ନେଇ ସୋନୁ ନିଗମ ଅପମାନଜନକ ଭାବରେ ଗ୍ରହଣ କରିଥିଲେ ଏବଂ ମଞ୍ଚରୁ ଥାଇ ତୀବ୍ର ପ୍ରତିକ୍ରିୟା ଦେଇଥିଲେ। ସେ କହିଥିଲେ ମୋତେ ବହୁତ ଖରାପ ଲାଗିଲା , ଯାହାର ବୟସ ବି ଅଧିକ ନୁହେଁ ସେ ମୋତେ କନ୍ନଡ ଗୀତ ଗାଇବା ପାଇଁ ବାଧ୍ୟ କରାଇଥିଲେ। ସେ ଆହୁରି ମଧ୍ୟ କହିଛନ୍ତି, 'ଏହି ପ୍ରକାର ମନୋଭାବ ଯୋଗୁଁ ପହଲଗାମ ଆକ୍ରମଣ ଘଟିଥିଲା।' ଏହି ବିବୃତ୍ତି ସମସ୍ତଙ୍କୁ ଚକିତ କରିଥିଲା, କାରଣ ଏହା ସାମ୍ପ୍ରତିକ ଆତଙ୍କବାଦୀ ଆକ୍ରମଣକୁ ଦର୍ଶକଙ୍କ ଆଚରଣ ସହିତ ଯୋଡ଼ିଥିଲା। ଏହି ମନ୍ତବ୍ୟ ପରେ, ସ୍ଥାନୀୟ ସଂଗଠନ ଏବଂ ସୋସିଆଲ ମିଡିଆ ବ୍ୟବହାରକାରୀମାନେ ଗାୟକଙ୍କୁ ସମ୍ବେଦନହୀନ ବୋଲି ଅଭିଯୋଗ କରିଥିଲେ।
ଅନେକ ଲୋକ ବିଶ୍ୱାସ କରନ୍ତି ଯେ ଏତେ ଗମ୍ଭୀର ଆତଙ୍କବାଦୀ ଆକ୍ରମଣକୁ ଜଣେ ପ୍ରଶଂସକଙ୍କ ଦାବି ସହିତ ତୁଳନା କରିବା ଅତ୍ୟନ୍ତ ଅନ୍ୟାୟ ଏବଂ ଯନ୍ତ୍ରଣାଦାୟକ। ବେଙ୍ଗାଲୁରୁର ଆଭାଲାହାଲି ପୋଲିସ ଷ୍ଟେସନରେ ସୋନୁ ନିଗମଙ୍କ ବିରୋଧରେ ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା ୩୫୨(୧), ୩୫୨(୨) ଏବଂ ୩୫୩ ଅନୁଯାୟୀ ଅଭିଯୋଗ ଦାଖଲ କରାଯାଇଥିଲା। ଏହି ଘଟଣା ପରେ, ଇଷ୍ଟ ପଏଣ୍ଟ କଲେଜ ମଧ୍ୟ ସନ୍ଦେହ ଘେରକୁ ଆସିଛି। ସ୍ଥାନୀୟ ସଂଗଠନଗୁଡ଼ିକ କଲେଜ ପ୍ରଶାସନ ବିରୁଦ୍ଧରେ ପ୍ରତିବାଦ ଘୋଷଣା କରିଛନ୍ତି ଏବଂ କାର୍ଯ୍ୟକ୍ରମରେ ଏପରି ବିବୃତ୍ତିକୁ ଅନୁମତି ଦେବା ପାଇଁ ଦାୟିତ୍ୱ ଦାବି କରିଛନ୍ତି।
