ନୂଆଦିଲ୍ଲୀ ୧୬।୩: ୟୁକ୍ରେନ ଯୁଦ୍ଧ ରୋକିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ମଧ୍ୟରେ ଖୁବ୍ ଶୀଘ୍ର ଆଲୋଚନା ହୋଇପାରେ। ଟ୍ରମ୍ପ ଓ ପୁଟିନଙ୍କ ଏହି ଆଲୋଚନା ଏହି ସପ୍ତାହରେ ହୋଇପାରେ ବୋଲି ଆଶା କରାଯାଉଛି। ହ୍ୱାଇଟ୍ ହାଉସ୍ ଦୂତ ଷ୍ଟିଭ ଭିଟକଫ ରବିବାର ଏହି ସୂଚନା ଦେଇଛନ୍ତି। ସେ କହିଛନ୍ତି ରାଷ୍ଟ୍ରପତି ଟ୍ରମ୍ପ ଓ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ମଧ୍ୟରେ ଚଳିତ ସପ୍ତାହରେ ଋଷିଆ ଓ ୟୁକ୍ରେନ ମଧ୍ୟରେ ୩୦ ଦିନିଆ ଯୁଦ୍ଧ ବିରାମ ସମ୍ପର୍କରେ ଆଲୋଚନା ହେବ।
ଷ୍ଟିଭ ଭିଟକଫ ସିଏନଏନର ‘ଷ୍ଟେଟ ଅଫ ଦି ୟୁନିୟନ’ ଶୋରେ କହିଛନ୍ତି ଯେ ‘ମୁଁ ଆଶା କରୁଛି ଏହି ସପ୍ତାହରେ ଦୁଇ ନେତାଙ୍କ ମଧ୍ୟରେ କଥାବାର୍ତ୍ତା ହୋଇପାରେ’। ସେ ଏହା ମଧ୍ୟ କହିଛନ୍ତି ଯେ ୟୁକ୍ରେନ ସହ ଆମେରିକା ଲଗାତାର ଏ ନେଇ କଥାବାର୍ତ୍ତା ହେଉଛି। ଭିଟ କଫ ଗତ ସପ୍ତାହରେ ଋଷିଆ ରାଷ୍ଟ୍ରପତି ପୁଟିନଙ୍କୁ ଭେଟିଥିଲେ, ତେବେ ପୁଟିନ ଯୁଦ୍ଧ ରୋକିବା ପାଇଁ ଅପିଲକୁ ତୁରନ୍ତ ସ୍ୱୀକାର କରି ନାହାନ୍ତି। ସେ କହିଛନ୍ତି ଯେ ଏବେ ଅନେକ ପ୍ରସଙ୍ଗର ସମାଧାନ ବାହାର କରିବା ବାକି ଅଛି।
ଏହା ପୂର୍ବରୁ ସାଉଦୀ ଆରବରେ ୟୁକ୍ରେନ ଆମେରିକୀୟ ଅଧିକାରୀଙ୍କୁ ଭେଟିଥିଲା ଓ ଯୁଦ୍ଧ ବିରାମ ସର୍ତ୍ତରେ ସହମତି ପ୍ରକାଶ କରିଥିଲା। ଏବେ ଦେଖିବାର କଥା ହେଉଛି ଆମେରିକା, ଋଷିଆ ଓ ୟୁକ୍ରେନ ମଧ୍ୟରେ ଏହି ପ୍ରସଙ୍ଗକୁ ନେଇ କଣ ନିଷ୍ପତ୍ତି ହେଉଛି। ଷ୍ଟିଭ ଭିଟକଫ କହିଛନ୍ତି ଯେ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ସହିତ ତାଙ୍କର ଆଲୋଚନା ହୋଇଛି । ସେ କହିଛନ୍ତି ଯେ ଏହା ଏକ ସକରାତ୍ମକ ଓ ସମାଧାନ ବାହାର କରିବା ଲାଗି ଆଲୋଚନା ଥିଲା। ଭିଟକଫ ଏହା ମଧ୍ୟ କହିଛନ୍ତି ଯେ ରାଷ୍ଟ୍ରପତି ଟ୍ରମ୍ପଙ୍କ ବିଚାର ସହିତ ପୁଟିନ ସହମତ ଅଛନ୍ତି। ଡୋନାଲ୍ଟ ଟ୍ରମ୍ପ ଆଶା କରୁଛନ୍ତି ଖୁବ୍ ଶୀଘ୍ର ବୁଝାମଣା ହୋଇପାରେ। ଭିଟକଫ ମଧ୍ୟ ଆଗାମୀ ସପ୍ତାହମାନଙ୍କରେ ସମାଧାନର କୌଣସି ରାସ୍ତା ବାହାରି ପାରେ ବୋଲି ଆଶା ବ୍ୟକ୍ତ କରିଛନ୍ତି।
ଆମେରିକା ଅଧିକାରୀଙ୍କ କହିବା କଥା ହେଉଛି ୩ ବର୍ଷ ଧରି ଚାଲିଥିବା ଏହି ଯୁଦ୍ଧକୁ ଶେଷ କରିବା ପାଇଁ ଉଭୟ ଦେଶଙ୍କ ସହ କଥାବାର୍ତ୍ତା ହେବା ଜରୁରି। ଋଷିଆ ମୁଖପାତ୍ର ଦିମିତ୍ରୀ ପେସକୋଭ କହିଛନ୍ତି ଯେ ରାଷ୍ଟ୍ରପତି ପୁଟିନ ଟ୍ରମ୍ପଙ୍କ ନିମନ୍ତେ ଏକ ବାର୍ତ୍ତା ଦେଇଛନ୍ତି। ଟ୍ରମ୍ପ ଓ ପୁଟିନଙ୍କ ଆଲୋଚନା ଏହି ଯୁଦ୍ଧକୁ ସମାପ୍ତ କରିପାରିବ କି ? ଏବେ ଏହା ଉପରେ ସମସ୍ତଙ୍କ ନଜର।
