ମୁମ୍ଵାଇ ୧୫।୦୬; ଚାହିଦାରେ ଥିବା ହିନ୍ଦୀ ଫିଲ୍ମ ଅଭିନେତ୍ରୀଙ୍କ ମଧ୍ୟରୁ ସାରା ଅଲ୍ଲୀ ଖାନ ଅନ୍ୟତମ । ‘କେଦାରନାଥ’ ଚଳଚ୍ଚିତ୍ରରୁ ଅଭିନୟ ଆରମ୍ଭ କରିଥିଲେ ସେ । ପରେ ପରେ ସେ ‘ଲଭ୍ ଆଜ୍ କଲ୍’, ‘କୁଲି ନଂ ୧’, ‘ଅତରଙ୍ଗି ରେ’, ‘ରକି ଔର୍ ରାନୀ କି ପ୍ରେମ କହାନୀ’, ‘ଏ ୱତନ ମେରେ ୱତନ’ ଆଦି ସିନେମାରେ ନଜର ଆସିଛନ୍ତି । ଭିନ୍ନ ଭିନ୍ନ ଚରିତ୍ର, ନାୟକଙ୍କ ସହ ଅଭିନୟ କରି ବେଶ୍ ପ୍ରଶଂସା ସାଉଁଟିଛନ୍ତି । ଉଭୟ ସିନେପ୍ରେମୀ ଓ ସିନେ ସମୀକ୍ଷକଙ୍କ ପ୍ରିୟ ନାୟିକା ତାଲିକାରେ ସାମିଲ ବି ହୋଇଛନ୍ତି । ଶେଷଥର ପାଇଁ ସେ ‘ସ୍କାଇ ଫୋର୍ସ’ ଚଳଚ୍ଚିତ୍ରରେ ଗୀତା ବିଜୟା ନାମକ ଚରିତ୍ର ନିର୍ବାହ କରିଥିଲେ ।
୧୯୬୫ର ଭାରତ-ପାକିସ୍ତାନ ଯୁଦ୍ଧ ଉପରେ ଆଧାରିତ ଏହି ସିନେମାରେ ସାରାଙ୍କ ସହିତ ଅକ୍ଷୟ କୁମାର, ବୀର ପହାଡ଼ିଆ ଓ ନିମ୍ରତ କୌର ନଜର ଆସିଥିଲେ । ସାରାଙ୍କ ଆଗାମୀ ଫିଲ୍ମ ମଧ୍ୟରେ ରହିଛି ‘ମେଟ୍ରୋ ଇନ ଦିନୋ’ । ଜୁଲାଇ ୪ ତାରିଖରେ ଏହି ସିନେମାଟି ପ୍ରେକ୍ଷାଳୟକୁ ଆସିବ । ପ୍ରେମ ଓ ପାରିବାରିକ କଥାବସ୍ତୁ ଆଧାରିତ ଏ ଫିଲ୍ମର ନିର୍ଦ୍ଦେଶକ ଅନୁରାଗ ବସୁ । ଅଳ୍ପ ଦିନ ତଳେ ଏ ଫିଲ୍ମର ଟ୍ରେଲର ଲଞ୍ଚ୍ ଉତ୍ସବରେ ଉପସ୍ଥିତ ରହି ସାରା ଏମିତି ପଦେ କଥା କହିଥିଲେ, ଯାହା ସମସ୍ତଙ୍କ ମନକୁ ଛୁଇଁଥିଲା । ସାରା କହିଥିଲେ, ସେ ବର୍ତ୍ତମାନ ନିଜକୁ ଅନୁରାଗ ବସୁଙ୍କ ହିରୋଇନ୍ ବୋଲି କହିପାରିବେ ।
ସାରାଙ୍କ ଏଇ କଥାରୁ ଏହା ସ୍ପଷ୍ଟ ହେଉଛି ଯେ, ନିଜ କ୍ୟାରିୟରରେ ସେ ଅନୁରାଗଙ୍କ ସହ କାମ କରିନଥିଲେ ଓ ଅନୁରାଗଙ୍କ ଫିଲ୍ମରେ କାମ କରିବା ପାଇଁ ସ୍ୱପ୍ନ ଦେଖୁଥିଲେ । ସାତ ବର୍ଷର ଅଭିନୟ କ୍ୟାରିୟର, ଡଜନେ ପାଖାପାଖି ଫିଲ୍ମ ଓ ରୋହିତ ସେଟ୍ଟୀ, ଇମ୍ତିଆଜ ଅଲ୍ଲୀ, ଡେଭିଡ ଧୱନ, କରନ୍ ଜୋହରଙ୍କ ଭଳି ନିର୍ଦ୍ଦେଶକଙ୍କ ଫିଲ୍ମରେ ଅଭିନୟ ପରେ ଅନୁରାଗଙ୍କ ନିର୍ଦ୍ଦେଶନାରେ ଅଭିନୟ ସୁଯୋଗ ମିଳିଛି ସାରାଙ୍କୁ । ଏହା ହିଁ ବୋଧେ ସାରାଙ୍କୁ ଅଧିକ ଖୁସି ଦେଇଛି । ସାରା ତାଙ୍କର ଇନ୍ଷ୍ଟାଗ୍ରାମ ଏକାଉଣ୍ଟରେ ମଧ୍ୟ ଏହା ଉଲ୍ଲେଖ କରିଛନ୍ତି ।
