ଆଠମଲ୍ଲିକ ୦୩/୧: ଅନୁଗୋଳ ଜିଲ୍ଲା କିଶୋରନଗର ଥାନା ଭାଙ୍ଗମୁଣ୍ଡା ଗାଁରେ ଫୁଟିଲା ଗୁଳି । ଘରେ ପଶି ଶୋଇଥିବା ଅବସ୍ଥାରେ ଭାଇ ଭଉଣୀଙ୍କୁ ଗୁଳି କରିଛନ୍ତି ଦୁର୍ବୃତ୍ତ । ଉଭୟଙ୍କ ଅବସ୍ଥା ସଂକଟାପନ୍ନ । ଆହତ ଦୁଇ ଭାଇ ଭଉଣୀଙ୍କୁ ଅଧିକ ଚିକିତ୍ସା ପାଇଁ କଟକ ବଡ ମେଡିକାଲରେ ଭର୍ତ୍ତି କରାଯାଇଛି । ଦୁର୍ବୃତ୍ତଙ୍କ ଗୁଳିମାଡର ଶିକାର ହୋଇଛନ୍ତି ଭାଙ୍ଗମୁଣ୍ଡା ଗାଁର ପ୍ରଫୁଲ୍ଲ ମିର୍ଦ୍ଧାଙ୍କ ୧୫ ବର୍ଷୀୟା ଝିଅ ଯାଜ୍ଞସେନୀ ଓ ୧୧ ବର୍ଷୀୟ ପୁଅ ପ୍ରକାଶ ।
ଗୁରୁବାର ରାତିରେ ପରିବାର ଲୋକ ଖାଇପିଇ ଶୋଇଥିବାବେଳେ ଭାଇ ଉଭଣୀ ଗୋଟିଏ ରୁମ୍ରେ ଶୋଇଥିଲେ । ରାତି ଅଧରେ ଗୁଳି ଶବ୍ଦ ଶୁଣି ଉଠି ପଡିଥିଲେ ପରିବାର ଲୋକ । ରକ୍ତ ଜୁଡୁବୁଡୁ ହୋଇ ତଳେ ପଡିଥିଲେ ଭାଇ ଭଉଣୀ । ପୁଅର ବାମ କାନ୍ଧରେ ଗୁଳି ବାଜିଥିବା ବେଳେ ଝିଅର ଡାହାଣ ପଟ ଛାତିରେ ଗୁଳି ବାଜିଛି। ଉଭୟଙ୍କୁ ଗୁରୁତର ଅବସ୍ଥାରେ ବୁର୍ଲା ମେଡିକାଲରେ ଭର୍ତ୍ତି କରାଯାଇଥିଲା ।
ତେବେ ଦୁହିଁଙ୍କ ଅବସ୍ଥା ସଂକଟାପନ୍ନ ହେବାରୁ କଟକ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଇଛି । ଗୁଳିକାଣ୍ଡ କିଏ ଓ କାହିଁକି କରିଛି ଜଣାପଡିନି । ଗୁଳିମାଡ କରିଥିବା ଦୁର୍ବୃତ୍ତଙ୍କ କୌଣସି ପତ୍ତା ମିଳିନି । କିଶୋରନଗର ଥାନା ପୋଲିସ ଘଟଣାର ଛାନ୍ଭିନ୍ ଚଳାଇଛି ।
