ନୂଆଦିଲ୍ଲୀ: ଲଗାତାର ଦୁଇ ଦିନର ହ୍ରାସ ପରେ ଭାରତୀୟ ସେୟାର ବଜାର ଆଜି ପୁଣି ଥରେ ଜୋରଦାର କମବ୍ୟାକ୍ କରୁଛି । ସେନସେକ୍ସ ୫୯୨ ଅଙ୍କ ବଢି ବନ୍ଦ ହୋଇଛି । ଅନ୍ୟପଟେ ନିଫ୍ଟି ବଢି ୨୩,୩୦୦ ସ୍ତରକୁ ପାର୍ କରିଛି । ଏହି କାରଣରୁ ନିବେଶକଙ୍କୁ ଆଜି ୩ ଲକ୍ଷ କୋଟି ଟଙ୍କା ଲାଭ ହୋଇଛି । ଆଜିର ଏହି ବୃଦ୍ଧି ପଛରେ ଆଇଟି ଓ ବ୍ୟାଙ୍କିଂ ସେୟାର ରହିଛନ୍ତି । ବିଏସ୍ଇ ମିଡ୍କ୍ୟାପ୍ ଓ ସ୍ମଲ୍କ୍ୟାପ୍ ଇଣ୍ଡେକ୍ସ ବି ୧ ପ୍ରତିଶତରୁ ଅଧିକ ବଢି ବନ୍ଦ ହୋଇଛି । ସେୟାର ବଜାରରେ ଆଜିର ଏହି ବୃଦ୍ଧି ଆମେରିକା ରାଷ୍ଟ୍ରପତିଙ୍କ ଟାରିଫ୍ ଘୋଷଣାର ଠିକ୍ ପୂର୍ବରୁ ହୋଇଛି । ଆଜି ସଂଧ୍ୟାରେ ଟ୍ରମ୍ପ ରେସିପ୍ରୋକାଲ ଟାରିଫ୍ ଘୋଷଣା କରିବେ ।
କାରବାର ଶେଷରେ ବିଏସଇ ସେନସେକ୍ସ ୫୯୨.୯୩ ଅଙ୍କ ବା ୦.୭୮ ପ୍ରତିଶତ ବୃଦ୍ଧି ପାଇ ୭୬,୬୧୭.୪୪ ଅଙ୍କ ସ୍ତରରେ ବନ୍ଦ ହୋଇଛି । ଅନ୍ୟପଟେ ଏନ୍ଏସ୍ଇର ୫୦ ସେୟାର ବିଶିଷ୍ଟ ସୂଚକାଙ୍କ ନିଫ୍ଟି ୧୬୬.୬୫ ଅଙ୍କ ବା ୦.୭୨ ପ୍ରତିଶତ ବଢି ୨୩,୩୩୨.୩୫ ସ୍ତରରେ ବନ୍ଦ ହୋଇଛି ।
ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମୋଟ୍ ମାକେର୍ଟ କ୍ୟାପ୍ ଆଜି ଏପ୍ରିଲ୍ ୨ରେ ବୃଦ୍ଧି ପାଇ ୪୧୨.୯୬ ଲକ୍ଷ କୋଟି ଟଙ୍କା ହୋଇଛି । ପୂର୍ବ କାରବାର ଦିନ ଅର୍ଥାତ୍ ବୁଧବାର ଏପ୍ରିଲ୍ ୧ରେ ଏହା ୪୦୯.୪୩ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ପ୍ରାୟ ୩.୫୩ ଲକ୍ଷ କୋଟି ଟଙ୍କା ବୃଦ୍ଧି ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ୩.୩୯ ଲକ୍ଷ କୋଟି ଟଙ୍କା ଲାଭ ହୋଇଛି । ବିଏସ୍ଇ ସେନ୍ସେକ୍ସର ୩୦ ମଧ୍ୟରୁ ୨୦ ସେୟାର ଆଜି ସବୁଜ ସଂକେତରେ ବନ୍ଦ ହୋଇଛି । ଏଥିରେ ଜୋମାଟୋ ସେୟାରରେ ସବୁଠୁ ଅଧିକ ୪.୯୨ ପ୍ରତିଶତ ବୃଦ୍ଧି ପାଇଛି । ଅନ୍ୟପଟେ ନେସଲେ ଇଣ୍ଡିଆର ସେୟାର ୧.୩୬ ପ୍ରତିଶତ ହ୍ରାସ ସହ ଟପ୍ ଲୁଜର୍ସ ହୋଇଛି ।
