ନୂଆଦିଲ୍ଲୀ ୩।୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବୁଧବାର ଭାରତ ଉପରେ ୨୬% ଟାରିଫ ଲଗାଇବାକୁ ଘୋଷଣା କରିଛନ୍ତି। ଟ୍ରମ୍ପ କହିଛନ୍ତି ଭାରତ, ଆମେରିକା ଉପରେ ୫୨% ପର୍ଯ୍ୟନ୍ତ ଟାରିଫ ଲଗାଉଛି। ଏଣୁ ଭାରତ ଉପରେ ଆମେରିକା ୨୬% ଟ୍ୟାକ୍ସ ଲଗାଇବ। ଆମେରିକା ପକ୍ଷରୁ ଭାରତୀୟ ଉତ୍ପାଦ ଉପରେ ରେସିପ୍ରୋକାଲ ଟାରିଫ ଅର୍ଥାତ ଜବାବୀ ଶୁଳ୍କ ଲଗାଯିବା ଯୋଗୁ କୃଷି, ଫାର୍ମା, ରସାୟନ, ଔଷଧ, ଚିକିତ୍ସା ଉପକରଣ, ଇଲେକ୍ଟ୍ରିକାଲ ଓ ମେସିନାରୀ ସମେତ ଅନେକ ପ୍ରମୁଖ କ୍ଷେତ୍ର ପ୍ରାଭିବତ ହୋଇପାରେ।
ବିଶେଷଜ୍ଞଙ୍କ କହିବାକଥା ହେଉଛି ଏହିସବୁ କ୍ଷେତ୍ରରେ ଶୁଳ୍କ ଅନ୍ତର ଯଥେଷ୍ଟ ଅଧିକ। ଶୁଳ୍କ ଅନ୍ତର ଯେତିକି ଅଧିକ ହେବ ସେହି କ୍ଷେତ୍ର ସେତେ ପ୍ରଭାବିତ ହେବ। ଆର୍ଥିକ ଗବେଷଣା ସଂସ୍ଥା ଗ୍ଲୋବାଲ ଟ୍ରେଡ ରିସର୍ଚ୍ଚ ଇନିସିଏଟିଭ (ଜିଟିଆରଆଇ)ର ବିଶ୍ଲେଷକଙ୍କ ଅନୁସାରେ କୃଷିରେ ସବୁଠୁ ଅଧିକ ପ୍ରଭାବିତ କ୍ଷେତ୍ର ମତ୍ସ୍ୟ, ମାଂସ ଓ ପ୍ରୋସେସଡ ସାମୁଦ୍ରିକ ଭୋଜନ। ୨୦୨୪ରେ ଏପରି ସାମଗ୍ରୀର ରପ୍ତାନୀ ୨.୫୮ ବିଲିୟନ ଡଲାର ଥିଲା। ଏବେ ଏହି କ୍ଷେତ୍ରକୁ ୨୭.୮୩ ପ୍ରତିଶତ ଶୁଳ୍କ ଅନ୍ତରର ସମ୍ମୁଖୀନ ହେବାକୁ ପଡିବ।
ଅର୍ଥବ୍ୟବସ୍ଥା ଉପରେ ସମ୍ଭାବିତ ପ୍ରଭାବ
ଟାରିଫ ବୃଦ୍ଧି ଯୋଗୁ ଆମେରିକାକୁ ସାମାନ ପଠାଇବାକୁ ଭାରତୀୟ କମ୍ପାନୀଙ୍କୁ ଅଧିକ ଖର୍ଚ୍ଚ ପଡିବ। ଏଣୁ ସେମାନଙ୍କ ଚାହିଦା ହ୍ରାସ ହୋଇପାରେ। ସେହିପରି ଆମେରିକା ସହିତ ବ୍ୟବସାୟୀକ ଅସ୍ଥିରତା ଯୋଗୁ ଭାରତୀୟ ମୁଦ୍ରା ଦୁର୍ବଳ ହୋଇପାରେ। ଏଣୁ ଆମଦାନୀ ମହଙ୍ଗା ହେବା ସହିତ ମୁଦ୍ରାସ୍ପିତି ଅଧିକ ହେବ। ଏହା ଛଡା ଟ୍ରେଡ ଟେନସନ ବଢିବା ଯୋଗୁ ବୈଶ୍ୱିକ ନିବେଶକ ଭାରତରେ ନିବେଶ କରିବାକୁ ପଛେଇବେ। ଏଣୁ ଭାରତୀୟ ସେୟାର ବଜାର ପ୍ରଭାବିତ ହେବ। ଏଥିରେ ଯଦି ବୈଶ୍ୱିର ଟ୍ରେଡୱାର ଆରମ୍ଭ ହୁଏ ଭାରତୀୟ ଅର୍ଥ ବ୍ୟବସ୍ଥା ଅସ୍ଥିର ହୋଇପାରେ।
ଝଟକା ସହିପାରିବ ଭାରତ
ବିଶେଷଜ୍ଞଙ୍କ ଆକଳନ ଯେ ଭାରତ ଉନ୍ନତ ଓ ବିକଶିତ ଜି-୨୦ଦେଶମାନଙ୍କ ମଧ୍ୟରେ ଦ୍ରୁତ ଅଭିବୃଦ୍ଧି ହାସଲ କରୁଥିବା ଅର୍ଥବ୍ୟବସ୍ଥା ହୋଇ ରହିବ। ଏକ ନୂଆ ରିପୋର୍ଟ ଅନୁସାରେ ରପ୍ତାନୀକୁ ନେଇ ଆମେରିକା ବଜାର ଉପରେ ଭାରତ କମ ନିର୍ଭରଶୀଳ ରହୁଥିବାରୁ ସମ୍ଭାବିତ ଦୁଃସ୍ପ୍ରଭାବରୁ ମୁକ୍ତ ରହିବ। ରେଟିଂ ଏଜେନ୍ସୀ ମାନେ ମଧ୍ୟ ୨୦୨୫-୨୬ ଆର୍ଥିକ ବର୍ଷ ନିମନ୍ତେ ଭାରତର ୬.୫ ପ୍ରତିଶତ ଅଭିବୃଦ୍ଧି ଆକଳନ କରିଛନ୍ତି। ଯାହା ଅନ୍ୟଦେଶଙ୍କ ତୁଳନାରେ ସବୁଠୁ ଅଧିକ।
ରପ୍ତାନୀ ବଜାର ଉପରେ ଅଧିକ ଧ୍ୟାନ ଦେବାକୁ ହେବ
ବିଶେଷଜ୍ଞ ଏହା ବି କହିଛନ୍ତି ଯେ ଏ ସବୁ ସତ୍ତ୍ୱେ ଭାରତକୁ ଏହି ସଂକଟରୁ ବାହାରିବା ଲାଗି କିଛି ରଣନୀତି ଉପରେ କାମ କରିବାକୁ ପଡିବ। ଯେପରିକି ଅନ୍ୟ ରପ୍ତାନୀ ବଜାର ଉପରେ ଧ୍ୟାନ ଦେବାକୁ ପଡିବ। ୟୁରୋପ, ଆଫ୍ରିକା ଓ ଏସିୟ ଦେଶଙ୍କ ସହିତ ବ୍ୟବସାୟ ବଢାଇବା ଉପରେ ଜୋର ଦେବାକୁ ପଡିବ। ଏହା ଛଡା ଘରୋଇ ଉଦ୍ୟୋଗଙ୍କୁ କର ରିହାତି ଓ ସବସିଡି ଦେବାକୁ ପଡିବ। ଯାହା ଦ୍ୱାରା ସେମାନେ ନୂଆ ଟାରିଫ ପ୍ରଭାବକୁ ସଫଳ ମୁକାବିଲା କରିପାରିବେ।
ଏହିସବୁ ଦେଶଙ୍କ ଉପରେ ପଡିବ ପ୍ରଭାବ
ଆମେରିକାର ନୂଆ ଟାରିଫ ପ୍ରଭାବ କିଛି ଖାସ ଦେଶଙ୍କ ଉପରେ ପଡିବ। ଆମେରିକୀୟ ବ୍ୟାପାର ପ୍ରତିନିଧି ଅଫିସ ୨୧ ଦେଶଙ୍କ ତାଲିକା ଜାରି କରିଛି, ଯେଉଁମାନଙ୍କ ସହିତ ଆମେରିକାର ସନ୍ତୁଳିତ ବ୍ୟବସାୟ ନାହିଁ। ଏପରି ଦେଶମାନେ ହେଲେ ଆର୍ଜେଣ୍ଟିନା, ଅଷ୍ଟ୍ରେଲିୟା, ବ୍ରାଜିଲ, କାନାଡା, ଚୀନ, ୟୁରୋପୀୟ ୟୁନିୟନ, ଭାରତ, ଇଣ୍ଡୋନେସିୟା, ଜାପାନ, ସାଉଥକୋରିଆ, ମାଲେସିୟା, ମେକ୍ସିକୋ, ଋଷିଆ, ସାଉଦୀ ଆରବ, ସାଉଥ ଆଫ୍ରିକା, ସ୍ୱିଜରଲ୍ୟାଣ୍ଡ, ତାଇୱାନ, ଥାଇଲ୍ୟାଣ୍ଡ, ତୁର୍କି ବ୍ରିଟେନ ଓ ଭିଏତନାମ।
