ନୂଆଦିଲ୍ଲୀ: ସେୟାର ମାର୍କେଟରେ ଆଜି ଉତ୍ଥାନ ପତନ ଦେଖିବାକୁ ମିଳିଥିଲା । ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ଘୋଷଣା ପରେ ସେନ୍ସେକ୍ସ ୩୨୨ ଅଙ୍କ ଖସିଥିଲା । ସେପଟେ ନିଫ୍ଟି ଖସି ପୁଣି ଥରେ ୨୩,୨୫୦ ପଏଣ୍ଟର ଗୁରୁତ୍ୱପୂର୍ଣ୍ଣ ସ୍ତରରେ ଆସି ପହଞ୍ଚିଛି । କିନ୍ତୁ କ୍ଷୁଦ୍ର ଓ ମଧ୍ୟମ ଧରଣ ସେୟାରରେ ଆଜି ସ୍ଥିତି ଓଲଟା ଦେଖିବାକୁ ମିଳିଥିଲା । ବିଏସ୍ଇର ମିଡ୍କ୍ୟାପ୍ ଇଣ୍ଡେକ୍ସ ୦.୩୧ ପ୍ରତିଶତ ବଢି ବନ୍ଦ ହୋଇଛି । ସେହିପରି ସ୍ମଲ୍କ୍ୟାପ୍ ଇଣ୍ଡେକ୍ସ ୦.୭୬ ପ୍ରତିଶତ ବଢିଛି । ଏହି କାରଣରୁ ନିବେଶକଙ୍କୁ ଆଜି ପ୍ରାୟ ୩୩ ହଜାର କୋଟି ଟଙ୍କା ଲାଭ ହୋଇଛି । ରାଷ୍ଟ୍ରପତି ଟ୍ରମ୍ପଙ୍କ ରେସିପ୍ରୋକଲ୍ ଟାରିପ୍ ଘୋଷଣା ପରେ ଆଇଟି, ମେଟାଲ୍ ଓ ଅୟଲ ଆଣ୍ଡ ଗ୍ୟାସ୍ ସେୟାରେ ବଡ଼ ଧରଣ ବିକ୍ରି ଦେଖିବାକୁ ମିଳିଛି ।
କାରବାର ଶେଷରେ ବିଏସ୍ଇ ସେନ୍ସେକ୍ସ ୩୨୨.୦୮ ଅଙ୍କ ବା ୦.୪୨ ପ୍ରତିଶତ ହ୍ରାସ ପାଇ ୭୬,୨୯୫.୩୬ ସ୍ତରରେ ବନ୍ଦ ହୋଇଛି । ଅନ୍ୟପଟେ ଏନ୍ଏସ୍ଇର ୫୦ ସେୟାର ସେୟାର ବିଶିଷ୍ଟ ସୂଚକାଙ୍କ ନିଫ୍ଟି ୮୨.୨୫ ଅଙ୍କ ବା ୦.୩୫ ପ୍ରତିଶତ ଖସି ୨୩,୨୫୦.୧୦ ସ୍ତରରେ ବନ୍ଦ ହୋଇଛି ।
ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମୋଟ୍ ମାକେର୍ଟ କ୍ୟାପ୍ ଆଜି ଏପ୍ରିଲ୍ ୩ରେ ବୃଦ୍ଧି ପାଇ ୪୧୩.୩୧ ଲକ୍ଷ କୋଟି ଟଙ୍କା ହୋଇଛି । ପୂର୍ବ କାରବାର ଦିନ ଅର୍ଥାତ୍ ଗୁରୁବାର ଏପ୍ରିଲ୍ ୨ରେ ଏହା ୪୧୨.୯୮ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ପ୍ରାୟ ୩୩ ହଜାର ଲକ୍ଷ କୋଟି ଟଙ୍କା ବୃଦ୍ଧି ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ୩୩ ହଜାର କୋଟି ଟଙ୍କା ଲାଭ ହୋଇଛି । ବିଏସ୍ଇ ସେନ୍ସେକ୍ସର ୩୦ ମଧ୍ୟରୁ ୧୩ ସେୟାର ଆଜି ସବୁଜ ସଂକେତରେ ବନ୍ଦ ହୋଇଛି ।
