ନୂଆଦିଲ୍ଲୀ ୪।୪: ଯେଉଁ ଭୟ ଥିଲା ତାହା ହିଁ ହେଲା। ଅର୍ଥାତ ବିଶ୍ୱରେ ଟ୍ରେଡୱାର ଆରମ୍ଭ ହୋଇଯାଇଛି। କାରଣ ଆମେରିକାର ଟାରିଫ ଜବାବରେ ଚୀନ୍ ୪ ଏପ୍ରିଲ ଶୁକ୍ରବାର ଜବାବୀ ଟାରିଫ ଘୋଷଣା କରିଛି। ଏହି ଅନୁସାରେ ଚୀନ୍ ଏବେ ଆମେରିକୀୟ ଉତ୍ପାଦ ଉପରୁ ୩୪% ଅତିରିକ୍ତ ଟାରିଫ ଅସୁଲ କରିବ। ତେବେ କେବଳ ଚୀନ ନୁହେଁ ପୂର୍ବରୁ କାନାଡା ମଧ୍ୟ ଆମେରିକୀୟ ଟାରିଫ ଜବାବରେ ଅତିରିକ୍ତ ଟାରିଫ ଘୋଷଣା କରିସାରିଛି। ଏହାର ପ୍ରାରମ୍ଭ ଆମେରିକା ପକ୍ଷରୁ ଟ୍ରେଡ ପାର୍ଟନରଙ୍କ ଉପରେ ଟାରିଫ ଘୋଷଣାରୁ ହୋଇଛି।
ଚୀନ୍ ଆମେରିକୀୟ ଗୁଡସ୍ ଓ କମ୍ପାନୀଙ୍କ ଉପରେ ନୂଆ ଟାରିଫ ଏବଂ ଏକ୍ସପୋର୍ଟ କଣ୍ଟ୍ରୋଲ ଘୋଷଣା କରି ଆମେରିକା ସହିତ ବାଣିଜ୍ୟ ଯୁଦ୍ଧକୁ ଉସକାଇଛି। ଚୀନ୍ ୧୬ଟି ଆମେରିକୀୟ ଏଣ୍ଟିଟିଜ୍ କୁ ତାର ଏକ୍ସପୋର୍ଟ କଣ୍ଟ୍ରୋଲ ଲିଷ୍ଟରେ ଯୋଡିଛି। ଚୀନ୍ ରେୟାର ଆର୍ଥ ଏଲିମେଣ୍ଟ ଉପରେ ମଧ୍ୟ ଏକ୍ସପୋର୍ଟ କଣ୍ଟ୍ରୋଲ ଲଗାଉଛି, ଯାହା ହାଇଟେକ୍ କମ୍ପାନୀଙ୍କ ନିମନ୍ତେ ଏକ ଗୁରୁତ୍ୱପୂର୍ଣ୍ଣ ଉପାଦାନ। ଏହି ସବୁ ଏଲିମେଣ୍ଟ ସେମିକଣ୍ଡକ୍ଟର, ଇଲେକ୍ଟ୍ରିକ ବାହନ ଓ ମିଲେଟ୍ରି ସାମାନ ନିର୍ମାଣରେ ଜରୁରି।
ବେଜିଂ ପୂର୍ବରୁ ୟୁରୋପୀୟ ସଂଘ ସହିତ ମିଶି ଆମେରିକାକୁ ଜବାବୀ କାର୍ଯ୍ୟାନୁଷ୍ଠାନର ଧମକ ଦେଇଥିଲା। ଗ୍ଲୋବାଲ ଟାଇମ୍ସ ଅନୁସାରେ ଚୀନ୍ ବାରମ୍ବାର ଆମେରିକା ଦ୍ୱାରା ଚୀନରୁ ଆମଦାନୀ ହେଉଥିବା ଉତ୍ପାଦ ଉପରେ ଅତିରିକ୍ତ ଟାରିଫ ଲଗାଇବାରେ ଅସହମତି ପ୍ରକାଶ କରୁଥିଲା। ଚୀନ କମର୍ସ ମିନିଷ୍ଟ୍ରି କହିଥିଲା ଯେ ଦେଶ ନିଜର ଅଧିକାର ଓ ସ୍ୱାର୍ଥକୁ ଦୃଢତାର ସହ ରକ୍ଷା କରିବାକୁ ଜବାବୀ ପଦକ୍ଷେପ ନେବ। ଚୀନ୍ କମର୍ସ ମନ୍ତ୍ରାଳୟ ଏହା ମଧ୍ୟ କହିଥିଲା ଯେ ଚୀନ ସରକାର ଉତ୍ପାଦ ଉପରେ ଆଇନ ଅନୁସାରେ ଏକ୍ସପୋର୍ଟ କଣ୍ଟ୍ରୋଲ ଜାରି କରିବେ। ଏହାର ଉଦ୍ଦେଶ୍ୟ ଜାତୀୟ ସୁରକ୍ଷା ଓ ହୀତର ସୁରକ୍ଷା ଭଳି ଅନ୍ତର୍ଜାତୀୟ ଦାୟିତ୍ୱ ନିର୍ବାହ କରିବା।
