ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ତିନି ଦିନିଆ ଶ୍ରୀଲଙ୍କା ଗସ୍ତରେ ଯାଇ ରାଜଧାନୀ କଲମ୍ବୋରେ ପହଞ୍ଚିଛନ୍ତି। ଏହା ମୋଦୀଙ୍କର ସମ୍ପୂର୍ଣ୍ଣ ବ୍ୟବସାୟିକ ଗସ୍ତ ବୋଲି କୁହାଯାଉଚି। ଦୁଇ ଦେଶ ମଧ୍ୟରେ ପ୍ରତିରକ୍ଷା, ଶକ୍ତି, ଡିଜିଟାଲ ଭିତ୍ତିଭୂମି, ସ୍ୱାସ୍ଥ୍ୟ ଏବଂ ବାଣିଜ୍ୟ କ୍ଷେତ୍ରକୁ ନେଇ ଗୁରୁତ୍ୱପୂର୍ଣ୍ଣ ଚୁକ୍ତିନାମା ସ୍ୱାକ୍ଷରିତ ହୋଇପାରେ।
ଗତ ବର୍ଷ ରାଷ୍ଟ୍ରପତି ଅନୁରା କୁମାର ଦିଶାନାୟକଙ୍କ ନେତୃତ୍ୱରେ ବାମପନ୍ଥୀ ନ୍ୟାସନାଲ ପିପୁଲ୍ସ ପାୱାର ଆଲାଇନ୍ସ କ୍ଷମତାକୁ ଆସିବା ପରେ ଏହା ପ୍ରଧାନମନ୍ତ୍ରୀ ମୋଦୀଙ୍କର ପ୍ରଥମ ଶ୍ରୀଲଙ୍କା ଗସ୍ତ। ଏହା ପୂର୍ବରୁ ଶ୍ରୀଲଙ୍କା ରାଷ୍ଟ୍ରପତି ଦିଶାନାୟକେ ଡିସେମ୍ବର ୨୦୨୪ରେ ନୂଆଦିଲ୍ଲୀ ଆସିଥିଲେ। ରାଷ୍ଟ୍ରପତି ହେବା ପରେ ଏହା ତାଙ୍କର ପ୍ରଥମ ବିଦେଶ ଗସ୍ତ ଥିଲା। ଏହି ସମୟରେ ଉଭୟ ଦେଶ ପକ୍ଷରୁ ଗୁରୁତ୍ୱପୂର୍ଣ୍ଣ କ୍ଷେତ୍ରଗୁଡ଼ିକୁ ସହଯୋଗ ନେଇ ମିଳିତ ବିବୃତ୍ତି ଜାରି କରାଯାଇଥିଲା।
ତେବେ ପ୍ରଧାନମନ୍ତ୍ରୀଙ୍କ ଗସ୍ତ ପୂର୍ବରୁ, ପ୍ରଧାନମନ୍ତ୍ରୀ ମୋଦୀ ଏବଂ ରାଷ୍ଟ୍ରପତି ଦିଶାନାୟକେ ଉଭୟ ଏକ୍ସରେ ପୋଷ୍ଟ କରି ଏକ ନୂଆ ସମ୍ଭାବନା ଆଶା ବ୍ୟକ୍ତ କରିଥିଲେ। ଦ୍ୱିପାକ୍ଷିକ ସହଭାଗୀତାକୁ ସୁଦୃଢ଼ କରିବା ଏବଂ ସହଯୋଗର ନୂଆ କ୍ଷେତ୍ର ଅନୁସନ୍ଧାନ କରିବାକୁ ଉଭୟ ନେତା ଅପେକ୍ଷା କରିଛନ୍ତି ବୋଲି ଦୁହେଁ ପୋଷ୍ଟ କରିଥିଲେ।
ପଢନ୍ତୁ- ଆମେରିକା ଉପରେ ଚୀନର ପାଲଟା ଶୁଳ୍କ ଘୋଷଣା ପରେ ୮ ପ୍ରତିଶତ କମିଲା ତେଲ ଦର
ଏହି ଗସ୍ତ ସମୟରେ ୮ଟି ବୁଝାମଣାପତ୍ର ସ୍ୱାକ୍ଷରିତ ହେବାର ଆଶା କରାଯାଉଛି। ସମ୍ପର୍କିତ ଭାରତୀୟ ଅଧିକାରୀ କହିଛନ୍ତି ଯେ ଏହି ଚୁକ୍ତିନାମାଗୁଡ଼ିକ ଶ୍ରୀଲଙ୍କାକୁ ଶସ୍ତା ଶକ୍ତି ଯୋଗାଣ ସମେତ ଡିଜିଟାଲାଇଜେସନ୍, ସ୍ୱାସ୍ଥ୍ୟ, ପ୍ରତିରକ୍ଷା ଏବଂ ଶକ୍ତି କ୍ଷେତ୍ରରେ ଅଧିକ ସହଯୋଗକୁ ବଢ଼ାଇବ।
ତେବେ ଶ୍ରୀଲଙ୍କା ଗସ୍ତରେ ପ୍ରଧାନମନ୍ତ୍ରୀ ମୋଦିଙ୍କ ସହିତ ବୈଦେଶିକ ମନ୍ତ୍ରୀ ଏସ. ଜୟଶଙ୍କର, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଏବଂ ବୈଦେଶିକ ସଚିବ ବିକ୍ରମ ମିଶ୍ରୀ ଯାଇଛନ୍ତି।
କାର୍ଯ୍ୟ ସୂଚୀ ଅନୁସାରେ, ଶନିବାର ପ୍ରଧାନମନ୍ତ୍ରୀ ମୋଦି କଲମ୍ବୋ ଇଣ୍ଡିପେଣ୍ଡେନ୍ସ ସ୍କୋୟାରରେ ଶ୍ରୀଲଙ୍କା ପକ୍ଷରୁ ଗାର୍ଡ ଅଫ୍ ଅନର ଗ୍ରହଣ କରିବେ। ଏବଂ ପରେ ରାଷ୍ଟ୍ରପତି ସଚିବାଳୟରେ ରାଷ୍ଟ୍ରପତି ଦିଶାନାୟକଙ୍କ ସହ ଆନୁଷ୍ଠାନିକ ଆଲୋଚନା କରିବାର କାର୍ଯ୍ୟକ୍ରମ ରହିଛି।
ପଢନ୍ତୁ- ଟ୍ରମ୍ପଙ୍କ ପାଲଟା ଶୁଳ୍କରେ ପଲଟିଲା ଆମେରିକା ଆରବପତିଙ୍କ ଡଙ୍ଗା: ଶିଳ୍ପପତିଙ୍କ ସମ୍ପତ୍ତିରେ ବଡ଼ ହ୍ରାସ
