ନୂଆଦିଲ୍ଲୀ: ଆମେରିକାରେ ମନ୍ଦାବସ୍ଥାର ଆଶଂକା ବଢିଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ଘୋଷଣା ପରେ ୱାଲ୍ ଷ୍ଟ୍ରିଟରେ ହଇଚଇ ସୃଷ୍ଟି ହୋଇଛି । ଅନେକ ବଡ଼ ବ୍ୟାଙ୍କ ମନ୍ଦାବସ୍ଥା ଆସିବା ନେଇ ଚେତାବନୀ ଦେଇଛନ୍ତି । ଟ୍ରମ୍ପ ବୁଧବାର ୬୦ରୁ ଅଧିକ ଦେଶ ଉପରେ ଅତିରିକ୍ତ ଶୁଳ୍କ ଲଗାଇଥିଲେ । ଏହାପରେ ଦୁନିଆରେ ମାନ୍ଦାବସ୍ଥା ଭୟ ବଢିଛି । ଏହି କାରଣରୁ ଗୁରୁବାର ସାରା ଦୁନିଆର ସେୟାର ମାର୍କେଟର ଭୟଙ୍କର ରୂପେ ପ୍ରଭାବିତ ହୋଇଥିଲା । ଆମେରିକା ସେୟାର ମାର୍କେଟ୍ ୫ ବର୍ଷର ସବୁଠୁ ବଡ଼ ହ୍ରାସ ଦେଖିଥିଲା । ଏହି ହ୍ରାସରେ ନିବେଶକଙ୍କ ୨.୪ ଟ୍ରିଲିୟନ ଡଲାର ସ୍ୱାହା ହୋଇଥିଲା । ସେପଟେ ଭାରତୀୟ ସେୟାର ବଜାର ଗୁରୁବାର ପରେ ଶୁକ୍ରବାର ବି ହ୍ରାସ ସହ ବନ୍ଦ ହୋଇଛି । ସେନସେକ୍ସ ୯୦୦ ଅଙ୍କରୁ ଅଧିକ ଅଙ୍କ ହ୍ରାସ ପାଇ ବନ୍ଦ ହୋଇଛି । ଯେଉଁଥି ପାଇଁ ନିବେଶକଙ୍କୁ ୯.୫ ଲକ୍ଷ କୋଟି ଟଙ୍କା କ୍ଷତି ସହିବାକୁ ପଡ଼ିଛି ।
ବ୍ଲୁମବର୍ଗର ରିପୋର୍ଟ ଅନୁସାରେ ଅର୍ଥଶାସ୍ତ୍ରୀ ବ୍ରୁସ୍ କାସମ୍ୟାନ୍ ଭୟଙ୍କର ସ୍ଥିତି ନେଇ ଚେତାବନୀ ଦେଇଛନ୍ତି । ପ୍ରତିଷ୍ଠିତ ନିବେଶ ବ୍ୟାଙ୍କ ଜେ.ପି.ମୋର୍ଗାନର ମୁଖ୍ୟ ଅର୍ଥଶାସ୍ତ୍ରୀ ବ୍ରୁସ୍ କହିଛନ୍ତି ଯେ ୨୦୨୫ରେ ବୈଶ୍ୱିକ ମନ୍ଦାବସ୍ଥାର ୬୦ ପ୍ରତିଶତ ଆଶଂକା ରହିଛି । ଟ୍ରମ୍ପଙ୍କ ଟାରିଫ୍ ଘୋଷଣା ପୂର୍ବରୁ ଏହି ସମ୍ଭାବନା ୪୦ ପ୍ରତିଶତ ଥିଲା । କାସମ୍ୟାନ୍ ‘There will be blood’ ଶୀର୍ଷକରେ ଲେଖିଛନ୍ତି, 'ଏହି ଟ୍ୟାକ୍ସ ବୃଦ୍ଧିର ପ୍ରଭାବ ଆହୁରି ଅଧିକ ପଡ଼ିବ । ପଲଟା କାର୍ଯ୍ୟାନୁଷ୍ଠାନ, ଆମେରିକୀୟ ବ୍ୟବସାୟ ଭାବନାରେ ପରିବର୍ତ୍ତନ ଓ ଯୋଗାଣ ଶୃଙ୍ଖଳାରେ ବ୍ୟବଧାନ ଉପରେ ନିର୍ଭ କରିବ ।' ଗୋଲ୍ଡମ୍ୟାନ୍ ସ୍ୟାକ୍ ମଧ୍ୟ ସମାନ ଚିନ୍ତା ପ୍ରକାଶ କରିଛି । ସଂସ୍ଥା ଆଗାମୀ ୧୨ ମାସରେ ମନ୍ଦାବସ୍ଥା ଆଶଂକାକୁ ୨୦ ପ୍ରତିଶତରୁ ବଢାଇ ୩୫ ପ୍ରତିଶତ କରିଛି ।
ଗୋଲ୍ଡମ୍ୟାନ୍ ସ୍ୟାକ୍ ୨୦୨୫ରେ ଜିଡିପିର ଅନୁମାନକୁ ହ୍ରାସ କରି କେବଳ ୧ ପ୍ରତିଶତ କରିଛି । ସେହିପରି ବେରୋଜଗାର ହାର ୪.୫ ପ୍ରତିଶତ ଯାଏ ବଢିବାର ଅନୁମାନ ରହିଛି । ଗୋଲ୍ଡମ୍ୟାନ୍ ରିପୋର୍ଟରେ କୁହାଯାଇଛି ଯେ ଆମର ଅନୁମାନରେ ଗତ ଏକ ମାସରେ ହାଉସହୋଲ୍ଡସ ଓ ବିଜନେସରେ ଆତ୍ମବିଶ୍ୱାସ ହ୍ରାସକୁ ଦର୍ଶାଉଛି । ଟାରିଫ୍ ଘୋଷଣା ପରେ ଆର୍ଥିକ ବଜାରରେ ବଡ଼ ହ୍ରାସ ଘଟିଛି । ଏସ୍ ଆଣ୍ଡ ପି ୫୦୦ରେ ୨୦୨୦ ପରେ ସବୁଠୁ ଖରାପ ଦିନ ସାମନା କରିଛି ।
ୟୁନିଭର୍ସିଟି ଅଫ୍ ମିଶିଗନର ସର୍ଭେ ଅନୁସାରେ, ମହାମାନ୍ଦାବସ୍ଥା ପରେ ଏବେ ଆମେରିକାରେ ଅଧିକ ବେରୋଜଗାରୀ ବଢିବା ଆଶଂକା ରହିଛି । ସେପଟେ ମୁଡିଜ୍ ଆନାଲିଟିକ୍ସର ମୁଖ୍ୟ ଅର୍ଥଶାସ୍ତ୍ରୀ ମାର୍କ ମଧ୍ୟ ମାନ୍ଦାବସ୍ଥା ଅନୁମାନକୁ ୧୫ ପ୍ରତିଶତରୁ ବଢାଇ ୪୦ ପ୍ରତିଶତ କରିଛନ୍ତି । ଗୋଲ୍ଡମ୍ୟାନ୍ ସ୍ୟାକର ଅନୁମାନ ଅନୁସାରେ ବର୍ଷ ଶେଷ ସଦ୍ଧା ମୁଦ୍ରାସ୍ଫୀତି ୩.୫ ଯାଏ ପହଞ୍ଚିପାରେ । ପ୍ରଥମେ ଏହି ଅନୁମାନ ୩ ପ୍ରତିଶତ ଥିଲା । ଅଧିକ ଟାରିଫରୁ ଉପଭୋକ୍ତା ସମାଗ୍ରୀର ମୂଲ୍ୟ ବୃଦ୍ଧି ହେବା ନିଶ୍ଚିତ । ଅନେକ କ୍ଷେତ୍ରରେ ସାମଗ୍ରୀ ନିର୍ମାଣର ଖର୍ଚ୍ଚ ବଢିବ । ସଂସ୍ଥା ଚେତାବନୀ ଦେଇଛି ଯେ ଅଧିକ ଟାରିଫରୁ ଉପଭୋକ୍ତା ସଂକଟ ବଢିବାର ସମ୍ଭାବନା ଅଧିକ ।
