ୱାଶିଂଟନ ଡିସି: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୫୦ରୁ ଅଧିକ ଦେଶ ଉପରେ ପାଲଟା ଶୁଳ୍କ(ରେସିପ୍ରୋକାଲ ଟ୍ୟାକ୍ସ) ଲଗାଇବା ଦ୍ୱାରା ସାରା ବିଶ୍ୱରେ ହଇଚଇ ସୃଷ୍ଟି ହୋଇଛି। ଟ୍ରମ୍ପଙ୍କ ଟାରିଫ ଯୋଗୁ ବିଶ୍ୱରେ ମାନ୍ଦାବସ୍ଥା ଘନେଇବ ବୋଲି ଏକ୍ସପର୍ଟ ମତ ଦେଇଥିବା ବେଳେ ଏପଟେ ଧରାସାୟୀ ହୋଇଛି ଆମେରିକା ଶେୟାର ବଜାର। ନିବେଶକଙ୍କର ୧.୭ ଟ୍ରିଲିୟନ ଡଲାର ପାଣିରେ ବୁଡ଼ିଛି।
ଟ୍ରମ୍ପଙ୍କ ଟାରିଫ ମାଡ଼ରେ ବିଶ୍ୱର ୫୦୦ ଧନୀ ବ୍ୟବସାୟୀଙ୍କ ସମ୍ପତ୍ତିରେ ମଧ୍ୟ ହ୍ରାସ ଘଟିଛି। ଟାରିଫ ଘୋଷଣାର ୨୪ ଘଣ୍ଟା ପରେ ଧନୀଙ୍କ ମିଳିତ ସମ୍ପତ୍ତିରେ ୨୦୮ ବିଲିଅନ ଡଲାର ହ୍ରାସ ପାଇଛି। ଯାହା ଏକ ଦଶନ୍ଧିରୁ ଅଧିକ ସମୟ ମଧ୍ୟରେ ସମ୍ପତ୍ତି ହ୍ରାସର ସବୁଠାରୁ ଏକ ବଡ଼ ପତନ ମଧ୍ୟରୁ ଗୋଟିଏ।
ଟ୍ରମ୍ପଙ୍କ ନୂଆ ଶୁଳ୍କ ଅନେକ ଆରବପତିଙ୍କୁ ପ୍ରଭାବିତ କରିଛି ବୋଲି ଶୁକ୍ରବାର ବ୍ଲୁମବର୍ଗ ବିଲିୟନିୟର ଇଣ୍ଡେକ୍ସ (BBI) ରୁ ତଥ୍ୟ ନେଇ ରିପୋର୍ଟ ପ୍ରକାଶ କରିଛି ସ୍ପୁଟନିକ୍। ବିଶ୍ୱର ଶ୍ରେଷ୍ଠ ୫୦୦ କୋଟିପତିଙ୍କ ସମ୍ପତ୍ତିରେ ଏହି ହ୍ରାସ ୧୩ ବର୍ଷ ପୂର୍ବେ ବିବିଆଇ ଆରମ୍ଭ ହେବା ପରଠାରୁ ଚତୁର୍ଥ ସର୍ବବୃହତ ଏକ ଦିବସୀୟ ହ୍ରାସ ଏବଂ କୋଭିଡ-୧୯ ମହାମାରୀ ପରେ ସବୁଠାରୁ ବଡ ହ୍ରାସ ବୋଲି ସ୍ପୁଟନିକ କହିଛି। ଶୁଳ୍କର ପ୍ରଭାବ ଟ୍ରମ୍ପଙ୍କ ନିକଟତମ ସହଯୋଗୀ ଏଲୋନ ମସ୍କଙ୍କୁ ମଧ୍ୟ ଛାଡ଼ି ନାହିଁ।
ପଢନ୍ତୁ- ଆମେରିକା ଟାରିଫ ଉପରେ ଚୀନର ପାଲଟା ଆକ୍ରମଣ, ସବୁ US ଉତ୍ପାଦ ଉପରେ ଲଗାଇଦେଲା ୩୪% ଟ୍ୟାକ୍ସ
ଟାରିଫ ମାଡ଼ରେ ପ୍ରଭାବିତ ଆମେରିକା ଆରବପତି
ମାର୍କ ଜୁକର ବର୍ଗ- ବ୍ଲୁମବର୍ଗ ବିଲିୟନିୟର୍ସ ଇଣ୍ଡେକ୍ସ ଅନୁଯାୟୀ, ଆମେରିକୀୟ ଷ୍ଟକ୍ ବଜାର ଖୋଲିବା ପୂର୍ବରୁ ଆମେରିକାର ଆରବପତିମାନେ ବଡ଼ କ୍ଷତି ସହିଛନ୍ତି। ସବୁଠାରୁ ଅଧିକ କ୍ଷତି ସହିଛନ୍ତି ମେଟାର ପ୍ରତିଷ୍ଠାତା ମାର୍କ ଜୁକରବର୍ଗ। ଡଲାର ଦୃଷ୍ଟିରୁ ତାଙ୍କ ସମ୍ପତ୍ତିରେ ସବୁଠାରୁ ଅଧିକ ହ୍ରାସ ହୋଇଛି। ସୋସିଆଲ ମିଡିଆ କମ୍ପାନୀର ମୂଲ୍ୟ ୯ ପ୍ରତିଶତ ହ୍ରାସ ପାଇଛି। ଜୁକରବର୍ଗଙ୍କ ସମ୍ପତ୍ତିରେ ୧୭.୯ ବିଲିୟନ ଡଲାର ତଥା ତାଙ୍କ ସମ୍ପତ୍ତିର ପ୍ରାୟ ୯ ପ୍ରତିଶତ କ୍ଷତି ସହିବାକୁ ପଡ଼ିଛି।
ଜେଫ୍ ବେଜୋସ- ତାଙ୍କ ପଛକୁ ରହିଛନ୍ତି ଆମାଜନ ମାଲିକ ଜେଫ୍ ବେଜୋସ୍। ଗୁରୁବାର ଆମାଜନର ଶେୟାର ୯ ପ୍ରତିଶତ ହ୍ରାସ ପାଇବା ପରେ ବେଜୋସ୍ ୧୫.୯ ବିଲିୟନ ଡଲାର ସମ୍ପତ୍ତି ହରାଇଛନ୍ତି, ଯାହା ୨୦୨୨ ପରଠାରୁ ସବୁଠାରୁ ବଡ଼ ହ୍ରାସ।
ଏଲନ ମସ୍କ: ସେହିପରି, ଟ୍ରମ୍ପଙ୍କ ଘନିଷ୍ଠ ଟେସଲାର ସିଇଓ ଏବଂ ଡଜ୍ ନେତା ଏଲନ ମସ୍କ ଗୁରୁବାର ୧୧ ବିଲିୟନ ଡଲାର ହରାଇଛନ୍ତି। ‘ଲିବରନେସନ ଡେ’ ଟ୍ରମ୍ପଙ୍କ ଶୁଳ୍କ ଘୋଷଣା ପରେ ତାଙ୍କ କେୟାର କମ୍ପାନୀର ସେୟାର ୫.୫ ପ୍ରତିଶତ ହ୍ରାସ ପାଇଛି।
ବର୍ଣ୍ଣାର୍ଡ ଆର୍ନଲ୍ଟ: ଏହା ବ୍ୟତୀତ, ଆମେରିକା ବାହାରେ ରହୁଥିବା ଏକମାତ୍ର କୋଟିପତି ଯିଏ ଟ୍ରମ୍ପଙ୍କ ଶୁଳ୍କର ପ୍ରଭାବ ଭୋଗିଥିଲେ, ସେ ଥିଲେ ଫ୍ରାନ୍ସର ବର୍ଣ୍ଣାର୍ଡ ଆର୍ନଲ୍ଟ। ଆର୍ନଲ୍ଟଙ୍କ LVMH କମ୍ପାନୀ ଶେୟାରରେ ୬ ବିଲିଅନ ହ୍ରାସ ହୋଇଥିଲା।
ବର୍ଣ୍ଣାର୍ଡ ଆର୍ନଲ୍ଟ
ପଢନ୍ତୁ- ତଳମୁହାଁ ଖସିଲା ସୁନା ଓ ରୂପା ଦର, ଏକ୍ସପର୍ଟଙ୍କଦାବି-୪୦% ପର୍ଯ୍ୟନ୍ତ ହୋଇପାରେ ଶସ୍ତା
