ନୂଆଦିଲ୍ଲୀ: ଶୁକ୍ରବାର ଚୀନ୍ ଆମେରିକା ଉପରେ ପଲଟା ଶୁଳ୍କ ଘୋଷଣା କରିବା ପରେ ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ମୂଲ୍ୟ ପ୍ରାୟ ୮ ପ୍ରତିଶତ ହ୍ରାସ ପାଇଛି। ୨୦୨୧ କରୋନାଭାଇରସ୍ ମହାମାରୀ ବେଳେ ଯେଉଁଭଳି ହ୍ରାସ ପାଇଥିଲା ବର୍ତ୍ତମାନ ତେଲ ସେହିପରି ସର୍ବନିମ୍ନ ସ୍ତର ଆଡ଼କୁ ମୁହାଁଉଛି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୫୦ରୁ ଅଧିକ ଦେଶ ଉପରେ ଶୁଳ୍କ ଲାଗୁ କରିବାକୁ ଘୋଷଣା କରିବା ପରେ ଜବାବରେ ଚୀନ ମଧ୍ୟ ଶୁକ୍ରବାର ଆମେରିକା ଉପରେ ପଲଟା ଶୁଳ୍କ ଲଗାଇଛି। ଚୀନ୍ ୧୦ ଏପ୍ରିଲରୁ ଆମେରିକୀୟ ସାମଗ୍ରୀ ଉପରେ ଅତିରିକ୍ତ ୩୪ ପ୍ରତିଶତ ଶୁଳ୍କ ଲାଗୁ କରିବ ବୋଲି ଘୋଷଣା କରିଛି। ଟ୍ରମ୍ପଙ୍କର ଏଭଳି ଶୁଳ୍କ ବୃଦ୍ଧି କରିବା ପରେ ବିଶ୍ୱର ବିଭିନ୍ନ ଦେଶ ପ୍ରତିଶୋଧ ନେବାକୁ ପ୍ରସ୍ତୁତ ହୋଇଛନ୍ତି। ଯାହା ଫଳରେ ବିଶ୍ୱ ଆର୍ଥିକ ବଜାରରେ ତୀବ୍ର ହ୍ରାସ ଘଟିଛି।
ପଢନ୍ତୁ- ଚୀନରୁ ଆସିପାରେ ଶସ୍ତା ସାମଗ୍ରୀର ବନ୍ୟା! ଭାରତ ସରକାରଙ୍କ ଉଚ୍ଚସ୍ତରୀୟ ବୈଠକ ଆରମ୍ଭ
ବ୍ରେଣ୍ଟ ଫ୍ୟୁଚର୍ସ ୫.୩୦ ଡଲାର (୧୨୫୪ ଜିଏମ୍ଟି),ଅର୍ଥାତ ୭.୬ ପ୍ରତିଶତ ହ୍ରାସ ପାଇ ୬୪.୮୪ ପ୍ରତି ବ୍ୟାରେଲକୁ ପହଞ୍ଚିଛି। ଆମେରିକାର ପଶ୍ଚିମ ଟେକ୍ସାସ ଇଣ୍ଟରମିଡିଏଟ୍ ଅଶୋଧିତ ତୈଳ ମୂଲ୍ୟ ୫.୪୭ ଅର୍ଥାତ୍ ୮.୨ ପ୍ରତିଶତ ହ୍ରାସ ପାଇ ୬୧.୪୮ରେ ପହଞ୍ଚିଛି।
ଏନେଇ ସେକ୍ସୋ ବ୍ୟାଙ୍କର କମୋଡିଟି ଷ୍ଟ୍ରାଟେଜି ମୁଖ୍ୟ ଓଲେ ହାନସେନ ରଏଟର୍ସକୁ ପ୍ରତିକ୍ରିୟା ଦେଇ କହିଛନ୍ତି "ଆମେରିକାର ଶୁଳ୍କ ବିରୁଦ୍ଧରେ ଚୀନର ଆକ୍ରମଣାତ୍ମକ ପଲାଟ କାର୍ଯ୍ୟାନୁଷ୍ଠାନ ଏହା ନିଶ୍ଚିତ କରୁଛି ଯେ ଆମେ ଏକ ବିଶ୍ୱ ବାଣିଜ୍ୟ ଯୁଦ୍ଧ ଆଡକୁ ଅଗ୍ରସର ହେଉଛୁ। ଏହା ଏମିତି ଏକ ଯୁଦ୍ଧ ଯାହାର ବିଜେତା କେହି ହୋଇପାରିବେ ନାହିଁ। ହେଲେ ଏହା ଅର୍ଥନୈତିକ ଅଭିବୃଦ୍ଧି ଏବଂ ଅଶୋଧିତ ତେଲ ଏବଂ ରିଫାଇଣ୍ଡ ପ୍ରଡକ୍ଟ ଭଳି ପ୍ରମୁଖ ସାମଗ୍ରୀର ଚାହିଦାକୁ କ୍ଷତି ପହଞ୍ଚାଇବ।"
ପଢନ୍ତୁ- ଟ୍ରମ୍ପଙ୍କ ପାଲଟା ଶୁଳ୍କରେ ପଲଟିଲା ଆମେରିକା ଆରବପତିଙ୍କ ଡଙ୍ଗା: ଶିଳ୍ପପତିଙ୍କ ସମ୍ପତ୍ତିରେ ବଡ଼ ହ୍ରାସ
