ମୁମ୍ବାଇ ୪।୪: ଭାରତୀୟ ସେୟାର ବଜାର ପାଇଁ ୪ ଏପ୍ରିଲ ଶୁକ୍ରବାର ‘ବ୍ଲାକ୍ ଫ୍ରାଇଡେ’ ସାବ୍ୟସ୍ତ ହୋଇଛି। ସେନସେକ୍ସ ଓ ନିଫ୍ଟି ୧%ରୁ ଅଧିକ କ୍ରାସ ହୋଇଛି। ଗ୍ଲୋବାଲ ଟ୍ରେଡ ୱାର ଆରମ୍ଭ ହେବା ଆଶଙ୍କା ନିବେଶକଙ୍କ ମନବଳ ହ୍ରାସ କରିଛି। ଏଣୁ ବଜାରରେ ବିକ୍ରି ଦେଖାଦେଇଥିବା ବେଳେ କାରବାର ଶେଷ ବେଳକୁ ସେନସେକ୍ସ ୯୩୦ ପଏଣ୍ଟ ହ୍ରାସ ସହ ୭୫,୩୬୪ସ୍ତରରେ ଓ ନିଫ୍ଟି ୩୪୫ ପଏଣ୍ଟ ହ୍ରାସ ସହ ୨୨,୯୦୪ ସ୍ତରରେ ବନ୍ଦ ହୋଇଛି।
ସେହିପରି କାରବାର କାଳରେ ଶୁକ୍ରବାର ସେନସେକ୍ସ ୧,୦୦୯ ପଏଣ୍ଟ ଅର୍ଥାତ ୧.୩୨% ହ୍ରାସ ହୋଇ ୭୫,୨୮୬ ସ୍ତରକୁ ଖସି ଥିଲା। ନିଫ୍ଟି ମଧ୍ୟ ୩୭୫ ପଏଣ୍ଟ ଅର୍ଥାତ ୧.୬୧ ପ୍ରତିଶତ ହ୍ରାସ ସହ ୨୨,୮୭୪ ସ୍ତରକୁ ପହଞ୍ଚି ଯାଇଥିଲା। ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସଇ)ରେ ଲିଷ୍ଟେଡ କମ୍ପାନୀଙ୍କ ମୋଟ ମାର୍କେଟ ଭାଲ୍ୟୁରେ ପାଖାପାଖି ୯.୫ଲକ୍ଷ କୋଟି ଟଙ୍କା କ୍ଷତି ହୋଇଛି। ବିଶେଷ କରି ଆଇଟି ଓ ମେଟାଲ ସେୟାର ଗୁରୁତର ପ୍ରଭାବିତ ହୋଇଛି।
ଟ୍ରମ୍ପ ପ୍ରଶାସନ ଦ୍ୱାରା ଫାର୍ମା ଉତ୍ପାଦ ଉପରେ ଟାରିଫ ଲଗାଇବାର ସଂକେତ ଯୋଗୁ ଫାର୍ମା ସେୟାରରେ ହ୍ରାସ ଦେଖାଯାଇଛି। ଅନ୍ୟପଟେ ଆମେରିକା ଟେକ୍ ସେୟାର କମଜୋର ହେବା ଯୋଗୁ ଭାରତୀୟ ଆଇଟି କମ୍ପାନୀଙ୍କ ସେୟାରରେ ହ୍ରାସ ଦେଖାଯାଇଛି। ନିଫ୍ଟିରେ ଆଇଟି ଇଣ୍ଡେକ୍ସ ୨%ହ୍ରାସ ହୋଇଛି। ସେହିପରି ଟ୍ରେଡ ବ୍ୟାରିୟର ବଢିବା ଭୟରେ ମେଟାଲ ସେୟାରରେ ବିକ୍ରି ଦେଖାଯାଇଛି। ବିଦେଶୀ ସଂସ୍ଥାଗତ ନିବେଶ (ଏଫଆଇଆଇ) ଗୁରୁବାର ୨,୮୦୬କୋଟି ଟଙ୍କାର ସେୟାର ବିକ୍ରି କରିଛନ୍ତି। ଏହି ସମୟରେ ଘରୋଇ ସଂସ୍ଥାଗତ ନିବେଶକ (ଡିଆଇଆଇ) ମାତ୍ର ୨୨୧ କୋଟିର ସେୟାର କିଣିଛନ୍ତି।
