ନୂଆଦିଲ୍ଲୀ,୦୫/୦୪: ବିଶ୍ୱର ସର୍ବବୃହତ୍ ଅର୍ଥବ୍ୟବସ୍ଥା ଆମେରିକାରେ ବଢ଼ିଯାଇଛି ମାନ୍ଦାବସ୍ଥା ଆଶଙ୍କା । ବିଭିନ୍ନ ଦେଶଗୁଡ଼ିକ ଉପରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୂଆ ଶୁଳ୍କ ନୀତି ପରେ ୱାଲ୍ ଷ୍ଟ୍ରିଟ୍ରେ ବଢ଼ିଯାଇଛି ଆର୍ଥିକ ଚିନ୍ତା । କେତେକ ବଡ଼ ବଡ଼ ବ୍ୟାଙ୍କ ମାନ୍ଦାବସ୍ଥା ନେଇ ପୂର୍ବାନୁମାନ କଲେଣି ।
ଟ୍ରମ୍ପ ବୁଧବାର ରାତିରେ ଭାରତ ସମେତ ୬୦ରୁ ଅଧିକ ଦେଶ ଉପରେ ଯେସାକୁ ତେସା ଶୁଳ୍କ ଲଗାଇବାକୁ ଘୋଷଣା କରିଥିଲେ । ଏହା ଯୋଗୁ ବିଶ୍ୱରେ ମାନ୍ଦାବସ୍ଥାର ଆଶଙ୍କା ତେଜିଛି । ଉକ୍ତ କାରଣରୁ ଗୁରୁବାର ବିଶ୍ୱବ୍ୟାପୀ ସେୟାର ବଜାରଗୁଡ଼ିକରେ ପତନ ଦେଖିବାକୁ ମିଳିଥିଲା ଏବଂ ୱାଲ୍ଷ୍ଟ୍ରିଟ୍ ନିବେଶକଙ୍କ ୨.୪ ଟ୍ରିଲିୟନ ଡଲାର ସ୍ୱାହା ହୋଇଯାଇଥିଲା ।
ଲଗାତର ଦ୍ୱିତୀୟ ଦିନ କାରବାର ଦିବସରେ ଭାରତୀୟ ଇକ୍ୱିଟି ବଜାରରେ ହ୍ରାସ ଦେଖିବାକୁ ମିଳିଛି । ଶୁକ୍ରବାର କାରବାର ଶେଷରେ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସେନ୍ସେକ୍ସ ୯୦୦ରୁ ଅଧିକ ପଏଣ୍ଟ ଖସିଯାଇଛି । ଫଳରେ ନିବେଶକଙ୍କୁ ୯.୫ ଲକ୍ଷ କୋଟି ଟଙ୍କାର ଝଟ୍କା ଲାଗିଛି । ବ୍ଲୁମ୍ବର୍ଗର ଏକ ରିପୋର୍ଟ ଅନୁସାରେ, ଆମେରିକାର ପ୍ରମୁଖ ବ୍ୟାଙ୍କ ଜେ.ପି. ମୋର୍ଗାନ୍ର ମୁଖ୍ୟ ଅର୍ଥନୀତିଜ୍ଞ ବ୍ରୁସ୍ କାସ୍ମ୍ୟାନ୍ କହିଛନ୍ତି ଯେ, ୨୦୨୫ରେ ବିଶ୍ୱ ଆର୍ଥିକ ମାନ୍ଦାବସ୍ଥାର ୬୦% ସମ୍ଭାବନା ରହିଛି ।
ସେ କହିଛନ୍ତି ଯେ, ଏହି ଟିକସ ବୃଦ୍ଧିର ପ୍ରଭାବ ଆହୁରି ବଢ଼ିପାରେ । ଏହି ପ୍ରଭାବ ରାଷ୍ଟ୍ରଗୁଡ଼ିକର ପାଲଟା ଶୁଳ୍କ ହମ୍ଲା,ଆମେରିକାରେ ବ୍ୟବସାୟିକ ସେଣ୍ଟିମେଣ୍ଟ ଖସିବା ଏବଂ ଯୋଗାଣ ଶୃଙ୍ଖଳରେ ବ୍ୟବଧାନ ଉପରେ ନିର୍ଭର କରିବ । ଗୋଲ୍ଡମ୍ୟାନ୍ ସାଚ୍ସ ବି ସମାନ ଧରଣ ଚିନ୍ତା ପ୍ରକାଶ କରିଛି । ଆଗାମୀ ୧୨ ମାସରେ ମାନ୍ଦାବସ୍ଥା ସମ୍ଭାବନା ୩୫% ଥିବା ଏହା ପ୍ରକାଶ କରିଛି ।
ଗୋଲ୍ଡମ୍ୟାନ୍ ସାଚ୍ସ ୨୦୨୫ ପାଇଁ ବିଶ୍ୱ ଜିଡିପି ଅଭିବୃଦ୍ଧି ଅନୁମାନକୁ କମାଇ ୧% କରିଦେଇଛି । ବେକାରି ହାର ୪.୫% ପର୍ଯ୍ୟନ୍ତ ବଢ଼ିବ ବୋଲି ଏହା ଅନୁମାନ କରିଛି । ଗୋଲ୍ଡମ୍ୟାନ୍ର ରିପୋର୍ଟରେ କୁହାଯାଇଛି ଯେ, ମାନ୍ଦାବସ୍ଥା ସମ୍ଭାବନାରେ ବୃଦ୍ଧି ଗତ ମାସକରେ ପାରିବାରିକ ଏବଂ ବ୍ୟବସାୟିକ ବିଶ୍ୱାସରେ ହୋଇଥିବା ହ୍ରାସକୁ ଦର୍ଶାଉଛି । ଟାରିଫ୍ ଘୋଷଣା ପରେ ଆର୍ଥିକ ବଜାରଗୁଡ଼ିକରେ ହ୍ରାସ ଘଟିଛି । ଉପଭୋକ୍ତାଙ୍କ ଭରସା ବି ଖସିଛି ।
ୟୁନିଭର୍ସିଟି ଅଫ୍ ମିଚିଗାନ୍ର ଏକ ସର୍ଭେ ଅନୁସାରେ, ମହାମାନ୍ଦାବସ୍ଥା ପରେ ଏବେ ସବୁଠାରୁ ଅଧିକ ଆମେରିକୀୟ ବେକାରି ହାର ବଢ଼ିବାର ଆଶଙ୍କା ରହିଛି । ମୁଡିସ୍ ଆନାଲିଟକ୍ସର ମୁଖ୍ୟ ଅର୍ଥନୀତିଜ୍ଞ ମାର୍କ ଜାଣ୍ଡି ମାନ୍ଦାବସ୍ଥା ସମ୍ଭାବନାକୁ ୧୫% ରୁ ବଢ଼ାଇ ୪୦% କରିଦେଇଛନ୍ତି ।
ସେ ସୋସିଆଲ ମିଡିଆ ପ୍ଲାଟ୍ଫର୍ମ ‘ଏକ୍ସ’ରେ ଲେଖିଛନ୍ତି ଯେ, ଦ୍ରୁତ ବେଗରେ ବଢୁଥିବା ବାଣିଜ୍ୟ ଯୁଦ୍ଧ ଏବଂ ସରକାରୀ ଖର୍ଚ୍ଚରେ ହ୍ରାସ ଏହାର କାରଣ । ବିଶ୍ୱ ଅର୍ଥବ୍ୟବସ୍ଥା ପାଇଁ ଟ୍ରମ୍ପଙ୍କ ୨୫%ର ଅଟୋ ଟାରିଫ୍ ଏବଂ ରାଷ୍ଟ୍ରଗୁଡ଼ିକର ସମ୍ଭାବ୍ୟ ପାଲଟା ଶୁଳ୍କ ହମ୍ଲା ରିସ୍କ ସାଜିବ ବୋଲି ଜାଣ୍ଡି କହିଛନ୍ତି ।
ବିତ୍ତୀୟ ଆହ୍ୱାନଗୁଡ଼ିକ ସତ୍ତେ୍ୱ ଟ୍ରମ୍ପ ନିଜର ଶୁଳ୍କ ରଣନୀତିରେ ଅଟଳ ରହିଛନ୍ତି । ତାଙ୍କ ମୁତାବକ ଟାରିଫ୍ ଦ୍ୱାରା ପ୍ରତିବର୍ଷ ଆମେରିକାକୁ ୬୦୦୦୦ କୋଟି ଡଲାରର ରାଜସ୍ୱ ମିଳିବ । କିନ୍ତୁ ଅର୍ଥନୀତିଜ୍ଞମାନେ ଏହି ଦାବିକୁ ଖଣ୍ଡନ କରିଛନ୍ତି । ଏମାନେ କହିଛନ୍ତି ଯେ, ଏହାର ବୋଝ ଉପଭୋକ୍ତା ଏବଂ କମ୍ପାନିଗୁଡ଼ିକ ଉପରେ ପଡ଼ିବ ।
