ଢେଙ୍କାନାଳ ୫।୪: ବେକାବୁ ହୋଇ ଚାଲିଛି ଜବର ଦଖଲ । ବିଗତ ୨୫ ବର୍ଷରେ ରାଜ୍ୟରେ ଅଧାରୁ ଉର୍ଦ୍ଧ୍ବ ଜାଗା ଜବର ଦଖଲ ହୋଇସାରିଛି । ଏପରିକି ଗୋଚର, ଜଙ୍ଗଲ ଜମି, ଶ୍ମଶାନ, ଜଳାଶୟ, ରାସ୍ତାଘାଟ ଆଦି କିଛି ଛାଡୁନାହାନ୍ତି । ଏହା ଉପରେ ପୂର୍ଣ୍ଣଚ୍ଛେଦ ନପଡିଲେ, ସମୟ ଆସିବ ଜମିଜମା ମାମଲା ବୁଝୁଥିବା ଖୋଦ ରାଜସ୍ୱ ବିଭାଗ ମଧ୍ୟ ଭୂମିହୀନ ହୋଇଯିବ । ତେଣୁ ଜବର ଦଖଲକାରୀଙ୍କ ଏକ ତାଲିକା ପ୍ରସ୍ତୁତ କରିବାକୁ ତହସିଲଦାର ମାନଙ୍କୁ ନିର୍ଦ୍ଦେଶ ଦିଆଯାଇଛି । ସେ ଯିଏ ହେଉ, ଯେଉଁ ଜାଗା ହେଉ ଖୁବ୍ଶୀଘ୍ର ଜବର ଦଖଲକୁ ଉଚ୍ଛେଦ କରାଯିବ ବୋଲି ରାଜ୍ୟ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ପ୍ରକାଶ କରିଛନ୍ତି ।
ଦିନିକିଆ ଢେଙ୍କାନାଳ ଗସ୍ତରେ ଯାଇ ଜିଲ୍ଲା କାର୍ଯ୍ୟାଳୟ ସଭାଗୃହରେ ରାଜସ୍ୱ ବିଭାଗର ସମୀକ୍ଷା କରିଛନ୍ତି ମନ୍ତ୍ରୀ ସୁରେଶ ପୂଜାରୀ । ଏହି ଅବସରରେ ରାଜ୍ୟରେ ଜବରଦଖଲକୁ ନେଇ ସୃଷ୍ଟି କରୁଥିବା ସମସ୍ୟା ଦିଗରେ ମନ୍ତ୍ରୀ ତାଙ୍କର ଏହି କଡା ଅଭିମୁଖ୍ୟକୁ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି ।
ଏହି ସମୀକ୍ଷା ବୈଠକରେ ଜିଲ୍ଲାରେ ଗ୍ରୀଷ୍ମ ପ୍ରବାହକୁ ନେଇ ବିକଳ୍ପ ବ୍ୟବସ୍ଥା, ବିଭିନ୍ନ ରାଜସ୍ୱ ସମସ୍ୟା ଓ ପ୍ରାକୃତିକ ବିପର୍ଯ୍ୟୟକୁ ସୁପରିଚାଳନା ଓ ସଚେତନତା ଦିଗରେ ଧ୍ୟାନ ଦେବାକୁ ସରକାରୀ ଅଧିକାରୀଙ୍କୁ ପରାମର୍ଶ ଦେଇଥିଲେ ମନ୍ତ୍ରୀ । ଅନ୍ୟ ମାନଙ୍କ ମଧ୍ୟରେ କାମାକ୍ଷାନଗର, ପରଜଙ୍ଗ ଓ ହିନ୍ଦୋଳ ବିଧାୟିକା, ଜିଲ୍ଲାପାଳ ଓ ଏସ୍ପିଙ୍କ ସମେତ ଜିଲ୍ଲାସ୍ତରୀୟ ସରକାରୀ ଅଧିକାରୀ ମାନେ ଉପସ୍ଥିତ ଥିଲେ ।
You Can Read:
ସୋଆରେ ଉଦଯାପିତ ହେଲା ‘ଏଲିସିୟମ୍-୨୦୨୫’, ସପ୍ତାହବ୍ୟାପୀ ଆୟୋଜିତ ହୋଇଥିଲା କାର୍ଯ୍ୟକ୍ରମ
